කොළඹ කිව්ව ගමන් අපේ හිතේ මැවෙන්නේ දුහුවිල්ලෙන් සහ දුමෙන් වැසී ගිය, කර්කශ පරිසරයක් ඒ වගේම වාහන නලා හඬින් පිරී ගිය වැඩ රාජකාරී වලින් කාර්යබහුල වූ තෙහෙට්ටුවෙන් එහා මෙහා දිව යන මිනිසුන්ගෙන් පිරි නගරක්.
නමුත් මේ සියල්ලම මැද සතා සිවුපාවන් සැරිසරන, විවිධ වර්ගයේ පක්ෂීන් නිදහසේ පියඹන, ඉතා ශාන්ත, ක්ෂේම භූමි වැනි ස්ථානත් තිබෙනවා කිව්වොත් ඔබට සමහර විට පුදුම හිතේවි.
වැඩිදෙනෙක් තවමත් නොදන්නා මේ සොඳුරු ඉසව්ව පිහිටලා තිබෙනේ අපේ රටේ අගනුවරට බොහොම නුදුරින්.
බත්තරමුල්ල නගරය සහ ශ්‍රී ජයවර්ධනපුර පාර්ලිමේන්තු සංකීර්ණය පෙනෙන මානයේ පිහිටා ඇති බැද්දගනා තෙත් බිම් උද්‍යානය ගැනයි අද අපි ඔයාට කියන්න යන්නේ.
හෙක්ටයාර 18ක් පුරාවට විහිදුණු මේ අසිරිමත් උද්‍යානය, සුන්දර දියවන්නා ඔයේ ජලතීරය හැඩ කරන එක් හරිත මායිමක් වනවා. ශ්‍රී ජයවර්ධනපුර කෝට්ටේ කුරුළු අභයභූමිය ලෙස නම්කර ඇති ප්‍රදේශය තුළම පිහිටා ඇති, ඒකදේශික පක්‍ෂීන්ගේ සහ කුඩා සත්ව විශේෂයන්ගේ නිවහනක් ලෙස හැඳින්වෙන මේ බැද්දගාන තෙත්බිම් උද්‍යානය එවන් කාර්යබහුල නගරයක් තුළ සැඟවුණු ක්ෂේම භූමියක්.
නාවල පාර, කොටා පාර හෝ කොල්ලුපිටිය – ශ්‍රී ජයවර්ධනපුර පාරේ සිට හෝ රාජගිරිය දෙසට පැමිණෙන ඔබ, මද දුරක් දියත උයන දෙසට ගමන් කරන විට ඇතුල්කෝට්ටේ බස් නැවතුමට මදක් ඉදිරියෙන් ඔබේ දකුණු පසින් හමුවන පැරකුම්බා මාවතෙන් කෝට්ටේ පාරට සම්බන්ධ විය හැකියි. කෝට්ටේ පාරේ කිලෝමීටරයක් පමණ පිටකෝට්ටේ දෙසට පැමිණෙන ඔබට, වම් පසින් හමුවන කොටු බැම්ම මාර්ගයේ නැවතත් කිලෝමීටර බාගයක් පමණ ගිය තැන බැද්දගාන තෙත් බිම් උද්‍යානය හමු වෙනවා.
ඔබත් ඉන්නේ කොළඹ නගරය අවට නම් ගත හිත නිවා ගන්න නිවී සැන සිල්ලේ ගිහින් බලන්න…
ඡායාරූප පහතින්….
