මේ අය ඉන්නේ ඔබ ළඟමයි

Toxic පුද්ගලයින් කියලා ගත්තම ඒ අය අතරේ ඔබේ පවුලේ සාමාජිකයින්, ඥාතීන්, හිත මිතුරන්, සහකරුවා වගේම තමන්ගේ කාර්‍යාලයීය සගයින් පවා ඉන්න ඉඩ තියෙනවා.  ඉතින්, කිසිම සාධාරණ හේතුවකින් තොරව දිගින් දිගටම තමන්ව මානසික පීඩනයට පත් කරන මේ වගේ පුද්ගලයින්ව හඳුනාගැනීම සහ ඔවුන්ව මඟහැර ජීවත්වීමත්, සිතට සහනය ගෙනදෙන ආකාරයේ පුද්ගලයින් ඇසුරු කිරීමත් ඔබේ මානසික සුවයට මනා පිටුවහලක් වෙයි කියලා අපි මුලින්ම මතක් කරන්නට කැමතියි.

ඔබව මානසිකව වෙහෙසට පත් කරවනවා

යම් පුද්ගලයෙක් එක්ක සිදුකරන කතා බහකින් පස්සේ ඔබව මානසිකව බිඳ වැටිලා වගේ නම්, හිතට කිසිම සුබවාදී බවක් දැනෙන්නේ නැත්නම් සහ දිගින් දිගටම මේ දේ සිදුවෙනවා නම් ඒ හිතවත්කම් වලින් ඔබට යහපතක් වෙයි කියලා හිතන්න අමාරුයි. ඒ පුද්ගලයා ඔබට කොයි තරම් සමීපතමයෙක් වුණත් ඒ ඇසුර වෙහෙසකාරී එකක් නම් ඔබගේ මානසික සහනය පතා එවැනි අයගෙන් ඉවත්වීම තමයි වඩාත්ම සුදුසු වෙන්නේ.

තර්ජනයෙන් බියගන්වන්න උත්සහ කරනවා

මෙවැනි පුද්ගලයින් තර්ජන සහ බිය වැද්වීම කියන අවිය මඟින් ඔබගේ තීරණ හෝ ක්‍රියාකාරකම් වෙනස් කරන්නට උත්සහ කරනවා. බොහෝ විට ඒ වෙනස ඔබට හිතකර නොවුනත් බිය නිසා ඔබ ඔබගේ තීරණ වෙනස් කරනවා නම් ඔබ toxic පුද්ගලයෙකුගේ බලපෑමට හසුවෙලා කියලා කියන්න පුළුවන්කම තියෙනවා. Emotional blackmailing කියලා අදහස් කරන්නෙත් මේ කාරණයමයි.

වරදකාරී හැඟීම් ඇති කරවනවා

ඔබට ඒ පුද්ගලයා සමඟ තියෙන සම්බන්ධයේ ස්වභාවය සිහිපත් කරමින් ඔබ තුළ වරදකාරී හැඟීමක් ඇති කරවීමත් ඒ හරහා ඔබට බලපෑම් සිදු කිරීමත් මෙයින් අදහස් වෙනවා. මෙයත් ඉහත සඳහන් කළ ආකාරයේම bully කිරීමක් විදියට පෙන්වන්න පුළුවන්. වෙනත් විදියකට කියනවා නම් ඔබ තුළ ඒ පුද්ගලයා ගැන තියෙන සැළකිල්ල සහ ආදරය අයුතු ආකාරයකට භාවිතා කිරීමක් තමයි මෙහිදී සිදුවන්නේ.

ඉරිසියාකාරයෝ

අන් අයට ඉරිසියා කිරීමත්, අන් අය පරයා යෑම සඳහා unethical ආකාරයට පවා ක්‍රියා කිරීමටත්, ඒ ක්‍රියාකාරකම් විවේචනයට ලක්වෙන විට victim කෙනෙක් විදියට හැසිරීමටත් මෙවැනි පුද්ගලයින් රුසියන් කියලා කියන්න පුළුවන්. ඒ වගේම මේ ඉරිසියාව නිසාම තමන් අවට ඉන්න අයට යම් යම් සීමා පැනවීම, ඒ අයගේ නිදහස අහිමි කිරීම සහ දියුණුවට බාධා කිරීම වගේ දේවල් කරන්නත් මේ අය පෙළඹෙනවා. හොඳට හිතලා බලන්න, ඔබත් මේ වගේ අයෙක්ගේ බලපෑම්වලට හසුවුණු කෙනෙක්ද කියලා.

ඔබගේ ආත්ම විශ්වාසය බිඳ දමනවා

ඉරිසියාව හෝ හුදු විනෝදය වෙනුවෙන් අන් අයගේ ආත්ම විශ්වාසය බිඳ දැමෙන විදියට ක්‍රියා කරන පුද්ගලයිනුත් අයිති වෙන්නේ toxic පුද්ගලයින් කියන කාණ්ඩයට. ඔවුන් තවත් කෙනෙක්ට පැසසුවත් යාන්තමින් හරි negative feeling එකක් එන විදියට තමයි ඒ දේ කරන්නේ. ඔබ ගැන, ඔබ තුළ තියෙන යහපත් හැඟීම බිඳ දමා ඔබව සුළු පුද්ගලයෙක් බව ඒත්තු ගැන්වීම ඔවුන්ගේ ප්‍රධානම අරමුණ වන නිසා හැකිතාක් එවැනි අයගෙන් ඈත්ව සිටීම ඔබට සහනයක් වනවා නොඅනුමානයි.

අපහාසාත්මක විහිළු

මේ කතා කරන්නේ සාමාන්‍ය විහිළු තහළු ගැන නම් නෙවෙයි. අන් අයට අපහාස කිරීමේ අරමුණින් ම යම් අයෙක් දිගින් දිගටම යම් විහිළුවක් කරනවා නම් ඒ පුද්ගලයා තවදුරටත් ඇසුරු කිරීම සඳහා සුදුසු අයෙක් වන්නේ නැහැ. ඔබ ඉදිරියේ පමණක් හෝ පිරිසක් මධ්‍යයේ ඔබගේ අතිශය පෞද්ගලික කරුණු, ඔබට අතිශය සංවේදි කරුණු, එහෙමත් නැත්තම් ඔබට කිසිසේත්ම විහිළුවක් නොවන කරුණු ගැන කතා කිරීමට හෝ ඒ සම්බන්ධ විහිළු තහළු කිරීමට පෙළඹනවා නම් එවැනි අයගෙන් හැකි තාක් ඈත්ව සිටීම ඉතාමත් සුදුසු වෙනවා.

මේ දේවලුත් අමතක කරන්න එපා

වෙන කෙනෙක් අමාරුවේ වැටෙන විදියේ බොරු කියලා ඒවා හෙළිවුණාම අනවශ්‍ය කලබල කරමින් අනුකම්පාව සොයන ආකාරයේ පුද්ගලයින්, ඔබේ සැබෑ හැඟීම් නොසලකා හරින සහ ඒවා ගැන සෝපාහාසාත්මක අදහස් පළකරන්නන්, තමන්ගේ වැරදි පිළිනොගෙන ඒවාගේ වගකීම වෙනත් අයට භාරදෙන මිනිසුන්, ඔබට නිසි ගෞරවයක් ලබානොදෙන ආකාරයේ පුද්ගලයින් සහ තමන්ගේ වැරැද්ද ඔබට භාර දී ගැලවිජ්ජාව වෙනුවෙන් බොරුවට සමාව ඉල්ලන පුද්ගලයින් අයිති වෙන්නෙත් ඇසුරට අහිතකර විසකුරු පුද්ගලයින් විදියටයි.

The post ඔබ අවට ඉන්න toxic පුද්ගලයින් හඳුනාගන්නේ මෙහෙමයි appeared first on Lady.lk | Lady | Women | Lifestyle | Health | Beauty.

Sex

මෙය අතිශය පෞද්ගලික කාරණයක් සහ හිතවත් ම මිතුරියන් සමඟ හෝ සාකච්ඡා කරන්නට සුදුසු නැති කරුණක් නිසා මුලින්ම මේ ගැන කතා කරන එක හොඳයි කියලා අපි හිතුවා. ඔබට හෝ ඔබේ සහකරුවාට sex සම්බන්ධව යම් ගැටළුවක් පවතිනවා නම් සුදුසුකම් ලත් වෛද්‍යවරයෙකුගෙන් උපදෙස් ලබාගැනීම හැර, හිතවතුන් සමඟ මේ ගැන සාකච්ඡා කිරීම කිසිසේත්ම සුදුසු වන්නේ නැහැ. අපි අන් අය සමඟ කතා බහ කරන පෞද්ගලික කාරණා තවත් අයගේත් සාකච්ඡාවලට මාතෘකා වන්නට ඉඩ ඇති නිසා, පසුකාලීනව ඔබව අපහසුතාවයට පත්වන්නට ඔබ ම හෙළි කරන මේ තොරතුරු හේතුවක් වන්නට ඉඩ තියෙනවා. ඒ වගේම මේ හරහා තමන්ගේ සහ සහකරුවාගේ ආත්ම ගෞරවයට හානි වෙනවා වගේම ඔබට පිටස්තර පාර්ශව වලින් බලපෑම් එල්ල වෙන්නටත් මෙය හේතුවක් වන්නට ඉඩ තියෙනවා.

සල්ලි

තමන්ගේ ආර්ථික තත්ත්වය ගැන ප්‍රශ්න කරනවාට බොහෝ දෙනෙක් ප්‍රිය කරන්නේ නැහැ. ඒ වගේම ඔබේ තමන්ගේ ආර්ථික තත්ත්වය, අඟහිඟකම් ගැන පිටස්තර පාර්ශව සමඟ සාකච්ඡා කිරීමත් එතරම් සුදුසු නැත්තේ ඒ තොරතුරු කටින් කට ගිහින් පසුකාලීනව ඔබ ම අපහසුතාවයට පත්වෙන්නට ඉඩ ඇති නිසයි. ඒ විතරක් නෙවෙයි, තමන් සතු වත්කම් සහ නිවසේ ඇති වටිනා කියන දේවල්  ගැන අන් අයට දැනෙන්නට ඉඩ හරින එක ඔබේ ආරක්ෂාවටත් එතරම් සුදුසු වන්නේ නැහැ.

ආගම සහ දේශපාලනය

ආගමික විශ්වාසයන් සහ දේශපාලන නැඹුරුකම් ගැන එකිනෙකාට තියෙන්නේ වෙනස් අදහස් නිසා හැකිතාක් මෙවැනි මාතෘකා ගැන දුර දිග යන ආකාරයේ සාකච්ඡා පවත්වා නොගන්න එක තමයි වඩාත්ම සුදුසු වන්නේ. ඔබට කොයි තරම් හිතවත් යාළුවෙක් වුණත්, මෙවැනි කරුණුවලදී ඔවුන්ටම පෞද්ගලික වුණු මතවාදයන් තියෙන නිසා යාලුකම් පවා නැතිවෙන්නට මෙවැනි සාකච්ඡා මූලික වෙන්නට ඉඩ තියෙනවා.

අනුන්ගේ විස්තර

බාහිර පාර්ශව ගැන තමන්ට අදාළ නොවන කරුණු මිතුරියන් සමඟ සාකච්ඡා කිරිම ඍජුවම අයිති වන්නේ gossips වලට කියලා ඔබ දැනගත යුතු වෙනවා. විශේෂයෙන් ම අනෙක් අයව විනිශ්චය කිරීම, ඔවුන්ගේ වැරදි සෙවීම හෝ තමන් ඔවුන් ගැන දන්නා කරුණු වෙනත් අය සමඟ කීම කිසිම විදියකට ප්‍රියජනක කටයුත්තක් නම් වන්නේ නැහැ. ඒ තොරතුරු සහ ඔබ නොකිව් දේවල් පවා කටින් කට යෑමෙන්, ඒ අදාළ පුද්ගලයා පමණක් නොව ඔබත් අපහසුතා වලට ලක් වෙන්නට ඉඩ තියෙනවා.

රැකියා ස්ථානයේ තොරතුරු

තමන්ගේ සේවය වෙනුවෙන් වැටුපක් ලබාදෙන රැකියා ස්ථානයේ තොරතුරු පිටස්තරයින්ට ලබා දීම එක්තරා විදියක අප්‍රසන්න කටයුත්තක් බවත්, එය ඔබේ රැකියාවට පවා අහිතකර විදියට බලපාන්න පුළුවන් බව අමතක කරන්න එපා. ඒ වගේම රැකියා ස්ථානයේ හිතවතුන් සමඟ පවා අනිත් සේවකයින් සහ ප්‍රධානීන්ගේ පෞද්ගලික තොරතුරු ගැන සාකච්ඡා කිරීම ආචාර ධර්ම වලට පටහැනි සහ ඔබව අනවශ්‍ය කරදරවලට පටලවන ආකාරයේ ක්‍රියාවක් බව ඔබ විසින් දැනගත යුතු වෙනවා.

පෙනුම

වසර ගාණක හිතවත්කමක් පවා බිඳිලා යන්න මේ වගේ කාරණා හේතු වෙන්න පුළුවන් බව ඔබ දැන ගත යුතුම කාරණයක් වෙනවා. කෙනෙක්ගේ ශරීරයේ පැහැය, හැඩය සහ බර වගේ දේවල් ඒ කෙනාට අතිශය සංවේදී කාරණා නිසා කිසිම කෙනෙක්ගේ ශරීර ස්වභාවයක් ඔබගේ සාකච්ඡාවලට මාතෘකා වෙන්න හොඳ නැහැ කියන කරුණ සිහි තබා ගත යුතු වෙනවා.

ලෙඩ රෝග

උපකාර කිරීමේ අවංක හැඟීමක් තමන්ගේ හිතේ නැත්නම් අන් අයගේ ලෙඩ රෝග සම්බන්ධව විමසීම එතරම් යහපත් පුරුද්දක් නම් නෙවෙයි. ඇතැම් පුද්ගලයින් තමන්ගේ හෝ පවුලේ සාමාජිකයින්ගේ රෝගී තත්ත්වයන් ගැන විමසීම සම්බන්ධයෙන් ප්‍රිය නොකරන නිසා ඔවුන් කැමැත්තෙන්ම කීවොත් හැර ඒ ගැන ඇසීම හෝ වෙනත් අය සමඟ තමන් දන්නා තොරතුරු බෙදාහදා ගැනීම එතරම් සුදුසු වන්නේ නැහැ. ඒ වගේම එවැනි රෝගීන්ට වචනයකින් හෝ සහනයක් වනවා මිස යම් යම් කරුණු පවසමින් තවදුරටත් බිය ගැන්වීමත් හිත්වත්කම් පළුඳුවන්නට හේතු වන්නට ඉඩ තියෙනවා.

පවුලේ අය

සමහරුන් තමන්ගේ පවුලේ සාමාජිකයින්, සහකරුවා හෝ පෙම්වතා සම්බන්ධව තොරතුරු හෙළිදරව් කිරීමට කැමැත්තක් දක්වන්නේ නැහැ. ඒ අකමැත්ත සඳහා ඔවුන්ටම හේතු තියෙන්නට ඉඩ ඇති නිසා එවැනි කරුණු ගැන ඔවුන් කැමැත්තෙන්ම තොරතුරු හෙළිකරන්නේ නැති නම් බලෙන් විමසීම කිසිසේත්ම සුදුසු වන්නේ නැහැ.

අනාගත සැලසුම්

ඔබගේ අනාගත සැලසුම් පිටස්තරයන්ට පැවසීම පසුකාලීනව අනපේක්ෂිත විදියට ඔබට ම හානිදායක වන්නට ඉඩ තියෙනවා. ඒ වගේම් අන් අයගේ අනාගත සැලසුම් ගැන දිගින් දිගටම විමසීම ඔබව ඒ අයට අප්‍රසන්න වීමටත් හේතුවක් වනවා නොඅනුමානයි.

උපදෙස් හිතවතෙක් යම් කරුණක් සම්බන්ධව අදහස් විමසනවා නම් තමන්ගේ අදහස කියනවා මිස ඔවුන්ට එය පිළිගන්නට බලපෑම් කිරීම සුදුසු දෙයක් වන්නේ නැහැ. ඒ වගේම ඔවුන්ගේ අතිශය පෞද්ගලික කරුණු සම්බන්ධව බලෙන් උපදෙස් දීමට හෝ තමන්ගේ මතවාද පිළිගන්නා ලෙසට ඔවුන්ට බලපෑම් කිරීම යෑමෙන් ඔබව අප්‍රසන්න පුද්ගලයෙක් විදියට හඳුනාගන්නට ඉඩ ඇති බවත් අපි සිහිපත් කරන්නට කැමතියි.

The post යාලුවෝ එක්ක සාකච්ඡා කරන්න හොඳ නැති දේවල් appeared first on Lady.lk | Lady | Women | Lifestyle | Health | Beauty.

ඔයා වෙනුවෙන් ඉන්නවා.

මොන දේ වුණත් ඔබ වෙනුවෙන් පෙනී හිටින්න දෙපාරක් නොහිතන කෙනා හොඳ යාලුවෙක් විදියට හඳුන්වන්න පුළුවන්. විශේෂයෙන්ම ජීවිතයේ ඔබ මුහුණ දෙන අමාරු අවස්ථාවලදි මේ අය අනිත් හැමෝටම කලින් ඔබ වෙනුවෙන් ඉදිරිපත් වෙනවා. එය, සමීපතමයෙකුගේ අභාවයක්, රැකියාව අහිමිවීමක්, පෙම් සබඳතාව බිඳවැටීමක් හෝ වෙනත් ඕනෑම අසීරු අවස්ථාවක් වෙන්න පුළුවන්. ඒ විතරක් නෙවෙයි, ඒ වගේ අවස්ථාවකට ශක්තිමත්ව මුහුණ දෙන්නත්, ඉදිරි සැලසුම් සකස් කරගන්නත් මේ අය විශාල පිටුවහලක් ලබාදෙනවා.

හොඳ සවන් දෙන්නෙක්

අද සමාජයේ බොහෝ දෙනෙක් සුලබව සිදු කරන වැරැද්දක් වන ‘අනෙකා විනිශ්චය කිරීම’ හොඳ යාළුවෙක්ගෙන් සිදු වෙන්නේ නෑ. ඒ වගේම ඔබ යමක් ගැන කතා කරනකොට ඒ  මාතෘකාව වෙනස් කර බාධා කිරීමට ඒ කෙනා පෙළඹෙන්නෙත් නෑ. සමහරවිට ඔබේ යාළුවා එතරම් කතා බහ නොකරන කෙනෙක් වෙන්න පුළුවන්. හැබැයි ඔබව judge නොකර ඔබගේ කතාවට හොඳින් සවන් දෙනවා නම්, අවශ්‍ය අවස්ථාවේදී තමන්ගේ අදහස් ඉදිරිපත් කරලා සහයෝගය දැක්වීම කරනවා නම් ඒ යාළුවා ආශ්‍රයට සුදුසු හොඳ යාලුවෙක් කියලා කියන්න පුළුවන්.

ඕපාදූප පතුරවන්නේ නෑ.

ඔබේ පෞද්ගලික විස්තර වෙනත් අය සමඟ කියන, වෙනත් අයගේ පෞද්ගලික විස්තර ඔබත් සමඟ කියන අයෙක් යාලුවෙක් විදියට තෝරාගැනීම එතරම් සුදුසු දෙයක් නම් නෙවෙයි. විශේෂයෙන් ම යහපත් අදහසකින් තොරව අනෙක් අයගේ ජීවිතවලට එබෙන, ඒ ගැන ඕපාදූප පතුරවන කෙනෙක්ට කිසිසේත් ම වෙන කෙනෙක්ගේ හොඳ යාලුවෙක් වීමට අවශ්‍යතාවයක් නැති බවත් මතක් කරන්නම සිදුවෙනවා.

ඔයාව ඔයා විදියටම භාර ගන්නවා

ඔබගේ රැකියාව කුමක් වුණත්, ශරීර ස්වභාවය කොහොම වුණත්, අධ්‍යාපනය හෝ පවුල් පසුබිම කොහොම වුණත් ඔබව ඒ පවතින විදියටම භාර ගන්න කෙනා හොඳ යාළුවෙක් විදියට සළකන්න පුළුවන්කම තියෙනවා. බාහිර කරුණු ගැන නොසළකා, ඔබ තුළ තියෙන යහපත් ආකල්ප ගැන පමණක් සිහි තබාගන්න යාළුවෙක්ගෙන් ඔබට හොඳක් මිස නරකක් නම් වෙන්නේ නෑ.

ඔයාගේ අරමුණුවලට යන්න උදව් කරනවා

අධ්‍යාපන හෝ ව්‍යාපාරික කටයුතුවලින් ඉදිරියට යෑම වගේ දේවල්වලට විතරක් නෙවෙයි, ඔබගේ ඕනෑම යහපත් අරමුණක් ලඟා කරගැනීමට අවංකවම උපකාර කරන කෙනා හොඳ යාළුවෙක් කියලා කියන්න පුළුවන්. එය, අහිතකර සබඳතාවයක් හෝ ඇබ්බැහියක් අත්හැරීම, රැකියා ස්ථානයේ ගැටළු මඟහරවා ගැනීම එහෙමත් නැත්තන් පෞර්ෂ දුර්වලතා මඟහරවා ගැනීම වගේ දෙයක් වෙන්නත් පුළුවන්.

හැඟීම් වටහා ගන්නවා

ඔබව පහතට ඇද දමා කතා කරන හෝ හීන් සීරුවේ ඔබගේ හිත රිද්දන්න උත්සහ කරන කෙනෙක් නම්, ඒ වගේ අයෙක් හොඳ යාළුවෙක් විදියට සළකන්න අමාරුයි. ඔබගේ හැඟීම් වටහාගෙන, ඒවාගේ වැරැද්දක් පෙනෙන්නට තියෙනවා නම් කරුණාවෙන් එය පෙන්වාදීම සහ නිවැරදි කරගැනීමට සහය දීම ඔවුන් විසින් සිදු කරනවා. ඔබ විසින් සිදු කරන ඕනෑම වැරැද්දක් සාධාරණීකරණය කරනවා නම්, ඒ වගේ කෙනෙක් හොඳ යාලුවෙක් වෙනවා කියලා කියන්නත් බෑ.

ආත්මාර්ථකාමියෝ

යාළුවෙක්ගේ වෙසින් පෙනී සිටිමින්, ලාභ ප්‍රයෝජන ලබා ගැනීමේ අරමුණින් පමණක් ඔබව ආශ්‍රය කරන බව පෙනෙනවා නම් එවැනි ආත්මාර්ථකාමි මිනිසුන් ජීවිතයෙන් ඈත් කරන්න දෙවරක් හිතන්න එපා. තමන්ගේ අවශ්‍යතාවයන්ට පමණක් ඔබව සොයා එන, ඔවුන්ගේ කරදර පමණක් ඔබ මත අතහරින්නට එන පුද්ගලයින්ගෙන් ඔබට කිසිදු යහපතක් වෙන්නේ නම් නෑ. හොඳ යාලුවෙකු තුළ තිබිය යුතු විශ්වාසවන්ත බව කිසිසේත්ම මොවුන් තුළ තියෙනවා කියලා කියන්න අමාරුයි.

හිත නිවන කෙනෙක්

හිතේ තියෙන පීඩාකාරී බව නැති කරවන්නට හොඳ සමාජ සම්බන්ධකම් වලට හැකියාව තියෙනවා. කිසිම කෙනෙක් ළඟදි නොදැනෙන ආකාරයේ සුවපහසු බවක්, සැහැල්ලුවක් සහ විනෝදයක් ඔබට තමන්ගේ යාළුවා ළඟදි දැනෙනවා නම් ඒ වගේ යාළුවෙක් කිසිම වෙලාවක අහිමි කරගන්න එපා. කොයි තරම් අසීරු මොහොතක වුණත් ඔබගේ mood එක වෙනස් කරලා, මුහුණට හිනාවක් ගේන්න පුළුවන් නම් ඒ කෙනා හොඳ යාලුවෙක් කියලා හඳුන්වන්න පුළුවන්.

The post යාළුවා ඇත්තටම හොඳ යාළුවෙක්ද කියලා දැනගන්නේ මෙහෙමයි. appeared first on Lady.lk | Lady | Women | Lifestyle | Health | Beauty.

ඩිප්‍රෙෂන්

අපි හැමෝම දන්න වචනය නිසා ඩිප්‍රෙෂන් කියලම කිවුවට මේකට කියන හරි නම විෂාදය. අපි හැමෝම මානසික අවපාතයකට ලක් වුණාම පොදුවේ කියන දේ තමයි ඩිප්‍රෙස් වෙලා කියන එක. අපිට ජීවිතේ සතුටු හිතුණු දේවල් ගැන තව දුරටත් සතුටක් නැති වුණාම, හරිම පහළ වැටුණු ගතියක් දැණුනම මේ තත්ත්වය කියන්න පුළුවන්. අධික ශෝකය, ආහාර අරුචිය, මම දුර්වලයි කියා සිතීම, නින්ද අඩුවීම වගේ තත්ත්ව එක්ක පටන් ගන්න මේ තත්ත්වය පසු කාලීනව සිය දිවි නසා ගැනීම් වෙනුවෙන් පවා හේතු වෙන්න පුළුවන්. ඒ වගේම මේ රෝග තත්ත්වය සමාජීව වශයෙනුත් තරමක් නරක අතට ගිහින් තියෙන්නෙ. ඒ තමයි බොහෝ දෙනෙක් මේ රෝගය ආභරණයක් කරගැනීම. ඒකත් එක්ක දකින දකින හැමෝම මටත් ඩිප්‍රෙෂන් කියා පැවසීම නිසා, සත්‍ය වශයෙන් මේ තත්ත්වයෙන් පෙළෙන්නන් යටපත් වී යාම සහ මෙය ඔවුන් තුළ සාමාන්‍යීකරණය වීම නිසාත් රෝගය සොයාගන්නට බැරිව යනවා.

පැනික් ඇටෑක්

මේකනං තරමක් අඳුරු තත්ත්වයක්. සිද්ධ වෙන්නෙ ඔබ නොසිතූ ලෙසින් වරින් වර පැනික් ඇටෑක්ස් එහෙමත් නැත්නම් හෘද ස්පන්ධනය ඉහළ යෑම් සිද්ද වීමයි. මේ තත්ත්වය ඇති වීම නොයෙක් හේතු නිසා සිදු වුණත්, බහුලව ඇති වන්නේ යමෙක් දුක් වන කාරණයකට නිතර නිතර මුහුණ දෙන්නට වන විට මෙය සිදු වීමයි. මේ විදියට දේවල් සිද්ධ වෙද්දි සිද්ධ වෙන්න පුළුවන් තවත් නරකක් තියෙනවා. ඒ තමයි අදාළ පුද්ගලයා මෙවැනි අවස්ථාවන්වල තමුන් අත්දකින පොදු කාරණාවලට තවතවත් බිය වී එය ෆෝබියාවක් බවට පත් වීම. ඉන්පසු එයින් ගොඩ ආ නොහැකි තරමටම ගිලී යාම. මේ තත්ත්වය ක්ෂණිකව මගහරවන්න පුළුවන් වෙන්නෙ ආදරණීයයෙකුට. ඒ නිසාම තනිව ජීවත් වන අයෙකු නම් සුරතල් සතෙකු හෝ ඇති කරන්නට පවසනවා. මේ වැනි තත්ත්වයන් සුරතල් සතුන්ට ක්ෂණයකින් දැනෙන නිසා ඔවුන් ඒ අවස්ථාවලදී ක්‍රියාත්මක වන වීඩියෝ පවා බොහෝ දැකිය හැකියි.

ADHD

කෙටියෙන් කියූ මාතෘකාවේ දිගු නම වෙන්නෙ Attention Deficit Hyperactive Disorder. මේකෙදි මූලිකවම සිද්ධ වෙන දේ අපිටම තේරුම් ගන්න පුළුවන් දෙයක්. ඒ තමයි අවධානය යොමු කරගැනීමට අපහසු වීම. එක් සිදුවීමකින් සිදුවීමට පැන පැන යන ස්වභාවයක් මනස තුළ වර්ධනය වීම නිසා වර්තමානයේ නියැලෙන ක්‍රියාවට පූර්ණ අවධානය දෙන්නට ඇති නොහැකියාව කියලත් එය දිගු කර දක්වන්නට පුළුවන්. මේ ලක්ෂන සාමාන්‍යයෙන් කුඩා දරුවෙකුගෙන් පවා අත්දකින්නට පුළුවන් තත්ත්වයන්. ඒ වගේම මේ තත්ත්වයන් වෛද්‍ය උපදෙස් මාර්ගයෙන් නිවැරදි කර ගත හැකි වීමත් භාග්‍යයක්. 

Psychotic disorders

මේ කියන්නෙ බරපතල තත්ත්වයක් ගැන. එනම් මනෝව්‍යාධි තත්ත්වයන්. මනෝව්‍යාධියක් ඇති අයෙකුට යථා ලෝකය එක්ක තියෙන බැඳීඹ අඩුයි. එයාලාගෙ කය තියෙන්නෙ අපි ජීවත්වෙන ලෝකෙ වුණාට එයාලගෙ මනෝ ලෝකයේ සිද්ධ වෙන දේවල් වෙනස් සහ විකාර රූපී දේවල්. තමන් අවට අනෙක් අයට නොඇසෙන ශබ්ද ඇසීම හෝ නොයෙක් අය තමන්ට කතා කරන වග දැනීම පවා මේ ඝනයට අයත් වෙනවා. මේ තත්ත්වය තරමක් බරපතල තත්ත්වයක් නිසාම මේ ගැන වහාම වෛද්‍ය උපදෙස් පැතිය යුතුයි.

Anxiety Disorder 

මේකට කාංසාව සහ සාංකාව යන දෙවිදියෙන්ම හැඳින්වුවත් අපි විශ්වාස කරන විදියට මේක කාංසාව වෙන්න ඕන. මේ තත්ත්වය තියෙන අයෙක් හඳුනාගන්නට පහසුයි. ඒ තමයි ඔවුන් සුළු දෙටත් කලබල වීම සහ බිය වීම. උදාහරණයකට තරමක් වේගයෙන් යන වාහනයකට, ඈතින් එන බල්ලෙකුට, නොදන්නා ආගන්තුක මිත්‍රශීලී බවක් නැති අයෙකුට වගේ අවස්ථාවලදී ඔවුන් කලබල වීම හෝ බිය වීම දැකිය හැකියි. මෙම තත්ත්වය මෙවැනි සුලබ අවස්ථාවල සිට ඉතා දැඩි අවස්ථා තෙක් ඇදී යන්නට හැකියි.

Dementia

මූලික ලක්ෂණය වෙන්නෙ සිහි මද බව. මේක මේ විදියට ගිහින් එදිනෙදා ජීවිතය ගෙවන්න අපහසු වෙන තරමටම වර්ධනය වෙන්නට පුළුවන්. යමක් ගැන සිතන්නට අපහසු වීමත් මෙයට සමාන්තර තත්ත්වයක්. උදාහරණයකට මේ තත්ත්වය තමුන්ගේ මවු භාෂාව හසුරවාගන්න අපහසු මට්ටම දක්වා යන්නට පුළුවන්. අපි මේ කියන්නෙ සිහි මද බවක් නෙමෙයි. මේ කියන්නෙ සිතීම පාවිච්චි කිරීම හෝ මතකය පාවිච්චි කිරීමේ ගැටළුවක්.

ඉතිං මෙවැනි තත්ත්ව අප අවට සමාජයේ බහුලව දකින්නට පුළුවන් නිසාම අපි මේ ගැන වැඩි අවධානයකින් සිටිය යුතුයි. අපේ මිතුරන් වගේම ආදරණීයයන් ඔවුන්ටත් නොදැනීම මේ වගේ වියවුලක පැටලිලානම් අපිට ඔවුන් ගලවාගන්නට තියෙන අවසන් අවස්ථාව මුල් කාලයේදීම මේ තත්ත්වයන් ගැන දැණුවත්ව සිටීම වෙන්න පුළුවන්. ඉතිං මේ ගැන අනිත් අයත් දැණුවත් කරන්න මේ ළිපිය ෂෙයා කරන්න.

The post සමාජයේ බහුලවම දකින්නට ලැබෙන මානසික රෝග ගැන දැනගත්තොත් නේද හොඳ appeared first on Lady.lk | Lady | Women | Lifestyle | Health | Beauty.

නින්දට කෝ ඉඩක්?

මුල්ම දේ අපේ නින්දට සිද්ධ වෙන බාධාව. හිතන්න අපි සාමාන්‍යයෙන් නිදියන්නෙ රෑ 10.30ට කියල. එහෙම නිදියනවා නම් අපි රෑ 10ට ඇඳට යනවා. නමුත් අපි ඇඳට අරගෙන යන අපේ ස්මාට්ෆෝනයේ තියෙන්නෙ පැය බාගෙන් ඉවර වෙන දේවල් නෙමෙයි. ඒවයේ ඇල්ගොරිදම් හැදිලා තියෙන්නෙ අපිව ඇබ්බැහි කරගන්නා සුළු විදියට. ඉතින් අපිට ලේසියෙන් නිදාගන්න වෙන්නෙ නෑ. සෝෂල් මීඩියා වගේම, නොයෙකුත් දේවල් අපිට කීයටවත් පැය බාගෙන් නින්දට යන්න ඉඩක් දෙන්නෙ නෑ. අන්න ඒ නිසා නිසි වෙලාවට නිදාගන්න බාධාවක් වෙන ස්මාට්ෆෝනය ඇඳට නොගෙනයාම වැදගත් කාරණයක්.

තවදුරටත්

නින්දට තවත් බාධාවක් වෙන එකම දේ ස්මාට්ෆෝනයේ අන්තර්ගත දේවල් විතරක්ම නෙමෙයි. ස්මාට්ෆෝනයෙන් නිකුත් වෙන නිල් එළිය නොහොත් දන්න භාෂාවෙන් කිවුවම Blue Light එකත් අපේ නින්දට විශාල බාධාවක් කරනවා. ඒ මෙහෙමයි. අපේ ඇඟට උවමනා කරන විවේක සුවය ගෙනෙන්නේ මෙලටෝනින් කියන හෝමෝනය. මේ හෝමෝනයට ඍජුව බාධා කරන දෙයක් තමයි මේ නිල් එළිය. ඉතිං මේ නිල් එළිය නිසා අපේ ඇඟට අවශ්‍ය විවේක සුවයට බාධා ඇවිත් එතනින් අපේ නින්දට බාධා කරනවා. ඉතිං ස්මාට්ෆෝනයෙන් නින්දට සිද්ධ වෙන ප්‍රධානම බාධක දෙක තමයි ඔය.

පිළිකා අවදානම

මේ කතාව තමයි මෙතනින් අපිට අහලා පුරුදුම කතාව. සාමාන්‍යයෙන් ඉස්සර අපිට පිළිකාව කියන දේ තරමක් දුර ප්‍රවෘත්තියක් වුණාට දැන් වෙද්දි කෑම බීමවල තියෙන දේවල් වගේම, ජීවිතය පහසු කරන්න නිපදවුණු තාක්ෂණයේ ආනුභාවයෙන් අපිට පිළිකා කියන්නෙ එදිනෙදා ඇහෙන මාතෘකාවක් බවට පත් වෙලා. පිළිකා අවදානම මඩින්න අපේ ඇඟේ නිපදවෙන ප්‍රධානතම රසායණිකයක් වෙන්නෙ අපි මින් පෙර සඳහන් කරපු මෙලටෝනින් කියන හෝමෝනය. ඉතිං ස්මාට්ෆෝනයෙන් ඒ වෙත එල්ල වෙන බාධාව නිසා අපිව නොදැනීම පිළිකා අවදානමකට විවෘත වෙනවා.

ඇහැට හොඳ නෑ

ඇහැ ගැන ඉගෙනගනිද්දි අපි හැමෝම වගේ පාසලේදි ඉගෙනගත්තු දෘෂ්ඨි විතානයටත් මේ නිල් එළිය බාධාවක් වෙන්න පුලුවන්. දෘෂ්ඨි වාතනයෙන් තමයි අපි දෙයක් හරියටම ෆෝකස් කරගන්නෙ. අපේ පෙනීමේ මූලිකම දේ වෙන්නෙත් ඒක. ඉතිං මේ විදියට දෘෂ්ඨි විතානයට හානි වුණාට පස්සෙ අපිට පෙනෙන රූපවල බොඳවීම් වගේම ෆෝක්ස් කරගන්නට නොහැකිව ඇසේ වේදානවක් ඇති වෙන්නටත් පුළුවන්.

නින්ද අහිමි වීමෙන්

අපි මුලින් සඳහන් කරපු නින්ද අහිමි වීම නිසා අපිට විශාල හානියක් සිද්ධ වෙනවා. මේ හානිය විශේෂයෙන්ම සිද්ධ වෙන්නෙ මොළයට. නින්ද අහිමි වීමත් එක්ක අපේ මුළු සිරුරේම ක්‍රියාවලිය අඩපණ වෙන එක අහන්නත් දෙයක් නෙමෙයි. දවසක් දෙකක් නිදි වැරුවාම අපිට එන අපහසුව එන්නෙ අන්න ඒ නිසායි. ඉතිං මේ ස්මාට්ෆෝන් ඇබ්බැහියත් එක්ක නින්ද අහිමි වීමෙන් අපිට විෂාදය තත්ත්වයන්, හිසරදය, මිග්‍රේන් තත්ත්ව, ඇඟට මහන්සිය, මතකය ගිලිහීම, රිෆ්ලෙක්ෂන්ස් අඩු වීම වගේ අමුතු අමුතු අවුල් සිද්ධ සිදු වෙනවා.

ආයෙත් මෙලටෝනින්

ඔවු මෙලටෝනින් කියන්නෙ පිළිකා මර්ධක හෝමෝනයක් විතරක්ම නෙමෙයි. සිරුර විවේක ගන්වන හෝමෝනයක් විතරකුත් නෙමෙයි. මෙලටෝනින් නිසා කැලරි දහනයත් වේගවත් වෙනවා. ඉතිං මෙලටෝනින් අඩු වීමෙන් කැලරි දහනය අඩපණ වෙලා අපිව තරබාරු වීමත් සිද්ධ වෙන්න පුළුවන්. ඉතිං දැන් තේරෙනවනෙ මේ දේ භයානක කම. 

දැන් අපි මේ ටික කිවුවම කට්ටිය අපෙන් අහන දේවල්වලටයි මේ උත්තර… 

එතකොට අපි නින්ද යනකං මොකද කරන්නෙ? පොතක් කියවන්න.

එළියක්. ලෑම්ප්ෂේඩ් එකක් පාවිච්චි කරන්න.

එලාම් එකක් ඕනනෙ උදේට ඇහැරෙන්න. එලාම් ඔරලෝසුවක් ගන්න.

ඔෆිස් එකේ හදිස්සි වැඩක් ආවොත්? දවසේ වැඩ ඉවර කරන වෙලාවක් තියාගන්න.

කාටහරි හදිස්සියක් නං? ඔයාගෙ නින්දට ඒක බාධාවක් කරගන්න එපා.

එයාට කෝල් කරන්නෙ කීයටද? ඇඳට එන්න කලින් වෙලාවක් ඒ වෙනුවෙන් වෙන් කරන්න.

The post නිදි ඇඳටත් ෆෝන් එක ගෙනියන එකේ අවුල් මේවා තමයි appeared first on Lady.lk | Lady | Women | Lifestyle | Health | Beauty.

එකම දේ නැවත නැවතත් කීම [Echolalia – repeating the same phrase over and over]

පොඩ්ඩන් කියන්නෙ ඒ ඒ කාලෙට අහුවෙන ඒ ඒ දේවල් නිතර කියන, ඒ ගැන නිතර හිතන අය. ඉතිං ඒ අයගෙ කටේ නිතරම කාටූන් දෙබස්, ගීත ඛණ්ඩ වගේ දේවල් ගැවසෙන එක සාමාන්‍ය දෙයක්. නමුත් දරුවා කාලයක් තිස්සෙම එකම දේ කියනවානම් දෙමවුපියන් ඒ ගැන පොඩ්ඩක් සැළකිලිමත් වෙන එක වැදගත්. මොකද මේ විදියට එයාලගෙ කටෙන් කියවෙන දෙයක් වෙනස් නොවී එක දිගටම කියවෙන එක තරමක් අසාමාන්‍ය තතත්වයක්. ළමා මනසට ගොඩක් දේවල් අලුත් නිසා එයාලා ඒ ඒ දවසට සමාජයෙන් එයාලගෙ කටවහරට හොයාගන්න දේවල් ප්‍රමාණය වැඩියි. ඒ අය ආසා දේවල් තියෙන්නෙ පොඩි කාලයයි. අන්න ඒ නිසා කල් නොයවාම මේ ගැන සැළකිලිමත් වෙන එක දෙමවුපියොන්ගෙ වගකීමක්.

සංවේදීතාවයන් 

ළමයාගේ සංවේදීතාවයන් එක්කත් ඔටිසම් රෝගී තත්ත්වයට ඍජු සම්බන්ධයක් තියෙනවා. උදාහරණයකට ළමයා එදිනෙදා ජීවිතයේ අපිට ඇසෙන නොයෙක් ශබ්ද අසන්නට ආසා කරන්නේ නැතිනම් එය මේ රෝගී තත්ත්වයේ මූලික ලක්ෂණයක් විය හැකියි. ඒ වගේම දෙමවුපියන්ගේ හුරතල් කිරීම් මගහරිනවානම් එයත් මේ තත්ත්වයේ මූලික පිළිඹිඹුවක් විය හැකියි. ඒ වගේම ඇතැම් ආලෝක ප්‍රභවයන් අපහසුවෙන් වගේ මගහැරීමත් එවැනි තත්ත්වයක්. ඒ වගේම අපි නොසිතන ඇතැම් භාණ්ඩවලට වැඩි අවධානයක් දෙමින් අතගා බැලීම, සුවඳ බැලීම වගේ ක්‍රියාකාරකම් සිද්ධ කරනවානම් ඒකත් මේ ප්‍රශ්නයේම කොටසක් වෙන්නට පුළුවන්. මේ නිසා නිතරම​ මේ ගැන අවධානයෙන් සිටින්න. අපේ නිවැරදි නිරීක්ෂණය සහ ඉක්මන් වීම සමහර ප්‍රශ්න ඉක්මනින්ම විසඳා ගන්නට උනන්දුවක් වේවි.

තනිව සිටීම

දරුවන් කියන්නෙ හැම තිස්සෙම තමන්ගේ පවුලේ අය සමග නිතර ගැටෙන්නට කැමති පිරිසක්. නමුත් තනිව සිටින්නට හෝ තනිව සෙල්ලම් කරන්නට කැමති දරුවෙකුගෙන් ඒ පෙනෙන්නේ ඔටිසම් තත්ත්වයේ මූලික ලක්ෂණයක් වෙන්නට පුළුවන්. සාමාන්‍යයෙන් දරුවෙකු සෙල්ලම් බඩුවක් ලැබුනාම ඒ සමග සෙල්ලම් කරන්නට ගෙදර අනෙක් අයටත් ආරාධනා කරන එක සාමාන්‍ය තත්ත්වයක්. නමුත් ඔටිසම් තත්ත්වයේ මූලික ලක්ෂණයක් වන්නේ දරුවා ඒ සෙල්ලම් බඩුව ගලවා බලමින් ඒ සමග තනිවීමයි. අප වැඩෙද්දී ඉන්ට්‍රොවර්ට් වීම හෝ එක්ස්ට්‍රොවර්ට් වීම සමාජ ආශ්‍රයේ ප්‍රතිපලයක් විදියට සිද්ධ වුනත්, කුඩා වයසට එය තරමක අර්බුදයක් වෙන්නට පුළුවන්. ඒ නිසා දෙමවුපියන් ඒ ගැන අවධානයෙන් සිටීම අතිශය වැදගත්.

පරිකල්පනය අඩු බව [Lack of imagination]

සාමාන්‍යයෙන් ඉතා කුඩා වයසේ පටන්ම දරුවන්ගෙන් නොයෙක් ආකාරයේ රංගනයන් දැකිය හැකියි. සුපර්මෑන් අහසේ යන ආකාරයට එක අතක් ඉදිරියට දිගු කරගෙන යන ළමයි, බිත්තියට හේත්තු කරපු පොත්වල ලැප්ටොප් එකක වගේ ටයිප් කරන ළමයි, දකින දකින දිගැටි දේ ටෙලිෆෝනයක් වගේ කනේ රුවාගෙන කතා කරන ළමයි, කාර් පදින, ගිටාර් ගහන ආදී නොයෙක් දේවල් ළමයින් රංගනයන් විදියට අනුකරණය කරනවා. මේක සාමාන්‍ය තත්ත්වයක්. අන්න ඒ නිසාම මේ විදියට නොකිරීම අසාමාන්‍ය තත්ත්වයක් වෙන්නට පුළුවන්.

මගහරිනවාද?

ඔබේ අවධානය වැඩිපුරම යොමු විය යුතු දෙයක් වන්නේ දරුවා ඔබව මගහරින තත්ත්වයයි. මූලිකම දරුවා ඔබේ ඇස් මගහරිනවා කියා ඔබට වැටහෙනවා නම්, දරුවා සමග වැඩිපුර කුළුපග වී කතාබහට පෙළඹෙන එක වැදගත්. මේ තත්ත්වය සාමාන්‍යයෙන් අතිශය මිත්‍රශීලී දරුවන්ගෙන් බලාපොරොත්තු වෙන්නට බැරි තත්ත්වයක්. ඒ වගේම ස්වභාවයෙන්ම තරමක් ලැජ්ජාශීලී ළමයිනුත් සිටින නිසා මේ තත්ත්වය එක්වරම ඔටිසම් රෝග තත්ත්වයක් කියා අපිට නිර්ණය කරන්නටත් අපහසුයි. ඒ වගේම ඔබ කතා කරද්දී ඔවුන් එය මගහරිනවා නම් එයත් මෙම රෝගයේ මූලික අවස්ථාවේ ලක්ෂණයක් විය හැකියි. ඒ වගේම ඒ මගහැරීම ඔවුන්ගේ සිත් රිදවීමකදී අප සැනසීමට උත්සාහ කරද්දිත් සිදු විය හැකියි. ඒ වගේම පෙර මෙන් ඔබ ඔවුන් වඩාගැනීමට යනවිට හෝ අතින් අල්ලාගෙන යනවිට ඔවුන් එයට වැඩි කැමැත්තක් දක්වන්නේ නැත්නම් ඔබ ඒ පිළිබඳව අවධානය යොමු කළ යුතුයි.

Sources :

https://www.webmd.com/brain/autism/default.htm
https://www.medicinenet.com/autism_symptoms_and_signs/symptoms.htm

The post මේ ඇතැම්විට ඔටිසම් අවධානමේ මූලික ලක්ෂණ විය හැකියි appeared first on Lady.lk | Lady | Women | Lifestyle | Health | Beauty.

වීඩියෝ

එක දිගට වැඩ කරපු අපේ මනසට සහනයක් දෙන්න වගේම, සාමාන්‍යයෙන් වැඩ කරන ඉරියවුවට වඩා තරමක් සුවපහසු ඉරියවුවකට අපිට හරිබරි ගැහෙන්නටත් කෙටි වීඩියෝවක් බැලීම උදවුවක් වෙනවා. නමුත් මේ දේ සීමා සහිතව කරන්නත් අපි වගබලා ගන්න උවමනායි. ඒ නිසා පැයක් වැඩ කරලා විනාඩි තිහක් වීඩියෝ බලනවා වෙනුවට. පැය දෙකකට වගේ වතාවක් වීඩියෝ එකක් බලන එක ඔයාට තරමක සැහැල්ලුවක් වේවි. ඒ වගේම මේ විදියට වීඩියෝ බැලීමේ පාලනයක් ඇති කරගන්නට, යූටියුබ් සර්ච් කරනවා වෙනුවට ඔයා කැමති ටීවී සීරීස් එකක කොටසක් බලන්නට හුරු වීම ඒ පාලනය ඇති කරාවි. ඒ වගේම දිගු වීඩියෝ වෙනුවට කෙටි වීඩියෝවක් නැරඹීමත් මනසට ඒ සීමාව තේරුම් කරවන්න උදවුවක් වේවි.

තිරයෙන් මිදෙමු

අපි මුලින් කියපු පැය දෙකකට වතාවක් වත් වීඩියෝවක් නැරඹීම මනසට සහනයක් වුනත් වෙහෙස වුනු ඇස් දෙකකට නම් තවත් ඩිජිටල් තිරයක් දිහා බලා සිටීම එතරම් සහනයක් නෙමෙයි. අන්න ඒ නිසාම පැය බාගයකට වතාවක්වත් වැඩ කරන පුටුවෙන් නැගිටලා අවට පරිසරය වගේම කාර්යාල මිත්‍රයෙක් හරි මුණගැහිලා තරමක පොඩි කතාවක් දාලා එන එක ඇඟටත් හිතටත් හොඳයි. ඒ ගමන්ම ස්ට්‍රෙච් වෙලා ඇදිලා කරලා හිර වුනු අතපය නිදහස් කරගැනීමත් වැදගත්.

ඇසට සැප

ජපානයේ නම් වැඩ කරන අතරේ කෙටි නින්දක් ගැනීම මහන්සි වෙලා වැඩ කරන මිනිස්සුන්ගෙ පුරුද්දක්ලු. ඒ නිසා ජපානයේ මිනිසුන් තමන් මහන්සි වෙලා වැඩ කරන කෙනෙක් බව පෙන්වන්න බොරුවටත් ඇස් පියාගෙන ඉන්නවලු. හැබැයි අපේ ලංකාවෙ ඔෆිස්වල නං මේ දේවල් කරන්න බෑ. හැබැයි ගෙදර ඉඳන් වැඩ කරන ඔයාට මහන්සියට කෙටි නින්දක් ගන්න එක විඩාබර ඇස්වලට ලොකු උදවුවක් වේවි. හැබැයි මෙතනදිත් කියන්න තියෙන්නෙ වීඩියෝ කතාවම තමයි. මොකද ඉතිං කට්ටිය වැඩ කරන අතරේ ටිකකට ඇස් දෙක පියාගෙන පැය හයකින් වගේ ඇහැරිලා වැඩක් නෑනෙ.

අත් නිදහස් කරමු

මාතෘකාව කියෙවුවම කලබල වෙන්න එපා. අත් නිදහස් කරවන්නත් නොයෙක් විදි තියෙනවා. එයින් එකක් තමයි අත්වල වගේම ඇඟිලිවල එන වේදනාවන්ට වගේම දිගු වැඩ මුරයක් අතරේ කෙටි විවේකයක් පුරුද්දක් විදියට අත්වලට ලබාදෙන්නට පුළුවන් ව්‍යායාම. ඉතිං මේ ව්‍යායම ව​ගේම පැයකට වතාවක් ලෝෂන් එකක් පාවිච්චි කරලත් මේ දේ පහසුවෙන් කරගන්න පුළුවන්. ඒ මෙහෙමයි. සාමාන්‍යයෙන් කාර්යාලයක වායුසමීකරණයක් ගාව වැඩ කරද්දි අත් වේළුම් කෑම සිද්ධ වෙන්න පුළුවන්. ඒ නිසා ඒකට විසඳුමක් විදියටත් අත් නිදහස් කරගන්න ක්‍රමයක් විදියටත් ලෝෂන් එකක් භාවිතා කරලා පැයකට වතාවක් විතර අත් දෙක හොඳින් මසාජ් කරගන්න එක හිතටත් ලොකු නිදහසක් වේවි.

ස්ට්‍රෙස් නැති පළතුරු

සිට්‍රස් ගණයට වැටෙන පළතුරු කියන්නෙත් ස්ට්‍රෙස් නැති කරන්න වගේම මනසට හොඳ විවේකයක් ලබාදෙන්න කියාපු පළතුරක්. ඒ නිසා දොඩම් ගෙඩියක් ආහාරයට ගැනීම Vitamin C නිසා මනසට අවශ්‍ය නිදහස ලබාදෙන වැඩක් වගේම ​දොඩම් ගෙඩියක් ලෙලි ගැහීම පවා අපි කරන සාමාන්‍ය වැඩ ක්‍රමයට වඩා වෙනස් අත් හැසිරවීමක් නිසා මේ දොඩම් කන වැඩෙන් අපිට ලොකු සහනයක් ලැබීම නවත්වන්න බෑ. ඉතිං කෙටි පළතුරක් ලඟ තබා ගැනීම සෞඛ්‍යටත් සුවදායී, මනසටත් වැඩ දායී, රැකියාවටත් පළදායී විකල්පයක් වේවි කියලා අපිට අනිවාර්යයෙන්ම හිතන්න පුළුවන්.

The post එකදිගට වැඩ කරලා මහන්සිද? මේ දේවල් 7 කරලා බලන්න appeared first on Lady.lk | Lady | Women | Lifestyle | Health | Beauty.

වෛද්‍යතුමනි, අපගේ හැඳින්වීමේදී අප ඉහතින් සඳහන් කළ ආකාරයේ ප්‍රශ්නකාරී තත්ත්වයට මූලික හේතුව කුමක්‌ද?

වෛද්‍ය විද්‍යාවේ ඒවාට හේතුව විදියට පෙන්වා දෙන්නේ එකම මානසික තත්ත්වයක්‌. එනම් Obsessive compulsive Disorder (OCD) යනුවෙන් හඳුන්වනු ලබන තත්ත්වයයි. මේ හැමෝටම තිබෙන මූලික ප්‍රශ්නය වන්නේ එකම රටාවක චින්තනය සහ හැසිරීම නිසා අවස්‌ථාව අනුව වෙනස්‌ වීමට ඇති නොහැකියාවයි.

ඒ කියන්නේ නම්‍යශීලී නැතිකමත් නිතර අත සේදීමත් එකම හේතුව බවද ඔබ පවසන්නේ?

ඔව්. එකම හේතුව නිසයි. නැවෙන්න බැරි චින්තන ක්‍රියාකලාපය නිසා තමන් හුරු වී සිටින විදිය වෙනස්‌ කර ගැනීමට නොහැකි නිසා. මේ තත්ත්වය වෛද්‍ය විද්‍යාවේ හඳුන්වනු ලබන්නේ Anankastic personality යනුවෙන්. ඔබ කීවා සේ කතා ව්‍යවහාරයේ හරියට ඇණයක්‌ වගේ. ඒ වගේම සර්ව සම්පූර්ණත්වය සොයන පුද්ගලයින්ට තිබෙන ප්‍රශ්නයත් ඒ වගෙයි. ඔවුන්ට තමා සොයන සර්ව සම්පූර්ණත්වය නැති තැන චිත්ත පීඩනයකට පත් වෙනවා. තරහ යනවා. එවැනි පුද්ගලයින් තම ගෙදර කඩදාසියක්‌ වැටී තිබෙනවා දුටුවොත් තරහින් පුපුරන්නේ ඒ නිසයි. මෙම තත්ත්වය රෝගයක්‌ බවට පත් වන විට මොවුන්ට එකම සිතිවිලි ඇති වෙනවා. එකම හැසිරීම් ඇති වෙනවා. ඒවායින් ගැලවිය නොහැකි තත්ත්වයට පත් වෙනවා.

තව ටිකක්‌ පැහැදිලි කළොත්?

උදාහරණයක්‌ විදියට හිතන්න පුලුවන් ඔවුන් පන්සලේ පල්ලියේ, බුදුන්ට දෙවියන් වහන්සේට විරුද්ධව කෑ ගසයි. කියා සිතිවිල්ලක්‌ ඇති විය හැකියි. එසේ නැතිනම් තම පරිසරයේ යම් විෂබීජයක්‌ එසේත් නැතිනම් බල්ලෙක්‌ අසූචි දමා ඇතැයි වැනි දෙයක්‌ සිතන්න පුළුවන්. එසේත් නැතිනම් තමන්ගේ සිරුරේ යම් රසායනයක්‌ ගෑවෙයි කියා සිතන්න පුලුවනි. ඔවුන් කරන්නේ ඊට අදාළ හැසිරීම්. එනම් පන්සලට පල්ලියට යන්නේ නැහැ. එසේත් නැතිනම් නිතර ගෙදර සෝදනවා. අත සෝදනවා. එසේත් නැතිනම් නිතර යමක්‌ පරීක්‌ෂා කර බලනවා. සමහරු නිදා ගැනීමට පෙර නැවත නැවත තම ඇඳ යට පවා පරීක්‌ෂා කරනවා. දොරවල් වසා ඇත්දැයි නැවත නැවත පරීක්‌ෂා කරනවා. ඇඳුම් පරීක්‌ෂා කරනවා. මෙවැනි ගැලවිය නොහැකි සිතිවිලි සහ හැසිරීම් දහස්‌ ගණනක්‌ වුණත් ඔවුන් අතර තිබිය හැකියි.

මේ රෝගය හැදෙන්නේ කුමන වයසේදීද?

මේ රෝගය හැදෙන්නේ වයස අවුරුදු 18 සිට 25 දක්‌වා වයසේදීයි. වයසට ගොස්‌ හැදෙනවා නම් එය වෙන රෝගයක පූර්ව ලක්‌ෂණයක්‌ පමණක්‌ විය හැකියි. උදාහරණයක්‌ වශයෙන් මානසික අවපීඩනය හැදෙන පූර්ව ලක්‌ෂණයක්‌ විදියට මේ රෝගය හැදෙන්නෙත්. ඒ වගේම භින්නෝන්මාදය රෝගයේ පූර්ව ලක්‌ෂණයක්‌ ලෙස හැදිය හැකියි.

කුඩා ළමයින්ට හැදෙනවා කියා අපි අහල තිබෙනවා එය ඇත්තක්‌ද?

ඔව්. අවුරුදු 5-14 දක්‌වා ළමයින්ටත් හැදෙන්න පුලුවන්. නිතර යමක්‌ කරලා පරීක්‌ෂා කිරීම, ලියන පොත්වල වැරැද්දක්‌ සිදු වූ විට නිතර කටු ගෑම, කොළ ගලවා දැමීම මෙවැනි ළමයින් කරනවා. ඒ වගේම මේ ළමයින් කරන සෑම දෙයක්‌ම ඉතා සෙමින් කරන්නත් පෙළඹෙනවා. එනම් වැසිකිළි යැම පොතක වැඩක්‌ කිරීම, ගණන් හැදීම ඉතා සෙමින් කරන්නේ.

මේ රෝගය නිසා ඇති බලපෑම් මොනවාද?

ඔබටම තේරෙනවා ඇති. මෙවැනි ලක්‌ෂණ තිබෙන විට සාමාන්‍ය ජීවිතයක්‌ ගෙවීම අසීරු කාර්යයක්‌ බව. සාමාන්‍ය ජීවිතයක්‌ ගත කිරීමට අසීරුයි. මේ තත්ත්වය නිසා තම ඉගෙනීම රැකියාව මිතුරු සම්බන්ධකම් මේ සියල්ල පවත්වාගෙන යැම අසීරු වෙනවා.

මේ රෝගය හැදෙන්නේ කොහොමද?

ජාන නිසා කියා පැහැදිලිවම කියන්න පුලුවන්. පියාට හෝ මවට මේ රෝගය තිබෙනවා නම්, මෙය ළමයින්ට හැදෙන ඉඩකඩ වැඩියි. ඒ වගේම මෙම ජානය ජනගහනය තුළ පැතිරී ඇති ජානයක්‌. එම ජානය නිසා ඉතා හොඳ පෞරුෂ ගති ගුණත් ඇති වෙනවා. පිළිවෙළට වැඩ කිරීම, යහපත් ගති ගුණ ඇති වීම වගේම කාර්යක්‌ෂම පුද්ගලයෝ බිහි වෙන්නත් මෙම ජානය උදව් කරනවා. නමුත් මෙම ජානය වැඩියෙන් බලපාන අයට අර ඉහත කී විදියේ anankastic personalityහෝ OCD කියන රෝගය ඇති වෙනවා.

මෙය මානසික රෝගයක්‌ද? එසේත් නැතිනම් ස්‌නායු රෝගයක්‌ද?

දැන් ඔය කියන විදියේ මානසික රෝග සහ ස්‌නායු රෝග යෑයි වෙන් කිරීමට අසීරු තත්ත්වයක්‌ තිබෙන්නේ. එයට හේතුව වන්නේ වෛද්‍ය විද්‍යාව අද දියුණු නිසා, එදා මානසික රෝග යෑයි කී රෝග පැහැදිලිවම මොළයේ ආබාධ බව පෙන්වා තිබෙනවා. ඒ වගේම එදා ස්‌නායු රෝග යෑයි කී රෝග මානසික රෝග ලක්‌ෂණ පෙන්වා දී තිබෙනවා. උදාහරණයක්‌ වශයෙන් පාකින්සන් නම් ස්‌නායු රෝගය ඇති අයට මානසික අවපීඩනය, ඩිමෙන්ෂියාව වැනි රෝග ඇති වන බව පෙන්වා දී තිබෙනවා. OCD රෝගය තිබෙන අයගේද එවැනි ස්‌නායු රෝග ලක්‌ෂණ තිබෙනවා. එනම් මේ රෝග තිබෙන අයගේ මොළයේ පූර්ව මස්‌තිෂ්කයේ සිට basal ganglia නමින් හඳුන්වනු ලබන කොටස දක්‌වා ඇති ස්‌නායු ඉමබාකැ ක්‍රියාකාරිත්වය වැඩියි.

මෙය හොඳ කිරීමට පුළුවන් රෝගයක්‌ද?

ඔව්. ප්‍රතිකාර මඟින් එක්‌කෝ හොඳ කළ හැකියි. එසේත් නැතිනම් රෝගය පාලනය කොට සාමාන්‍ය ජීවිතයක්‌ ලබා දිය හැකියි.

ප්‍රතිකාර වර්ග මොනවාද?

පළමුවෙන්ම ඖෂධ ප්‍රතිකාර තිබෙනවා. එමඟින් රෝගය මර්දනය කළ හැකියි. අපි ඖෂධ වලින් කරන්නේ මා ඉහත කී ස්‌නායු bundle අධි ක්‍රියාකාරකම අඩු කිරීමටයි. ඒ වගේම විෂාදය වැනි තත්ත්වයන්ට ප්‍රතිකාර කිරීමයි.

මේ සඳහා චර්යා ප්‍රතිකාරත් තිබෙනවාද?

ඔව්. ඖෂධ ප්‍රතිකාර වගේම චර්යා ප්‍රතිකාරත් වැදගත්. හේතුව චර්යා ප්‍රතිකාර මඟින් දීර්ඝ කාලීනව වෙනසක්‌ ඇති කර ගත හැකියි. චර්යා ප්‍රතිකාර මඟින් අර නැවත නැවත ඇති වන හැසිරීම් සිතිවිලි පාලනය කිරීමට උගන්වන්න පුලුවනි. ඒ වගේම මෙවැනි රෝගියෙක්‌ සමඟ වැඩ කරන ආකාරය පවුලේ අයටත් පුහුණු කළ යුතුයි. එසේ නැතිනම් පවුලේ අය මෙම රෝගියාගේ හැසිරීම් වලට පොහොර දමන විදියට ක්‍රියා කළොත් වන්නේ තව ප්‍රශ්නය දිග්ගැස්‌සීමයි. උදාහරණයක්‌ වශයෙන් මෙවැන්නෝ නිතර එකම දේ පවුලේ අයගෙන් අහනවා. ඒවාට පිළිතුරු දෙන්න දෙන්න ප්‍රශ්න ඇසිSම වැඩි වෙනවා. එම නිසා කළ යුත්තේ පිළිතුරු නොදී සිටීමයි. එවිට ප්‍රශ්න කිරීම් අඩු වෙනවා.

සමාජයට දෙන පණිවිඩය කුමක්‌ද?

මෙවැනි ප්‍රශ්න සාමාජය තුළ නිතර දකින ප්‍රශ්නයි. ඒවා ඔබ පවුලේ කෙනෙකුට තිබුණි නම් ප්‍රතිකාර ලබා ගන්න මැළි වෙන්න එපා. ඔබට හෝ ඔබ පවුලේ කෙනෙකුට මෙවැනි ලක්‌ෂණ තිබෙනවා නම් ප්‍රතිකාර ගන්න මැළි වෙන්න එපා.

විශේෂඥ මනෝ වෛද්‍ය
රනිල් අබේසිංහ

The post තැනට සුදුසු ලෙස හැසිරෙන්න බැරිකමත් මානසික රෝගයක් appeared first on Lady.lk | Lady | Women | Lifestyle | Health | Beauty.

මෙහිදී හදවතට දැනෙන හැඟීම් මෙන්ම ඒ ආශි‍්‍රත සිතුවිලි මෙන්ම චර්යාවන් යන කොටස් තුනකින් සමත් වීම සංකීර්ණ ක්‍රියාවක් ලෙස මේ, පිළිබඳව පැහැදිලි කළ හැකියි. මානව පරිනාමයත් සමඟ අපට යම් තර්ජනයක් එල්ල වනවිට මෙම ප්‍රතික්‍රියාව ස්වභාවිකවම එල්ල වනවිට මෙම ප්‍රතික්‍රියාව ස්වභාවිකවම ඇතිවිය යුත්තකි. නමුත් මේ වනවිට ගැටලුව බවට පත්ව ඇත්තේ කුඩා දරුවාගේ සිට මහල්ලා දක්වා කෝපය යන්න ප්‍රධාන ගැටලුවක් බවට පත් වී තිබීමයි.

මොළයට යම් මිනුම් දණ්ඩක් තිබේද?

කෝපය ඇතිවීම සාමාන්‍යයයි. නමුත් කෝපය ප්‍රකාශ කරන විට පරිස්සම් විය යුතු වේ. සාමාන්‍යයෙන් පුද්ගලයෙකු කෝප ගත යුතු හේතු මොනවාදැයි විමසා බලමු.

තමාට ඇතිවන යම් ලැජ්ජාවක් එසේත් නොමැති නම් තමා බලාපොරොත්තු වන ආකාරයට අන් අය හැසිරුනේ නොමැති නම් තමා පි‍්‍රය කරන දෙයක් අන් අය නොකර සිටීමෙන් ද කෝපය ඇතිවිය හැකියි. පරිපූර්ණත්වය සහ තමා විසින් ඇති කර ගන්නා යම් රටාවකකට අනුගතව අන් අය විසින් ඒ රටාවට අනුව නොහැසිරීම පුද්ගලයා කෝප ගැන්වීමට හේතු වේ. මෙය ඉතාමත් බහුලව දකින සංසිද්ධියකි. මෙහිදී අදාළ තැනැත්තා අන් අයව දැඩිව තමාගේ රටාවට අනුගත කරවා ගැනීමට උත්සාහ ගනු ලැබේ. නමුත් ඔවුන් ඊට අනුගත නොවන විට දැඩි සේ කෝප ඇති කරගත හැකියි.

අනිත් අයට තරහා ඇති නොවන නමුත් යම් අයෙකුට ඉන් එහාට ගිය තරහාවක් ඇතිවිය හැකිද?

මෙම ගැටලුවේදී ඉතා අධික තරහක් ඇති වන අය අවාසනනාවට තමාට අධික තරහක් ඇති වනවා යන්න පිළිබඳව පැහැදිලි අවබෝධයක් ඇත්තේ නැහැ. එසේ අධිකව තරහා ගන්නා තැනැත්තා නිතරම තමා නිවැරදි යැයි යන්න පමණක්ම විශ්වාස කරනු ලැබේ. ඒ වගේම ඇතැම් අය තමාට කේන්තියක් ඇති බවත් එය තමාට පාලනය කිරීම ඉතාමත් අපහසු වන බවත් වෛද්‍යවරුන් සමඟ පවසන අවස්ථා එමටයි. එමෙන්ම එසේ ඔවුන් තරහා ගැනීමෙන් පසුව තමා එසේ තරහා ගැනීම පිළිබඳව අතිශයින් කණගාටුවට පත්වන බවද බොහෝවිට දැකගත හැකි වේ.

තරහා අධිකව ගනු ලබන තැනැත්තාගේ මානසික පසුබිම පිළිබඳ පසු විපරමක් සිදු කරනවාද?

ඇත්තෙන්ම මේ සඳහා මානසික වෛද්‍යවරයෙක් අදාළ රෝගී පුද්ගලයාගේ පසුබිම පිළිබඳ විමසා බැලීමක් සිදුකළ යුතු වේ. මෙය විවිධ අයට විවිධ ලෙසින් බලපෑම් ඇති කරනු ලැබේ. ඒ නිසා විවිධ පුද්ගලයාට කෝපය ඇති වීමට බලපාන මූලික හේතුව හඳුනා ගැනීමක් සිදු කළ යුතු වේ.

සැකය පිළිබඳ කථාබහ කරන විට එය සමාජය තුළ ඉහළ මට්ටමේ බලපෑමක් ඇති කරන මාතෘකාවක් බවට පත් වී අවසන්. ප්‍රධාන වශයෙන් ගෘහ ජීවිතය තුළ සැමියා බිරිඳ අතර ඇතිවන ගැටලුවලදී මෙන්ම අවම වශයෙන් පෙම්වතා පෙම්වතිය අතරේ ඇතිවන ගැටුම්වලට පවා මෙම සැකය යන කරුණ ප්‍රබල හේතුවක් බවට පත් වී තිබේ.

මෙය බරපතළ සමාජ ගැටලුවක් බවට පත්වෙලාද?

මෙම සැකය නැමැති බරපතළ ගැටලුව නිසා ඇතිවන තරහව නිසා ඇතැම් අය තමාටම හානි කර ගන්නා අවස්ථාවන්ට උදාහරණ සමාජය තුළ අපට දැක ගැනීමට හැකි වේ. ඒ වගේම සැමවිටම සමාජය සහ පුද්ගලයා පිළිබඳ කථාබහ කරන විට මූලික වශයෙන් මෙහිදී වැරදි නිවැරදි කර ගැනීමට අවධානයක් ලබාදිය යුත්තේ අදාළ පුද්ගලයාමයි. සමාජයට චෝදනා ඉදිරිපත් කිරීමට පෙර තමා විසින් තමාවම හික්මවා ගැනීම අනිවාර්යෙන්ම සිදු කළ යුතුවේ. එසේ නොමැතිව තමා නිවැරදි යැයි සිතා සමාජයට චෝදනා කිරීම ඵල රහිත ක්‍රියාවකි. මේ බව බෞද්ධ ආගමික දර්ශනය තුළ පවා සැහැදිලිව සඳහන් කරන බව ඉතාමත් පැහැදිලිව දැකගත හැකි කරුණක්. ඒ නිසා පරිසරය, එසේත් නැත්නම් සමාජය කුමන ආකාරයකින් ඔබට ප්‍රතිචාර දැක්වුවත් කෝප නොගෙන සිටීමට ඔබට හැකියාවක් තිබිය යුතුයි. නමුත් මෙහිදී පාරිසරික සාධක නොසලකා හැරිමක් සිදු නොවන බව අනිවාර්යෙන්ම සඳහන් කළ යුතු අතර ඒ පිළිබඳව ද අවධානය යොමු කළ යුතු වේ. නමුත් ඒ සෑම කරුණකටම වඩා තමා විසින් තමාවම හික්මවා ගැනීම වඩාත් වැදගත් වන බව මතක තබාගත යුතු වැදගත් කාරණයකි. මේ හරහා කෝපය ඇතුළු වෙනත් විනාශකාරී මනෝ භාවයන් ජය ගැනීමට හැකියාව ලැබේ.

කුඩා කාලයේදී දරුවෙකු ලබන අත්දැකීම්, ඔවුන්ගේ ඉදිරි ජීවිතය ප්‍රකෝපකාරී පුද්ගලයෙකු බවට පත් කිරීමට බලපෑ හැකිද?

මාධ්‍ය , සිනමාව, කලාව මඟින් කාමය භීතිය සංත්‍රාසය ප්‍රචණ්ඩත්වය ලොව වැඩිපුරම අලෙවිකරණයට ලක් වූ තේමාවන් වේ. ප්‍රචණ්ඩත්වය සහ කෝපය අතර ප්‍රබල සබඳතාවක් තිබන අතර එම සංසිද්ධි මුල් කරගත් සිදුවීම් සමාජය තුළ බහුලව දැකගත හැකි වේ. මෙම තේමාවන් මුල් කරගෙන සිනමාව බිහිවීම ද කලා නිර්මාණ ද සමාජය තුළ ඕනෑතරම් බිහිවුණත් එසේ නොවන ත්‍රාසය භිතිය, කැටිකර ගත් නිර්මාණ මඟින් ප්‍රධාන වශයෙන් බලපෑම් ඇති කරනු ලබන්නේ කුඩා දරුවන්ගේ මානසික මට්ටමය. මෙම දරුවන් මෙම රූපරාමු නැරඹීමෙන් පසුව එය ඔවුන්ගේ ජීවන රටාවේ කොටසක් බවට පරිවර්තනය වේ. ඒ වගේම එය අතිශය සාමාන්‍යකරණයට ලක් වූ දෙයක් වීමද බරපතළ ගැටලුවකි.

කෝපය පිළිබඳ පැහැදිලි කරනවා නම් එය ඇතිවන්නේ තරංගමය ආකාරයටය. එය එක්වරම තරංගයක් උස්ව නැඟී පැමිණේ. එසේ පැමිණෙන අවස්ථාවකදී එය යම් පාලනයකට තමාටම ලක් කළ හැකි නම් එය පාලනය ඉතාමත් වැදගත් වේ.

ඒ වගේම අපගේ මනස වියරුවට ඉතාමත් නැඹුරු බවක් දක්වයි. පුද්ගලයාගේ මනස කාමයට සහ ප්‍රචණ්ඩත්වය තුළ සැඟවී පවතිනු ලැබේ. පුද්ගලයා මෙම කරුණු දෙක සඳහා විශාල නැඹුරුවක් ස්වභාවිකවම හිමිකර ගෙන තිබේ. ඇතැම්විට මත්ද්‍රව්‍ය මඟින් මෙම වියරුව උත්දීපනය වනු ලැබේ. මේ මඟින් කෝපය, කාමය, මුදාහරිනු ලැබේ. මේ නිසා මත්ද්‍රව්‍ය හරහා ඉතාමත් බරපතළ මානසික තත්ත්වයන් මුදාහරිනු ලැබේ.

ඇතැම් අය තමාගේ තරහට ඊට කිසිදු සම්බන්ධයක් නැති අය පටලවා ගනු ලබන්නේද?

මෙහිදී තරහට මුල්වන හේතුව පසෙක තිබියදී වෙන අයෙක් හරහා තරහව පිට කිරීම මෙහිදී සිදුවේ. ඇතැම්විට අදළ පුද්ගලයාවත් තමා කෝප වීමට හේතුව පිළිබඳ දැනුමක් නොතිබිය හැකියි. මෙය ඕනෑම අවස්ථාවක ඕනෑම අයෙකුට මුහුණ දීමට සිදුවන තත්ත්වයි. මෙහිදී ඔබ ඔබටම විශ්ලේෂණය කළ යුතුයි. යම් සිදුවීමක් නිසා ඔබට ඇතිවන අසහනකාරී බවද කෝපය ලෙසින් ද පිටතට පැමිණීමට බොහෝවිට හැකියි

මේ සඳහා අප කුමක් කළ යුතුද?

කෝප ගැනීම ප්‍රබල ගැටලුවක් බව මූලිකවම තේරුම් ගත යුතුය. තමාටම තමාගේ කෝපය පාලනය කර ගැනීමක් කළ හැකියි. කෝපය ඇතිවන වේලාවේම එය හඳුනා ගැනීමට හැකි නම් අදාළ ස්ථානයෙන් ඉවත් වී සිටීමට හැකි නම් ඉතා වැදගත්. තවද සමාව දීම මඟින් තරහව පාලනය කළ හැකියි.

උපුටාගැනීමකි

The post තරහ යනු කුමක්ද එහි කායික විද්‍යාත්මක සංසිද්ධිය කුමක්ද? appeared first on Lady.lk | Lady | Women | Lifestyle | Health | Beauty.