Down syndrome තත්ත්වය ඇති වන්නේ කොහොම ද

ඔබ දන්නවා ඇති අපගේ මව්පියන්, මී මුත්තන් සතු ලක්ෂණ අපිට පාරම්පරිකව උරුම වෙන්නේ ජාන, එහෙමත් නැත්තන් වර්ණ දේහ හරහා බව. අපේ සිරුරේ ඇති සෑම සෛලයකම මේ වගේ වර්ණ දේහ යුගල 23ක් බැගින් අඩංගු වෙනවා. ඒ කියන්නේ මව් පාර්ශවයෙන් වර්ණ දේහ 23ක් සහ පිය පාර්ශවයෙන් ලැබෙන වර්ණ දේහ 23 බැගින් වර්ණ දේහ 46ක්. මේ යුගල 23 අතර තියෙන 21 වන chromosome එකේ වර්ණ දේහ 2ක් වෙනුවට 3ක් පිහිටන අසාමාන්‍ය බවේදී down syndrome තත්ත්වය සහිත දරුවන් උපත ලබනවා. ඒ කියන්නේ සෑම සෛලයකම වර්ණදේහ 46ක් වෙනුවට 47ක් පිහිටලා තියෙනවා. ඉතින් මේක රෝගයක් ද? ඇත්තටම නැහැ. මෙය යම් අසාමාන්‍ය තත්ත්වයක් විතරයි.

අනෙක් විශේෂ ම කාරණය තමයි down syndrome කියන නම හැදුණු ආකාරය. කලාතුරකින් දරුවෙක් තුළ පිහිටන මේ අසාමාන්‍ය බව සම්බන්ධව වැඩිදුර පර්‍යේෂණ කරපු John Langdon Haydon Down නම් බ්‍රිතාන්‍ය ජාතික වෛද්‍යවරයා සිහිගැන්වීම සඳහා තමයි මෙය “Down syndrome” නමින් නම් කරලා තියෙන්නේ. ඉතින් මීටපස්සේ Down syndrome කියලා කියන්නේ කිසියම් අඩුපාඩුවක් හන්දා යෙදුණු නමක් හිතන්න නම් එපා කියලාත් අපි මතක්කරන්න කැමතියි.

සාධක මොනව ද

Down syndrome තත්ත්වය සහිත දරුවන්ගේ දෙමව්පියන් ඇතුළු පවුලේ අනෙක් සාමාජිකයින් සාමාන්‍ය ජාන සහිත පුද්ගලයින් බව ඔබ දැක ඇති. ඉතින් මේ අසාමාන්‍ය බවට හරියටම බලපාන්නේ කුමන කාරණයද කියලා අපිට ටක්කෙටම තීරණය කරන්න නම් අපහසුයි. මවගෙන් හෝ පියාගෙන් ලැබුන වර්ණදේහයක බලපෑම නිසා මේ දේ සිදුවෙනවා කියන කාරණය තමයි සාමාන්‍යෙ පිළිගැනීම වෙන්නේ. Down syndrome තත්ත්වය සහිත දරුවන්ගෙන් 80% මව ගැබ් ගෙන ඇත්තේ වයස අවුරුදු 35න් පසුව බව හෙළිවී ඇති නිසා මව ගැබ් ගත් වයසත් මෙවැනි තත්ත්වයක් ඇති වීමට බලපාන්න පුළුවන් කියලා විශ්වාස කරනවා.

දරු උපතට කලින් හඳුනාගන්න පුළුවන් ද

ඔව්. දරු උපතට කලින් ගැබිනි සමයේදීම (මුල් සති 10-13) මෙම තත්ත්වය හඳුනා ගැනීම සඳහා නවීන පරීක්ෂණ තියෙනවා. ඒ වගේම තමයි, දරු උපතින් පසුවත් ශරීර ලක්ෂණ අනුව සහ රුධිර පරික්ෂාවක් මඟින් (chromosomal karyotype) හඳුනාගන්නටත් හැකියාව තියෙනවා.

ලක්ෂණ මොනවා ද

බාහිර පෙනුම සහ බුද්ධි මට්ටම සංවර්ධනයේ ඇති පසුගාමී බව තමයි මේ තත්ත්වයේ ප්‍රධානම ලක්ෂණය වෙන්නේ. හැබැයි මානසික සහ කායික පෙනුම සංවර්ධන ඌණතාවයත් සෑම පුද්ගලයාටම එක සමාන මට්ටමින් බලපාන්නේ නැහැ. Down syndrome ලක්ෂණ පෙන්වුවත් එක් එක් දරුවාගේ සංවර්ධනයට එය බලපාන ආකාරය අඩු වැඩි වශයෙන් වෙනස් වන්නට ඉඩ තියෙනවා.

මේ අතර,

කුඩා සහ පහතට ඇල වුණු බාහිර කන්, පැතලි නාසය සහ හිස, උඩු අතට ඇල වුණු කුඩා දෑස්, පිටිපසින් වැඩිපුර නිරාවරණය වූ සහ කෙටි, පළල් වූ ගෙල, පටු තල්ල, නිතරම මුඛය විවෘතව දිව පිටතට පැමිණීම, පෙකණිය ආශ්‍රිත හර්නියා තත්ත්වය හට ගැනීම,මහපට ඇඟිල්ල අනෙක් ඇඟිලිවලින් මඳක් ඈත්ව පැවතීම සහ ඇඟිලි අගින් මදක් වක් වීම, අසාමාන්‍ය ලෙස පිහිටන දත්, වචන උච්ඡාරනයේ අපහසුත, නිසියාකාරව පිහිටා නොමැති වෘෂණ කෝෂ, මාංශ පේෂීන් තරමක් අප්‍රාණික වීම වගේ ලක්ෂණ දකින්නට ලැබෙනවා. ඊට අමතරව හෘද රෝග, අක්ෂි රෝග, ස්වසන පද්ධතිය ආශ්‍රිත රෝග, තයිරොක්සීන් ඌණතාවය, ආහාර ජීර්ණය ආශ්‍රිත රෝග සහ ශ්‍රවනාබාධ වගේ රෝගී තත්ත්වයන් හටගැනීමේ අවදානමකුත් තියෙනවා.

සුව කළ හැකි ද

බැහැ. මෙය සුව කරන්න පුළුවන් තත්ත්වයක් නම් නෙවෙයි. මෙවැනි දරුවන් ආදරයෙන් රැක බලාගෙන සමාජානුයෝජනය කිරීම තමයි අපෙන් ඉටුවිය යුතු ජාතික වගකීම වෙන්නේ. රෝගාබාධ වලට නිසි ප්‍රතිකාර සැපයීම, විශේෂ අධ්‍යාපනය ලබාදීම සහ මානසික සංවර්ධනය ඇති කිරීම, ගැළපෙන ජීවනෝපාය මාර්ගයන්ට හුරු කරවීම, පවුලෙන් සහ සමාජයෙන් කොන් වීම වළකා ආරක්ෂාව සැපයීම සහ මෙවැනි තත්ත්වයන් පිළිබඳව නිවැරදිව සමාජය දැනුවත් කිරීමට ක්‍රියා කරනවා down syndrome තත්ත්වයෙන් පෙළෙන දරුවන්ගේ හෙට දිනය වඩාත් සහනදායි වෙයි කියලා අපි විශ්වාස කරනවා.

Down syndrome තත්ත්වය ගැන කතා බහ කෙරෙන සුන්දර සිනමා පට කිහිපයක නම් අපි පහතින් සඳහන් කරනවා.

24 weeks (2016), The Importance of Tying Your Own Shoe (2011), Garduating Peter (2001), Mimi (2021/ හින්දි)

Down syndrome තත්ත්වය සහිතව උපත ලබා පසුව විවිධ ක්ෂේත්‍රවලින් ලෝක ප්‍රකට වූ පුද්ගලයින් කිහිප දෙනෙක් ගැන පහත සඳහන් wikipedia පිටුවේ සඳහන් වනවා.

tps://www.google.com/search?q=famouse+persons+with+down+syndrome&oq=famouse+persons+with+down+syndrome&aqs=chrome..69i57j0i10i13i30j0i390l3.13849j0j4&client=ms-android-xiaomi-rvo3&sourceid=chrome-mobile&ie=UTF-8

The post Down syndrome තත්ත්වය ගැන දැනුවත් වෙමු appeared first on Lady.lk | Lady | Women | Lifestyle | Health | Beauty.

Autism කියන්නේ මොකක් ද

1943 දි, Leo Kanner කියන යුක්‍රේනියානු- ඇමෙරිකානු ජාතික වෛද්‍යවරයා විසින් තමයි autism ගැන මුලින්ම සවිස්තරාත්මක අධ්‍යනයක් සිදු කරනු ලැබුවේ. සෙමින් මනස වැඩෙන දරුවන් කිහිපදෙනෙක් සම්බන්ධයෙන් තමන් සිදු කළ අධ්‍යනයක් ඇසුරින් ඔහු සොයාගෙන තියෙනවා මේ දරුවන් කිහිප දෙනා තුළම සමාන සහ යම් සුවිශේෂී ලක්ෂණ කිහිපයක් දකින්නට ලැබෙන විත්තිය. ඒ අනුව ඔහු මෙය හඳුන්වනවා, මොළයේ ස්නායු වර්ධනයේ ඇති ගැටළුකාරී තත්ත්වයක් නිසා හටගන්නා සමාජ සබඳතා, සන්නිවේදන කුසලතා සහ හැසිරීම් රටාවෙ ඇති යම් පසුබැස්මක් විදියට. හැබැයි, හොඳින් මතක තියාගන්න, මේක කිසිසේත්ම මානසික රෝගයක් නම් නෙවෙයි. 

ඇයි මේ වගේ තත්ත්වයක් ඇත්වෙන්නේ

Autism තත්ත්වයට දරුවෙක් පත් වෙන්නේ ඇයි කියලා හරියටම හේතුවක් කියන්න නම් අපහසුයි. හැබැයි පහතින් දක්වා තියෙන හේතු යම් තරමකට බලපාන්න පුළුවන් කියලා වෛද්‍යවරු සඳහන් කරලා තියෙනවා.

පවුලේ autistic සාමාජිකයෙක් සිටීම, ජානමය බලපෑම්, මව්පියන් වයසින් වැඩි පුද්ගලයින් වීම, අඩු උපත් බර, metabolic imbalances, ගැබිනි සමයේදී මවට ඇතිවන යම් යම් රෝග තත්ත්ව සහ ලබාගන්නා ඖෂධ, ගැබිනි සමයේදී මව විශ සහිත පාරිසරික තත්ත්වයන්ට මුහුණ පෑම වගේ කරුණු මේ අතර වනවා. ඊට අමතරව දරුවා කුඩා වියේදී වැඩි වශයෙන් digital screen වෙත නැඹුරු වීම, වැඩිහිටියන්ගේ අවධානය හිඟවීම සහ දරුවා හුදෙකලා වීමත් මීට බලපාන්න පුළුවන් කියලයි වෛද්‍යවරුන්ගේ අදහස වෙන්නේ.

හඳුනාගන්න පුළුවන් කොයි කාලෙ ද

සාමාන්‍යෙන් දරුවා ඉපදී පළමු වසර තුන තුළ autism ලක්ෂණ පෙන්වන්න පටන් ගත්තත් මව්පියන්ගේ නොදැනුවත් බව නිසා රෝගය හඳුනා ගැනීම කල් යන්න ඉඩ තියෙනවා. දරුවාගේ සෞඛ්‍ය කාර්‍ය සටහනේ (clinic card) ඇති කරුණු හොඳින් කියවා අවබෝධ කරගෙන දරුවාගේ milestones එහි සටහන් කිරීම සහ නියමිත දිනට වෛද්‍යවරයාට/ midwife ට පෙන්වා උපදෙස් ලබාගැනීම අත්‍යවශ්‍ය වන්නේ මේ හේතුව නිසයි. හැකිතාක් කලින් autism තත්ත්වය හඳුනා ගැනීමත්, ප්‍රතිකාර වෙත යොමු වීමත් තුළින් යහපත් ප්‍රතිඵල ලබාගන්න පුළුවන් බවත් අමතක කරන්න එපා.

ලක්ෂණ මොනවා ද

දරුවා පෙන්වන යම් යම් අසාමාන්‍ය තත්ත්වයන් නිරීක්ෂණය කරලා දරුවාගේ ගැටළුව කුමක්ද කියලා නිවැරදිවම තීරණය කිරීමේ සහ ප්‍රතිකාර නියම කිරීමේ හැකියාව තියෙන්නේ සුදුසුකම් සහිත පළපුරුදු වෛද්‍යවරයෙක්ට පමණයි. ඉතින් දරුවා තුළින් කිසියම් අසාමාන්‍ය ලක්ෂණයක් දුටු වහාම ඔබ සිදු කළ යුත්තේ අනවශ්‍ය විදියට කලබල නොවී, කල් නොහැර එවැනි වෛද්‍යවරයෙක් වෙතට දරුවාව යොමු කිරීමයි. සාමාන්‍යෙන් autistic දරුවෙක් තුළ පහත සඳහන් ලක්ෂණවලින් කිහිපයක් හෝ සියල්ලම දිස්වන්නට ඉඩ තියෙන බවයි සඳහන් වෙන්නේ.

සීමිත පරාසයක් තුළ, එකම දේ නැවත නැවතත් සිදුකිරීම (Repetitive behaviour).

තම චර්යා රටාව (Same routine) වෙනස් කිරීමට ඇති දැඩි අකමැත්ත.

සීමිත ක්‍රියා කිහිපයක්, සීමිත සෙල්ලම් බඩු හෝ ද්‍රව්‍යන් කිහිපයක් කෙරෙහි ඇති අසාමාන්‍ය කැමැත්ත (Obsessions)

පරිසර සංවේදන වලට අසීමිත ඇල්මක් දැක්වීම හෝ අසාමාන්‍ය ලෙස ප්‍රතිචාර දැක්වීම. (Sensory issues, hyposensitivity or hypersensitivity to sensory stimulations)

උදාහරණ විදියට එකම ආකාරයේ ආහාරවලට පමණක් ප්‍රිය කිරීම, එකම cartoon වැඩ සටහන පමණක් දිගින් දිගටම නැරඹීම, එකම වාක්‍ය ඛණ්ඩය නොනවත්වා පැවසීම, අධි ක්‍රියාකාරී බව හෝ අසාමාන්‍ය අළස බව, කථන ප්‍රමාදය, කැරකෙන fan හෝ toy car එකක රෝද දිහා නොනවත්වා බලා සිටීම, තමන්ගේ නමට ප්‍රතිචාර නොදැක්වීම, eye contacts නොමැති වීම, පිරිස වැඩි තැනක සිටීමට ඇති දැඩි අකමැත්ත, light bulb switch එක නොනවත්වා on off කිරීමෙන් සතුටු වීම වගේ ක්‍රියාකාරකම් පෙන්වන්න පුළුවන්. හැබැයි අමතක කරන්නෙපා, දරුවාට autism ද, නැත්තන් මෙය අතිශය සාමාන්‍ය හැසිරීමක් ද කියලා තීරණය කරන්න පුළුවන් වෛද්‍යවරයෙක්ට ම පමණයි.

සතුටු වෙන්න හේතුත් තියෙනවා

Autism තත්ත්වය සහිත දරුවන් යම් දෙයකට උනන්දු නම් එය ඉතාමත් කැපවීමෙන් සිදු කරන්නට යොමු වෙන බව කියැවෙනවා. මෙවැනි දරුවෙක් ගණිතය, සංගීතය හෝ එවැනි යම් විෂයයක් කෙරෙහි උනන්දු නම් එහි අති දක්ෂයෙක් වීමට වැඩි ඉඩ කඩක් ඇති බව දැනගැනීම autistic දරුවන්ගේ මව්පියන්ට නව බලාපොරොත්තුවක් ඇතිකරයි කියලා අපි විශ්වාස කරනවා. ඉතින් දරුවාට අනිවාර්‍ය ප්‍රතිකාර සිදුකරන අතරතුරේම ඒ ගැන අවධානය යොමු කිරීමත් ඔහුගේ අනාගත සාර්ථකත්වය සඳහා වැදගත් වෙයි කියලා කියන්න අපි කැමතියි. පහතින් සඳහන් වන web page එකෙන් ඔබට එවැනි ලෝකප්‍රකට දක්ෂයින් ගැන වැඩිදුර විස්තර දැනගන්නට හැකියාව ලැබේවි.

පිළියම් මොනවාද

මේ සඳහා නිශ්චිතම ප්‍රතිකාරයක් නැතත්, දරුවාගේ තත්ත්වයට ගැළපෙන ආකාරයේ ප්‍රතිකාර ලබාදීම සුදුසුකම් සහිත වෛද්‍යවරයෙක්ගේ උපදෙස් මත ම සිදුකළ යුතු ක්‍රමානුකුල කටයුත්තක් වනවා. ඒ අතරට කථන හා භාෂා චිකිත්සාව, අධ්‍යාපන චිකිත්සාව, චර්‍යාමය ප්‍රතිකාර, වෘත්තීය චිකිත්සාව, සංවේදන චිකිත්සාව සහ දරුවාගේ කුසලතා පදනම් කරගත් චිකිත්සක ක්‍රම අයත් වෙනවා. මෙහිදී මව්පියන්ගේ ඉවසීම, කැපවීම, දරුවාට පීඩනයක් එල්ල නොකිරීම, සෑම විටම සෙහෙහසත් අවධානයත් ලබා දීම සහ දරුවා හුදෙකලා නොකිරීම හරහා මේ ප්‍රතිකාර වඩාත් සාර්ථක කරගන්නට අවස්ථාව උදාවෙනවා.

ප්‍රතිකාර ලබා ගන්න පුළුවන් ස්ථාන

ඕනෑම රජයේ රෝහලකින් ඔබට මේ ගැන වැඩි විස්තර ලබාගන්නට හැකියාව ඇති අතර ප්‍රතිකාර සඳහා වන ස්ථාන අතරින් කොළඹ රිජ්වේ ආර්‍යා ළමා රෝහල, රාගම වෛද්‍ය පීඨය, කැලණිය විශ්ව විද්‍යාලයීය වෛද්‍ය පීඨය වගේ ස්ථාන මූලිකත්වය ගන්නවා.

 Autism ගැන කතා කෙරෙන movies කිහිපයක් ගැන මේ ලිපියෙන් දැනගන්න පුළුවන්

The post Autism ගැන දැනුවත් වෙමු ද appeared first on Lady.lk | Lady | Women | Lifestyle | Health | Beauty.

Cosmetics තේරීමේදී සැළකිලිමත් විය යුත්තේ ඇයි

Cosmetics සහ personal care products  නිපදවීම සඳහා යොදාගන්නේ ස්වභාවික අමුද්‍රව්‍ය පමණක් ම නොවන බව ඔබ දන්නවා ඇති. සමහර product ingredients අතර අපේ සමට විෂ සහිත විය හැකි රසායනික ද්‍රව්‍යත් අඩංගු වන්නට ඉඩ තියෙනවා. මේ රසායනික ද්‍රව්‍යවල අහිතකර බලපෑම කෙටිකාලයක් ඇතුළත හෝ ඍජුවම පෙන්නුම් කරන්නේ නැති වෙන්නට පුළුවන්. හැබැයි දීර්ඝ කාලයක් තිස්සේ මෙවැනි ප්‍රමිතියකින් තොර නිෂ්පාදන භාවිතා කිරීම නිසා පසුකාලීනව යම් යම් ගැටළු පැන නගින්නට නම් වැඩි ඉඩක් තියෙනවා. විශේෂයෙන්ම ප්‍රමිතියකින් තොර නිෂ්පාදන වර්ග භාවිතා කිරීම සමේ පිළිකා ඇතිවීමට පවා හේතු වෙන්නට ඉඩ තියෙන බවට කරුණු සොයාගෙන තියෙනවා. ඉතින් මේ හේතුව නිසයි තමන් භාවිතා කරන cosmetics වර්ග ගැන ඔබ හොඳ දැනුවත් බවක් ඇති කරගන්න අවශ්‍ය වෙන්නේ.

Skin type එක වටහාගන්න

විවිධාකාර Cosmetics වර්ග නිපදවීම නිෂ්පාදකයින්ගේ කාර්‍යක් වුවත් ඒවා ආලේප කිරීම සිදු කරනු ලබන්නේ ඔබ විසින්නේ. මේ නිසා වෙනත් අයෙක්ට යහපත් ප්‍රතිඵල ලබා දුන් පමණින් හෝ advertisement එකක් දුටු පමණින් එම නිෂ්පාදනය භාවිතා කිරීමට හදිසි නොවී තමන්ගේ සමට ගැළපෙන නිෂ්පාදන තෝරා ගැනීමට අවධානය යොමුකළ යුතු වෙනවා. වියළි, තෙල් සහිත, මිශ්‍ර, සාමාන්‍ය, සංවේදී යනාදි වශයෙන් සමේ ස්වභාවයන් කිහිපයක් ම තියෙන නිසා තමන්ගේ සමේ ස්වභාවය නිවැරදිව වටහාගෙන ඒ අනුව cosmetics තෝරා ගැනීමට සිහිතබා ගන්න කියලා අපි මුලින්ම සිහිපත් කරනවා.

සමේ ස්වභාවය හැමදාම එකම විදියට තියෙනව ද

කිසිසේත්ම නැහැ. නව යොවුන් වයසෙදි තිබ්බ සම තරුණ වයසට එනකොට වෙනස් වෙනවා. තරුණ වියේදි තිබුණු සම මැදි වියට එද්දි වෙනස් වෙනවා. හෝර්මෝන වෙනස්කම්, සිරුරට ලැබෙන පෝෂණය, බාහිර පරිසරයෙන් සමට සිදුවන බලපෑම් වගේ දේ නිසා තමයි මේ වගේ වෙනස්කම් සිදුවෙන්නේ. ඉතින් මේ විදියට අපේ සමේ ස්වභාවය වෙනස් වෙනකොට ඒ වෙනස්කම් වලට අනුකූලව තමන් භාවිතා කරන cosmetics products ත් වෙනස් කරන්නට සිදුවෙනවා.

උපදෙස් ගන්නේ කාගෙන්ද

සම සම්බන්ධව යම් ගැටළුවක් තියෙනවා නම්, ඒ සඳහා යම් නිෂ්පාදනයක් තෝරාගැනීමට අවශ්‍ය නම්, සමට හිතකර අහිතකර product ingredients ගැන උපදෙස් ලබාගැනීමට අවශ්‍ය නම් ඔබ යා යුත්තේ සුදුසුකම් සහිත dermatologist කෙනෙක් ළඟට මිසක නිෂ්පාදන අලෙවි කරන්නෙක්ගෙන් ළඟට නම් නෙවෙයි. තමන්ගේ ගැටළුව cosmetics seller කෙනෙක් සමඟ සාකච්ඡා කළහොත් ඔබට සිදුවන්නේ ඔවුන් නිර්දේශ කරන කුමක් හෝ නිෂ්පාදනයක් මිලට ගෙන පාවිච්චි කිරීමටයි. ඒ වගේම තමයි, විශ්වාසවන්ත සහ සුදුසුකම් ලත් රූපලාවණ්‍ය ශිල්පිනියකගෙන් පවා නිවැරදිම පිළිතුර නොලැබෙන්නට ඉඩ තියෙන නිසා dermatologist කෙනෙක්ගෙන් උපදෙස් ලබා ගැනීම තමයි හොඳම විසඳුම වෙන්නේ.

Ingredients මොනවද

ප්‍රමිතියකින් තොර සහ සිරුරට හානිකර නිෂ්පාදන බහුලව නිපදවෙන නිසා තමන් මිලට ගන්න cosmetics වල අඩංගු ingredients, additives සහ preservatives මොනවද කියන කාරණය ගැන ඔබ හොඳින් විමසිලිමත් විය යුතු වෙනවා. සමහරවිට මේ දේවලින් එකක් හෝ ඔබේ සමට අහිතකර ප්‍රතික්‍රියා දක්වන්නට ඉඩ තියෙන නිසා තමයි මේ කාරණය සම්බන්ධව වැඩි අවධානයක් යොමු කිරීම අත්‍යවශ්‍ය වෙන්නේ. ඒ විතරක් නෙවෙයි, ඇතැම් නිෂ්පාදකයින් ඔවුන්ගේ product labels වල සඳහන් කරන විස්තර පාරිභෝගිකයා නොමඟ යවනසුළු සහ අසත්‍ය තොරතුරු වීමටත් ඉඩ තියෙනවා. උදාහරණ විදියට ගත්තොත් hypoallergenic, completely natural, no added bleach වගේ terms අඩංගු වුනත් ඒවා 100% සත්‍යයි කියලා හිතන්න නම් අපහසුයි. ඒ වගේම තමයි, Ingredients විශාල ප්‍රමාණයක් අඩංගු නිෂ්පාදන වලට වඩා සුළු ප්‍රමාණයක් අඩංගු නිෂ්පාදන වලට යොමු වෙනවා නම් වඩා සුදුසුයි කියලත් අපි විශ්වාස කරනවා.

Product එක test කරන්න

මුල්ම වතාවට පාවිච්චි කරන product එකක් නම් කුඩා ප්‍රමාණයේ package එකක් මිලට ගැනීම තමයි වඩාත් සුදුසු වෙන්නේ. ඊට අමතරව, යම් නිෂ්පාදනයක් මිලට ගන්න කලින් Patch test එකක් කරන්න අවස්ථාව ලැබෙනවා නම් ඒ අවස්ථාව මඟ නොහැරීමටත් වග බලා ගන්න කියලා අපි සිහිපත් කරනවා. Product එකෙන් සුළු ප්‍රමාණයක් Forearm හෝ කන පිටුපස ආලේප කරලා පැය 24ක් පමණ කාලයක් පරීක්ෂාකාරී වීම තමයි සාමාන්‍ය පිළිවෙල වන්නේ. යම් විදියකින් කැසීම, පළු දැමීම හෝ රතු පැහැ වීම වගේ අසාමාන්‍ය තත්ත්වයක් ඇති වුවහොත් නොපමාව වෛද්‍ය ප්‍රතිකාර කරා යොමු වෙන්න කියලත් අපි අවධාරණය කරනවා.

මේ දේවල් ගැනත් හිතන්න. නිෂ්පාදනවල කල් ඉකුත්වන දිනය, packages damage වෙලා ද, අනුකාරක නොවන නිෂ්පාදන ද, කියවා තේරුම් ගත හැකි භාෂාවකින් උපදෙස් සටහන් වෙලා තියෙනවා ද, අන්තර්ජාලය හරහා වැඩි විස්තර සොයා ගත හැකි නිෂ්පාදන ද වගේ කරුණු ගැනත් අවධානය යොමු කරලම cosmetics මිලට ගන්න කියලා අපි අවසන් වශයෙන් සිහිපත් කරනවා.

The post Cosmetic products මිලට ගන්න කලින් මේ දේවල් ගැන හිතන්න appeared first on Lady.lk | Lady | Women | Lifestyle | Health | Beauty.

Gal Gadot

Wonder Woman ඇතුළු අතිශය ජනප්‍රිය චරිත කිහිපයකටම පණ පෙවූ මේ ඊශ්‍රායෙලීය රූමතිය දරු තිදෙනෙකුගේ මවක්ද වෙනවා. ඇය තමන්ගේ ප්‍රධානම beauty tip එක විදියට හඳුන්වන්නේ සිරුරට ප්‍රමාණවත් තරමට ජලය පානය කිරීමයි. ඊට අමතරව, රාත්‍රී නින්දට යෑමට පෙර සමට ගැළපෙන night cream යෙදීම ඇතුළු වෙනත් අත්‍යවශ්‍ය සත්කාර කිරීම, රංගනයෙහි යෙදෙන අතරතුරේ සරල ලෙස make up යෙදීම, කාලයකට වරක් රූපලාවණ්‍ය නිෂ්පාදන වෙනස් කිරීම සහ Mediterranean diet plan එක අනුගමන කිරීම ඇයගේ රූපලාවණ්‍ය රහස් අතර වන බව පැවසෙනවා. 

Jenifer Lawrence

Night cream ආලේප කිරීමට පෙර retinol යෙදීම, සමේ අතිශය වියළි ගතිය මඟහරවා ගැනීමට දිවා කාලයයේදී පවා night cream ආලේප කිරීම, thick face masks යෙදීම, zinc oxide හෝ titanium dioxide අඩංගු sunblock ආලේප කිරීම සහ මසකට වරක් microdermabrasion treatment සිදු කිරීම වගේ දේ ගැන තමන් වැඩි අවධානයක් යොමු කරන බව 31 වියැති මේ ජනප්‍රිය රංගන ශිල්පිනිය පවසනවා.

Deepika Padukone

පැයකට වරක් ජලය වීදුරුවක් පානය කිරීම, නින්දට යෑමට පෙර අනිවාර්යයෙන් ම make up remove කිරීම, නිතරම peel- off face masks යෙදීම, පිටතට යන සෑම විටම sun screen සහ eye cream ආලේප කිරීම, make up සහ foundation cream අවම වශයෙන් ආලේප කිරීමට උත්සහ කිරීම, හිස්කබලට පොල් තෙල් යොදා සම්බාහනය කිරීම වගේ beauty tips අනුගමනය කරන්නට තමන් උත්සහ කරන බව ඇය හෙළි කර තියෙනවා.

Priyanka Chopra

තමන් උදෑසන අවදි වූ පසු සිදු කරන ප්‍රථම කාර්‍යය වන්නේ රාත්‍රිය පුරා copper බඳුනක බහා තිබූ ජලය පානය කිරීම බව ඇය පවසනවා. රාත්‍රී නින්දට යෑමට පෙර make up ඉවත් කර serum සහ eye cream ආලේප කිරීම, මසකට දෙවරක් facial කිරීම, ජලය වැඩිපුර පානය කිරීම, පැය 7-8 ක නින්දක් ලබා ගැනීම, foundation cream අවම වශයෙන් ආලේප කිරීම, කයට සහ මනසට ව්‍යායාමයක් වශයෙන් පිහිනීම, සතියකට වරක් hair oil යොදා හිස් කබල සම්බාහනය කිරීම වගේ කරුණු ගැන තමන් විශේෂ අවධානයක් යොදන බවත් සඳහන් කරලා තියෙනවා.

Tamannah

තමන්ගේ සමේ සහ හිසකෙස්වල පෙනුම රැකගන්නට ගිතෙල්, පොල්තෙල්, සුදු හඳුන්, කෝමාරිකා සහ yogurt වගේ ස්වභාවික අමුද්‍රව්‍ය වැඩි වශයෙන් භාවිතා කරන බව ඇය පවසනවා. එළවලු පළතුරු සහ ජලය වැඩිපුර අඩංගු සමබල ආහාර වේලක් ගැනීම, clensing, toning සහ moisturising වගේ මුලික රූපලාවණ්‍ය කටයුතුවලට මූලිකත්වය ලබා දීම, make up හොඳින් ඉවත්වෙන ආකාරයට  සම පිරිසිදු කිරීම සහ sunscreen භාවිතා කිරීම ඇයගේ beauty secrets අතර ප්‍රධාන තැනක් ගන්නවා.

Samantha ruth prabhu

සතියකට දෙවරක් facial steaming සිදු කිරීමට තමන් සැළකිලිමත් වන බව ඇය හෙළි කරලා තියෙනවා. ඊට අමතරව make up අවම වශයෙන් භාවිතා කිරීම, sunscreen සහ night cream ආලේප කිරීම, සමබල ආහාර වේලක් ගැනීමට උනන්දු වීම සහ විශේෂයෙන්ම මානසික සහනය, ධනාත්මක සිතිවිලි ඇතිවෙන පරිදි ක්‍රියා කිරීමට උනන්දු වීම වගේ කරුණු ගැනත් තමන්ගේ වැඩි අවධානය යොමු වෙන බවත් මේ දකුණු ඉන්දියානු රූමතිය සඳහන් කරනවා.

Sai pallavi රංගනයේ යෙදෙන විට පවා make up භාවිතා නොකර සිටීමට උත්සහ කරන ඇය, ස්වභාවික අමුද්‍රව්‍ය අඩංගු රූපලාවණ්‍ය නිෂ්පාදන භාවිතා කිරීමට තමන් වැඩි වශයෙන් උනන්දු වන බව පවසා සිටිනවා. සතියකට තෙවරක්වත් ව්‍යායාම කිරීම, එළවලු පළතුරු සහ ජලය වැඩි වශයෙන් ආහාරයට එකතු කරගැනීම සහ මානසික පීඩා මඟ හැරීම තමන්ගේ සාමාන්‍ය ජීවන රටාව බවත් ඇය බොහෝ අවස්ථාවලදි සඳහන් කර ඇති අතර ආලේපන වලින් තොරවූ තමන්ගේ ස්වභාවික පෙනුම පවා රසික රසිකාවියන්ගේ ආදරයට ලක්වීම නිසා තමන්ගේ ආත්ම ශක්තිය බෙහෙවින්ම වැඩිවූ බවත් සිහිපත් කරනවා.

The post සුරූපී නිළියන්ගේ රූපලාවණ්‍ය රහස් appeared first on Lady.lk | Lady | Women | Lifestyle | Health | Beauty.

නිවැරදිව පිරිසිදු කරන්න

විෂබීජ සහ කුණු දුහුවිලි ඉවත්වෙන ආකාරයට දෑත් පිරිසිදු කිරීමේ වැදගත්කම ගැන මේ වෙනකොට අපි හොඳටම දැනුවත් වෙලයි ඉන්නේ. හැබැයි ඔබ මේ සඳහා නිතරම anti- bacterial සබන් වර්ග යොදා ගන්නවා නම් එමඟින් ඔබේ සමේ අඩංගු ස්වභාවික තෙල් ගතිය ඉවත් වී දෑත් වියළි සහ ඉරිතැළුණු ස්වභාවයකට පත්වෙන්නට ඉඩ තියෙනවා. ඒ වගේම තමයි විවිධ රසායනික ද්‍රව්‍ය එකතු කරලා සුවඳ ගැන්වූ සබන් වලිනුත් මේ හානිය ම සිදුවෙනවා. ඉතින්, මේ ගැටළුවෙන් මිදීම සඳහා ඔබ කළ යුතු වන්නේ Shea butter, aloe vera, olive oil වගේ hydrating ingredients අඩංගු සහ fragrance- free moisturizing සබන් වර්ගයක් දෑත් සේදීම සඳහා භාවිතා කිරීමයි. ඒ විතරක් නෙවෙයි, නිතරම උණුසුම් ජලයෙන් දෑත් සේදීම හේතුවෙනුත් ඔබගේ දෑත් වියළීමට ලක්වෙන නිසා සීතල හෝ උණුසුම් ජලය මේ සඳහා භාවිතා කිරීමටත් අමතක කරන්න එපා.

පාවහන් භාවිතය

ඔබ නියැළෙන කාර්‍යය කුමක් වුවත් අවස්ථානුකූලව ඒ හා ගැළපෙන ආකාරයේ පාවහන් භාවිතා කිරීම අත්‍යවශ්‍ය කාරණයක් වෙනවා. උදාහරණයක් විදියට ගත්තොත්, කාර්‍යාලයට පළඳින පාවහන් යුවළ ව්‍යායාම කිරීමේදී භාවිතා කිරීම කිසිසේත්ම සුදුසු වන්නේ නැහැ. ඒ වගේම තමයි පාද ආශ්‍රිතව ඉදිමුම්, ආසාදන, කිසියම් වේදනාවක් හෝ අසාමාන්‍ය බවක් දැනෙනවා නම් වහාම ක්‍රියාත්මක වෙලා වෛද්‍ය ප්‍රතිකාර ලබා ගැනීම ගැනත් අවධානය යොමුකළ යුතු වෙනවා.

නියපොතු ගැන හිතනව ද

නියපොතු ආශ්‍රිත ආසාදන, රූපලාවන්‍ය සත්කාර කිරීමේදී සැළකිලිමත් විය යුතු ආකාරය සහ වෛද්‍ය සහය ලැබිය යුතු අවස්ථා ගැන අපි කලින් ලිපියකිනුත් සාකච්ඡා කරලා තියෙනවා. පෝෂණ ඌණතාවයක් නිසා ඇතිවෙන සහ ඉක්මනින් ම නැතිවී යන සුදු පැහැති ලපවලට අමතරව කළු, දුඹුරු හෝ දම් පැහැති ලප නියපොතු මත මතු වෙනවා නම් එය නොසළකා හැරිය හැකි තත්ත්වයක් විදියට සළකන්න එපා කියලා අවධාරණය කරන්නට අපි කැමතියි. මේ නිසා, ඔබ පුරුද්දක් විදියට නිය ආලේපන ගල්වනවා නම් ඒවා ඉවත් කරන අවස්ථාවලදී නිය මත මෙවැනි ලප හෝ යම් අසාමාන්‍ය තත්ත්වයන් මතුවෙලා තියෙනවද කියලා නිරීක්ෂණය කරන්නත් අමතක කරන්න එපා.

පාදවල සුවපහසුවට

මඳ උණුසුම් ජලයේ පෙඟවීමෙන් පාදවලට පුදුමාකාර සුව පහසු බවක් දැනෙනවා කියලා දැනගෙන හිටියට එයින් ලැබෙන ප්‍රතිඵල ගැන අපි එතරම් දැනුවත් නෑනේ. එහෙනම් ඔන්න අහගන්න. රුධිර ගමනාගමනය හොඳින් සිදුවීම, පාදවල ඉදිමුම අඩුවීම, බැක්ටීරියා ඉවත්ව පිරිසිදු වීම කියන වාසි වලට අමතරව දෙපා සහ මුළු සිරුරම relax කරවන්නත් මේ සත්කාරයට හැකියාව තියෙනවා. ඊට අමතරව, මඳ උණුසුම් වතුරට ලුණු කුඩු ස්වල්පයකුත් එකතු කරනවා නම් වඩාත් සාර්ථක ප්‍රතිඵල ලබාගන්න පුළුවන්කම ලැබෙනවා.

නියපොතු පිරිසිදු කරන්නේ මෙහෙමයි

දෑත් දෙපා හොඳින් සේදුවට විතරක් මදිනේ. නියපොතු ඇතුළේ තියෙන විෂබීජ ඉවත් වීමත් අනිවාර්යයෙන් සිදුවෙන්න අවශ්‍යයි. High quality nail brush එකක් භාවිතා කරලා අපහසුවකින් තොරව සහ නියපෙළට හානි නොවෙන පරිදි මේ කටයුත්ත සිදු කරගන්න ඔබට හැකියාව තියෙනවා. පිරිසිදු නියපොතු නිසා දෑත් සහ දෙපා ලස්සන වෙනවා විතරක් නෙවෙයි, ඔබේ නිරෝගි බවටත් මෙය හේතුවක් වෙනවා නොඅනුමානයි.

Massage කිරීම

අත් කකුල් පිරිසිදු කිරීමෙන් පසුව හොඳින් පිසදමා වියළා ගැනීම අනිවාර්යයෙන් සිදුකළ යුතු වන්නේ වතුර රැඳී තීබීම, සමේ වියළි බවට හේතුවක් වන නිසයි. සෝදා වියළා ගත් දෑත් සහ දෙපාවල සුදුසු moisturizer cream ස්වල්පයක් ආලේප කර මෘදුව සම්බාහනය කිරීම ඊළඟ පියවර වෙනවා. මේ කරුණු දෙක අනුගමනය කිරීමෙන් දෑත් සහ දෙපාවල පෙර නොදුටු ආකාරයේ වෙනසක් ඔබට දැකගන්නට ඉඩ ලැබේව් කියලා අපි හිතනවා. ඒ වගේම තමයි, දෑත් සහ දෙපාවල sunscreen ආලේප කරනවා නම්, ඔබ ඉර එළියට නිරාවරණය වන කාල සීමාවට ගැළපෙන ආකාරයේ SPF අගයකින් යුතු sun cream එකක් මිලට ගන්නටත් අමතක කරන්න එපා

Hangnails

නියපොතු කෙටි කර කැපීම සහ hangnails වලට ප්‍රතිකාර කිරීම ඔබේම සුව පහසුව සඳහා හේතුවක් වනවා. සාමාන්‍යෙන් hangnails ඇතිවීම සඳහා ප්‍රධානතම හේතුව වන්නේ සමේ වියළි බවයි. විනාඩි 15ක් පමණ මඳ උණුසුම් ජලයේ පොඟවාගත් ඇඟිලිවල වතුර පිසදා moisturise ස්වල්පයක් ආලේප කරන්න. ඉන් පසු ප්‍රවේශමෙන් hangnails කපාදමා, ඉක්මනින් සුව වීම සඳහා එම ස්ථානයේ antibiotic cream ස්වල්පයක් ආලේප කරන්න.

The post අත් පා සම්බන්ධව ඔබ කොයි තරම් සැළකිලිමත් ද appeared first on Lady.lk | Lady | Women | Lifestyle | Health | Beauty.

Shaving

මෙහිදී සිදුවන්නේ සමේ මතුපිටින් ඇති රෝම කපා ඉවත් කිරීම පමණයි. Shave කිරීමට බොහෝ දෙනෙක් ප්‍රිය නොකරන්නේ රෝම නැවත වැවීමේදී වේගවත්ව සහ ඝනකම්ව වැවෙන්නට shave කිරීම හේතුවක් වනවා කියන විශ්වාසයෙන් වුණත් ඒ මතයේ කිසිදු සත්‍යතාවයක් නම් නැහැ. හැබැයි මතුපිටින් කපා දැමීමක් පමණක් සිදු කිරීම නිසා කෙටි කාලයක් ඇතුළත නැවත වැවීම නම් සිදුවෙනවා. අත්, කකුල් සහ under arms වල ඇති රෝම ඉවත් කිරීම සඳහා ඔබ shave කිරීම තෝරා ගන්නවා නම් ඊට පෙර body wash, hair conditioner හෝ shaving cream ස්වල්පයක් සම මතුපිට ආලේප කිරීම සහ අලුත් razor එකක් භාවිතා කරලා shave කිරීම මඟින් කැපුම් තුවාල සහ ආසාදනවලින් තොරව රෝම ඉවත් කරගන්නට ඔබට හැකියාව ලැබේවි.

Plucking

Tweezer එකකින්, එහෙමත් නැත්තන් cotton/ polyester thread එකක් පාවිච්චි කරලා රෝම සම්පූර්ණයෙන් උගුල්ලා දැමීමක් තමයි මෙහිදී සිදුවෙන්නේ. මෙය තරමක් වේදනාකාරී සහ කාලය ගතවෙන කාර්‍යයක් වුණත් මුහුණේ ඇති අනවශ්‍ය රෝම ඉවත් කරන්න සුදුසුම ක්‍රමයක් විදියට මේ ක්‍රමය හඳුන්වන්න පුළුවන්. ඔබට අවශ්‍ය නම්, වේදනාව අවම කරගැනීම සඳහා රෝම ඉවත් කිරීමට පැය භාගයකට පමණ පෙර ice cube massage එකක් කිරීම හෝ ක්‍රීම් ආලේප කිරීම සිදු කරන්නට හැකියාව තියෙනවා. ඒ වගේම මේ කාර්‍යය වේදනාව අවම වන ආකාරයට සහ නිවැරදිවම සිදු කරන්නට රූපලාවණ්‍ය ශිල්පිනියගේ පළපුරුද්ද සහ දක්ෂතාවය වැඩි වශයෙන් බලපාන බවත් අපි මතක් කරනවා.

Depilatory Creams

රෝම විනාශ කර ඉවත් කිරීම සඳහා ආලේප කරන රසායනික ද්‍රව්‍ය අඩංගු cream වර්ග මේ නමින් හඳුන්වනවා. මේවා අතපය වල රෝම ඉවත් කිරීම සඳහා භාවිතා කළහැකි අතර label එක හොඳින් කියවා එහි අඩංගු උපදෙස් පිළිපැදීම අත්‍යවශ්‍ය වෙනවා. මෙවැනි නිෂ්පාදන භාවිතා කිරීමේදී, සමට allergy වීම හෝ දිගු කාලයක් සමේ රැඳී තිබීම නිසා සම පිළිස්සීමට ලක් වීම වගේ තත්ත්වයන්ට මුහුණ දීමට වුවත් ඉඩ ඇති නිසා මෙය එතරම් සාර්ථක ක්‍රමයක් විදියට සළකන්න නම් අපහසුයි.

Laser Hair Removal

කේශ මූලයේ ක්‍රියාකාරීත්වය සම්පූර්ණයෙන්ම නැසීම තමයි මෙහිදී සිදු කෙරෙන්නේ. මෙය ඵලදයක ක්‍රමයක් විදියට හැඳින්විය හැකි වුණත් සති කිහිපයකට වරක්, සිව් වරක් හෝ ඊට වඩා වැඩි වාර ගණනක් සිදු කිරීම අත්‍යවශ්‍ය වෙනවා. ඒ වගේම වියදම් අධික කාර්‍යයක් වන අතරම තරමක් වේදනාකාරී ද වනවා. සුදුසුකම්ලත් දක්ෂ වෛද්‍යවරයෙක් හරහා මෙම ප්‍රතිකර්මය සිදු කරවාගත හැකි අතර සිරුරේ ඕනෑම ස්ථානයක ඇති අනවශ්‍ය රෝම මෙමඟින් ඉවත් කරගන්නට හැකියාව තියෙනවා.

Electrolysis

මෙමඟිනුත් සිදුවන්නේ සියුම් electric current එකක් ලබා දීම මඟින් කේශ මූලය විනාශ කිරීමයි. ඒ වගේම සුදුසුකම් සහිත පළපුරුදු  වෛද්‍යවරයෙක් හරහා මේ කාර්‍ය්ය සිදුකරවා ගැනීම අත්‍යවශ්‍ය වෙනවා. කොහොම වුණත් කෙස් ගසෙන් කෙස් ගසට වෙන වෙනම සිදුකළ යුතු අතර ම වාර කිහිපයක්ම මෙම ක්‍රියාවලිය සිදු කිරීමෙන් පසුව තමයි සාර්ථක ප්‍රතිඵල ලැබෙන්නේ. Electrolysis ආකාර දෙකකට සිදු කිරීමේ හැකියාව තියෙනවා. Galvanic ක්‍රමයේදී සිදු කරන්නේ රසායනික බලපෑමක් ලබා දීමෙන් කේශ මූලය නැසීම වන අතර Thermolytic ක්‍රමයේදී සිදුවන්නේ heat කිරීම මඟින් කේශ මූලය නැසීමයි. වියදම් අධික කාර්‍යයක් වුණත් මෙමඟින් සිරුරේ ඕනෑම තැනක ඇති අනවශ්‍ය රෝම ඉවත් කරගැනීමේ හැකියාව තියෙනවා. ඒ වගේම තරමක් වේදනාකාරී සහ තරමක අතුරු ආබාධ ඇතිවීමට ඉඩ ඇති ක්‍රමයක් විදියට තමයි සැළකෙන්නේ.

Waxing

විශාල ප්‍රදේශයක ඇති අනවශ්‍ය රෝම වුවත් සුළු කාලයක් ඇතුළත ගලවා ඉවත් කිරීම මෙමඟින් සිදු වෙනවා. භාවිතා කරන wax වර්ගය රත් කර, රෝම වැවෙන දිශාවට ආලේප කර මඳ වෙලාවක් තබා ඒ මත ඇලවූ රෙදි කැබැල්ලක ආධාරයෙන් රෝම වැවෙන දිශාවට විරුද්ධ අතට ඇදීම මඟින් රෝම ගැළවීම මෙහිදී සිදු කරනවා. බිබිළි මතුවීම වැනි සුළු ආසාදන ඇති වුණත් සිරුරේ ඕනෑම ස්ථානයකට යොදාගන්න පුලුවන් සාර්ථක hair removal method එකක් විදියට හඳුන්වන්න පුළුවන්කම තියෙනවා.

ශරීරයේ ඇති යම් යම් රෝග තත්ත්ව නිසා ඉහත සඳහන් කළ ක්‍රම මඟින් පාලනය කළ නොහැකි තරමට රෝම වැවෙන පිරිසක් අප අතර සිටිනවා. එවැනි අවස්ථාවලදී නොපමාව වෛද්‍ය ප්‍රතිකාර ලබාගැනීමට යොමු වීම අත්‍යවශ්‍ය වනවා. ඒ වගේම threading, tweezing, waxing වගේ ක්‍රම අනුගමනය කරලා රෝම ඉවත් කළාට පස්සේ ice cube massage එකක් සිදු කිරීමට සහ  toner ආලේප කිරීමට අමතක කරන්න එපා. බිබිළි, ඉදිමීම්, රත් පැහැ ගැන්වීම් සාමාන්‍ය තත්ත්වයක් වුණත් වෛද්‍ය ප්‍රතිකාර අවශ්‍ය බව ඔබට ම වැටහෙනවා නම් එවැනි සිතිවිල්ලක් නොසළකා හරින්න එපා කියලත් අවසන් වශයෙන් අපි සිහිපත් කරනවා. 

The post සිරුරේ ඇති අනවශ්‍ය රෝම ඉවත් කරගන්නේ මෙහෙමයි appeared first on Lady.lk | Lady | Women | Lifestyle | Health | Beauty.

Rebonding සහ keratin treatment අතර වෙනස

බැලූ බැල්මට මේ අවස්ථා දෙකේදිම ලැබෙන ප්‍රතිඵලය එක සමාන වගේ වුණත් හිසකෙස්වලට සිදුවන බලපෑම නම් හාත්පසින්ම දෙයාකාරක් ගන්නවා. රසායනික ද්‍රව්‍ය යෙදීම මඟින් හිසකෙස් සැදි ඇති natural bonds බිඳ දමා, ඉන් පසුව iron කිරීම මඟින් හිසකෙස් ඍජු කිරීමක් rebonding වලදි සිදු කරනවා. ඒ කියන්නේ straightening cream වර්ගයක් ආලේප කරලා මඳ වෙලාවකට පසු සෝදා හැරීමත්, ඉන් පසුව iron කිරීමත් මෙහිදි සිදු වෙනවා. හැබැයි මේ ක්‍රියාවලිය හරහා සම්පූර්ණයෙන් ම හිසකෙස් පළුදු වීමක් තමයි සිදු වෙන්නේ. නමුත් keratin treatment එකකදි කිසිසේත්ම මෙවැනි damage වීමක් සිදු වන්නේ නැහැ.

එහෙනම් Keratin seal එකේදි වෙන්නේ මොකක්ද

අපේ හිසකෙස් සහ නියපොතු හැදිලා තියෙන්නේ keratin කියන protein cells වලින් බව ඔබ දන්නවා ඇති. ශරීරයට නිසි පරිදි පෝෂණයක් නොලැබෙන කොට ශරීරයේ අනිත් කොටස් අඩපණ වෙනවා වගේම හිසකෙසුත් දුර්වල වීමට, කැඩී යාමට, ගැළවීමට සහ dull පෙනීමක් ගන්නට පටන් ගන්නවා. අන්න ඒ වගේ අප්‍රාණික හිසකෙස්වලට keratin ආලේප කරලා iron කිරීම මඟින් seal කිරීමෙන්, කොණ්ඩයට පෝෂණයක් සැපයීමත්, හිසකෙස් යථා තත්ත්වයට පත් කිරීමත් තමයි මෙහිදී සිදු කරන්නේ. Rebonding process එකේදි cream ආලේප කිරීමෙන් පසු සෝදාහරිනවා වගේ මෙහිදි keratin ආලේප කරලා සෝදාහැරීමක් සිදු කරන්නේ නැති බව අමතක කරන්න එපා.

වෙනත් සත්කාර හරියන්නේ නැද්ද

සාමාන්‍යෙන් ඔබ හිස්කබල shampoo කලාට පස්සේ හිසකෙස්වලට conditioner ආලේප කිරීමක් සිදු කරනවා. එහෙමත් නැත්තන් සතියකට දෙකකට වතාවක් deep conditioner කරනවා වෙන්නත් පුළුවන්. හැබැයි මේ දේවල් තාවකාලික සත්කාර පමණයි. Keratin seal එකක් කරපු කොණ්ඩයක් හරි විදියට සත්කාර කරලා පරිස්සම් කරගත්තොත් මාස 6කට කිට්ටු කාලයක් බොහොම ලස්සනට තියාගන්න පුළුවන්කම ලැබෙනවා. ඒ වගේම අවුරුද්දට 2-3 වතාවක් වුණත් කරන්ත් පුළුවන්කම තියෙනවා.

කොහොමද keratin treatment එකක් කරන්නේ

මේ ක්‍රියාවලිය නිවසේදි සිදු කරන එක නම් සාර්ථක වැඩක් නෙවෙයි. සුදුසුකම් සහිත සහ විශ්වාසවන්ත රූපලාවණ්‍ය ශිල්පිනියකගෙන් ම තමයි මේ සත්කාරය කරගන්න අවශ්‍ය වෙන්නේ. මුලින්ම හිසකෙස් සහ හිස්කබලේ ඇති සියළුම කුණු දුහුවිලි, conditioner, තෙල් යනාදිය අයින් වෙලා යන පරිදි හොඳින් සෝදා, ඉන්පසු වියළා ගන්නවා. සම්පූර්ණයෙන් කෙස් කළඹම ආවරණය වෙන විදියට keratin ආලේප කරලා තියලා නියමිත කාල සීමාවකට පස්සේ dryer එකක් මඟින් හිසකෙස් හොඳින් වියළා ගැනීමත්, පසුව iron කිරීමත් සිදු කරනවා. Keratin යොදා කෙස් ගසේ cuticle එක වසා දමා seal කරන මේ ක්‍රියාවලියට පැය 2-4 පමණ කාලයක් සාමාන්‍යෙන් ගත වෙනවා. මේ කාල සීමාව තීරණය වන්නේ ඔබේ සම්පූර්ණ කෙස්කලඹේ ස්වභාවය අනුවයි.

ඊට පස්සේ

සාර්ථකව සිදු කරපු මේ ක්‍රියාවලියෙන් පැය 48 කට පස්සේ සාමාන්‍ය විදියට නාන්න, shampoo, conditioner කරන්න පුළුවන්කම තියෙනවා. හැබැයි sulphate- free, මෘදු shampoo වර්ගයක් සහ ගුණාත්මක බවෙන් ඉහළ conditioner වර්ගයක් යෙදීම තමයි ඉතාමත් සුදුසු වෙන්නේ. Keratin straightening එකකට පස්සේ ඔබගේ හිසකෙස්වල වියවුල් සහ දුර්වල බව නැතිවෙලා පිරිපුන්, ශක්තිමත් සහ කඩාහැලෙන සුළු සහ දිදුළන කෙස් කළඹකට හිමිකම් කියන්න ඔබට අවස්ථාව උදා වෙනවා.

කොයි වගේ කොන්ඩෙකටද කරන්න පුළුවන්

සාමන්‍ය හිසකෙස් වලට සහ කෘත්‍රීමව වෙනස් කරපු හිසකෙස් වලට මේ සත්කාරය කරන්න පුළුවන්. ඒ වගේම color කරපු හිසකෙස්වලට සිදු කරන්නත් පුළුවන්කම තියෙනවා. Blonde වගේ වර්ණයක් යෙදීම වෙනුවෙන් bleach කිරීම නිසා අධික විදියට damage වුනු හිසකෙස් වලටත් keratin treatment එක කරන්න පුළුවන් වුණත් එතරම් කාලයක් සත්කාරයේ ප්‍රතිඵල විඳින්න නම් ඉඩ ලැබෙන්නේ නැහැ. ඒ වගේම අධික සිහින් හිසකෙස්වලට මේ සත්කාරය සිදු කරනවා නම් iron කිරීමේදි නොකැඩෙන පරිදි ඉතාම ප්‍රවේසමෙන් සිදු කරන්න අවශ්‍ය වෙනවා. Seal කිරීම සඳහා iron කිරීමේදී කොණ්ඩයේ Curly ගතිය නැතිවෙන නිසා curl කොණ්ඩයකට keratin treatment එකක් කරනවා නම් හිසකෙස්වල කැරලි ගතිය ගැන තියෙන ආසාව නම් අතහරින්න වෙන බවත් අපි සිහිපත් කරනවා.

රැවටෙන්නෙපා

මෙය සාමාන්‍යෙන් rebonding වලට වඩා මිල අධික සත්කාරයක් විදියට තමයි සැළකෙන්නේ. ඒ නිසා බොහොම අඩු මුදලකට keratin seal එකක් කරදීමට රූපලාවන්‍යාගාරයකින් පොරොන්දු වෙනවා නම් එය විශ්වාස කරන්න පුළුවන් පොරොන්දුවක් නම් නෙවෙයි. බොහෝ දුරට ඔවුන් පොරොන්දු වෙන්නේ සාමාන්‍ය rebonding එකක් ම කරලා දෙන්න වෙන්න පුළුවන්. මේ නිසා එවැනි පුද්ගලයන්ට නොරැවටී විශ්වාසවන්ත තැනකින්ම keratin treatment එක කරගන්න කියලා අපි අවසානයට මතක් කරනවා.

Reference – https://theouai.com/blogs/by-the-ouai/everything-you-need-to-know-about-keratin-treatments

The post හිසකෙස් රැකදෙන keratin treatment ගැන දැනගන්න කැමති ද appeared first on Lady.lk | Lady | Women | Lifestyle | Health | Beauty.

කොච්චර වතුර අවශ්‍යයි ද?

පුද්ගලයෙකුගේ ශරීරයට අවශ්‍ය වන ජලය ප්‍රමාණය, ඒ පුද්ගලයාගේ ශරීරයේ බර අනුව සාපේක්ෂ අගයක් ගන්නවා. හැබැයි සාමන්‍යයෙන් මෙය ජලය වීදුරු 6-8 අතර ප්‍රමාණයක් වන බවත් කියන්නට හැකියාව තියෙනවා. ට්‍රිලියන 30 කට අධික සෛල සංඛ්‍යාවකින් නිර්මාණය වෙලා තියෙන මිනිස් සිරුරේ මනා ක්‍රියාකාරීත්ව සඳහා ජලය කියන දේ අත්‍යවශ්‍ය වන අතර ජලය පානය කිරීම ඔබේ සුන්දරත්වයට බලපාන්නේ කොහොමද කියන කාරණය ගැන අපි දැන් හොයලා බලමු.

Glowing skin

අපේ ශරීරයේ ඇති විශාලතම අවයවය විදියට හඳුන්වන සමේ වැඩි වශයෙන් අඩංගු වෙලා තියෙන්නේ ජලය යි. ඉතින් ඔබ ප්‍රමාණවත් තරම් ජලය පානය කරන්නේ නැත්නම් සම වියළි, රළු සහ ඉරිතැළුණු ස්වභාවයක් ගන්නවා. මෙය නොඅනුමානවම වයසට වඩා මහළු පෙනුමක් ගෙන දෙන්නට හේතුවක් වන අතර ඔබ කොයි තරම් cream වර්ග ආලේප කලත් සම වියළි නම් ඒවායින් නිසි ප්‍රයෝජනයක් ලැබෙන්නෙත් නැහැ. හැබැයි ඔබ උනන්දුවෙන් ජලය පානය කරනවා නම්, ඔබට මෘදු, දීප්තිමත් සහ බොහොම සුන්දර පෙනුමැති සමක් ලබාගන්නට හැකි බව අපි විශ්වාස කරනවා.

elasticity of the skin

සමේ තෙතමනය වැඩිවෙනකොට ඇදෙනසුළු බවත් වර්ධනය වීම සිදු වෙනවා. මේ නිසා wrinkles සහ fine lines නොපෙනි යාමත්, සමේ තරුණ පෙනුම රැකීමත් ඔබට ලැබෙන අමතර වාසි විදියට පෙන්වන්න පුළුවන්කම තියෙනවා.

ඒ වගේම හොඳින් ජලය පානය කිරීම මඟින් සමට මනාව රුධිරය ගලායෑම, ආහාර ජීර්ණ පද්ධතිය හොඳින්  ක්‍රියාකාරී වීම, සිරුරට අහිතරකර අපද්‍රව්‍ය පහසුවෙන් සිරුරෙන් ඉවත් වීම, සමේ pH අගට balance වීම වාසි දායක තත්ත්වයන් ඇතිවෙනවා. ඉතින් මේ හැමදෙයකම අවසාන ප්‍රතිඵලය වන්නේ කුරුලෑ, ලප කැළැල් ආදියෙන් තොර සුන්දර සමක් ඔබට උරුමවීමයි.

Nails

නියපොතු දුර්වල වීම, පහසුවෙන් කැඩීයෑම සහ ගැළවීම සඳහා සමේ වියළි බව ප්‍රධනම හේතුවක් වෙනවා. ඔබ ඔබේ පෙනුමට දක්වන සැළකිලිමත් බව කොයි තරම්ද කියලා පැහැදිලිවම පෙන්නුම් කරවන එක් නිර්නායකයක් තමයි නියපොතු කියලා කියන්නේ. මේ නිසා නියපෙළ ශක්තිමත්ව සහ නිරෝගිව තබා ගන්නට නම් ප්‍රමාණවත් තරම් ජලය පානය කරන්න ම සිදුවෙන බවත් අපි මතක් කරන්නට කැමතියි.

Weight

බොහෝ දෙනෙක් තමන්ගේ සිරුරේ තරබාරු කම, එහෙමත් නැත්තන් බර ගැන පීඩාවට පත්වෙනවා. හැබැයි ඔබ නිසියාකාරව ජලය පානය කරනවා නම් සිරුරේ බර නිසි පරිදි පවත්වාගෙන යෑම එතරම් අසීරු කාරණයක් වන්නේ නෑ. සිරුරට හොඳින් ජලය ලැබෙන්නේ නැති වෙනකොට වකුගඩුවල ක්‍රියාකාරීත්වය අඩාල වෙලා අක්මාවට අමතර වැඩ කොටසක් එකතුවෙනවා. සිරුරේ මේදය දහනය වීමට සුවිශේෂී සහයක් ලබාදෙන අක්මාවට මේ නිසා තමන්ගේ කාර්‍යය හරිහැටි ඉටු කිරීමට අපහසු වෙලා මේදය දහනය වීම හරි හැටි සිදු වෙන්නේ නැතිව යනවා. මේ ක්‍රියාවලියේ අවසාන ඵලය තමයි මේදය තැන්පත් වී සිරුරේ බර ඉහළයාම. මේ නිසා වකුගඩු, අක්මාව සහ ආහාර ජීර්ණ පද්ධතිය හොඳින් ක්‍රියාකාරී වීමටත්, බර අඩුවෙලා සිරුර හැඩ වීමටත් ජලය හොඳින් පානය කිරීම අත්‍යවශ්‍යයි කියලා අපි සිහිපත් කරනවා.

Hair

සිරුරට නිසි පරිදි ජලය ලැබෙන්නේ නැති නම් හිස් කබල වියළී යාමට පටන් ගන්නවා.ඊට අමතරව හිසකෙස් වියළීම, තුනී වීම, පහසුවෙන් කැඩීයාම සහ ගැළවීම වගේ තත්ත්වයන් ඇති වෙන්නටත් මෙය හේතු වෙන්න පුළුවන්. හැබැයි ඔබ සිරුරට හොඳින් ජලය ලබාදෙනවා නම් කෙස්කලඹේ ඝනකම, හිසකෙස් වර්ධනය වගේම keratin මට්ටමත් හොඳ තත්ත්වයකින් පවත්වාගෙන යන්න  අවස්ථාව හිමි වෙනවා.

Eyes

දීප්තිමත් සහ සුන්දර නෙත් යුවලක් ලබාගැනීම ඔබේ සිහිනයක් නම් වැඩි වැඩියෙන් ජලය පානය කිරීම ඒ සඳහා ඔබට උපකාරයක් වේවි. ඒ විතරක් නෙවෙයි, විජලනයේ ලක්ෂණයක් වන ඇස්වල ගිලී ගිය ස්වභාවය, වියළි සහ රත් පැහැති ගතිය අඩු කර ගැනීමටත් මෙය උපකාරී වනවා නොඅනුමානයි. විශේෂයෙන්ම ඔබගේ මුහුණට, වයසට වඩා වැඩි පෙනුමක් ලබාදීමට හේතුවන දුර්වල පෙනුමැති නෙත් යුවළට ප්‍රාණවත් බවක් සහ සුන්දරත්වයක් එක් කිරීමටත් මෙය සමත්වන බව අමතක කරන්න එපා.

The post සුන්දර පෙනුමක් සඳහා ජලය පානය කරන්න appeared first on Lady.lk | Lady | Women | Lifestyle | Health | Beauty.

මේ අය ඉන්නේ ඔබ ළඟමයි

Toxic පුද්ගලයින් කියලා ගත්තම ඒ අය අතරේ ඔබේ පවුලේ සාමාජිකයින්, ඥාතීන්, හිත මිතුරන්, සහකරුවා වගේම තමන්ගේ කාර්‍යාලයීය සගයින් පවා ඉන්න ඉඩ තියෙනවා.  ඉතින්, කිසිම සාධාරණ හේතුවකින් තොරව දිගින් දිගටම තමන්ව මානසික පීඩනයට පත් කරන මේ වගේ පුද්ගලයින්ව හඳුනාගැනීම සහ ඔවුන්ව මඟහැර ජීවත්වීමත්, සිතට සහනය ගෙනදෙන ආකාරයේ පුද්ගලයින් ඇසුරු කිරීමත් ඔබේ මානසික සුවයට මනා පිටුවහලක් වෙයි කියලා අපි මුලින්ම මතක් කරන්නට කැමතියි.

ඔබව මානසිකව වෙහෙසට පත් කරවනවා

යම් පුද්ගලයෙක් එක්ක සිදුකරන කතා බහකින් පස්සේ ඔබව මානසිකව බිඳ වැටිලා වගේ නම්, හිතට කිසිම සුබවාදී බවක් දැනෙන්නේ නැත්නම් සහ දිගින් දිගටම මේ දේ සිදුවෙනවා නම් ඒ හිතවත්කම් වලින් ඔබට යහපතක් වෙයි කියලා හිතන්න අමාරුයි. ඒ පුද්ගලයා ඔබට කොයි තරම් සමීපතමයෙක් වුණත් ඒ ඇසුර වෙහෙසකාරී එකක් නම් ඔබගේ මානසික සහනය පතා එවැනි අයගෙන් ඉවත්වීම තමයි වඩාත්ම සුදුසු වෙන්නේ.

තර්ජනයෙන් බියගන්වන්න උත්සහ කරනවා

මෙවැනි පුද්ගලයින් තර්ජන සහ බිය වැද්වීම කියන අවිය මඟින් ඔබගේ තීරණ හෝ ක්‍රියාකාරකම් වෙනස් කරන්නට උත්සහ කරනවා. බොහෝ විට ඒ වෙනස ඔබට හිතකර නොවුනත් බිය නිසා ඔබ ඔබගේ තීරණ වෙනස් කරනවා නම් ඔබ toxic පුද්ගලයෙකුගේ බලපෑමට හසුවෙලා කියලා කියන්න පුළුවන්කම තියෙනවා. Emotional blackmailing කියලා අදහස් කරන්නෙත් මේ කාරණයමයි.

වරදකාරී හැඟීම් ඇති කරවනවා

ඔබට ඒ පුද්ගලයා සමඟ තියෙන සම්බන්ධයේ ස්වභාවය සිහිපත් කරමින් ඔබ තුළ වරදකාරී හැඟීමක් ඇති කරවීමත් ඒ හරහා ඔබට බලපෑම් සිදු කිරීමත් මෙයින් අදහස් වෙනවා. මෙයත් ඉහත සඳහන් කළ ආකාරයේම bully කිරීමක් විදියට පෙන්වන්න පුළුවන්. වෙනත් විදියකට කියනවා නම් ඔබ තුළ ඒ පුද්ගලයා ගැන තියෙන සැළකිල්ල සහ ආදරය අයුතු ආකාරයකට භාවිතා කිරීමක් තමයි මෙහිදී සිදුවන්නේ.

ඉරිසියාකාරයෝ

අන් අයට ඉරිසියා කිරීමත්, අන් අය පරයා යෑම සඳහා unethical ආකාරයට පවා ක්‍රියා කිරීමටත්, ඒ ක්‍රියාකාරකම් විවේචනයට ලක්වෙන විට victim කෙනෙක් විදියට හැසිරීමටත් මෙවැනි පුද්ගලයින් රුසියන් කියලා කියන්න පුළුවන්. ඒ වගේම මේ ඉරිසියාව නිසාම තමන් අවට ඉන්න අයට යම් යම් සීමා පැනවීම, ඒ අයගේ නිදහස අහිමි කිරීම සහ දියුණුවට බාධා කිරීම වගේ දේවල් කරන්නත් මේ අය පෙළඹෙනවා. හොඳට හිතලා බලන්න, ඔබත් මේ වගේ අයෙක්ගේ බලපෑම්වලට හසුවුණු කෙනෙක්ද කියලා.

ඔබගේ ආත්ම විශ්වාසය බිඳ දමනවා

ඉරිසියාව හෝ හුදු විනෝදය වෙනුවෙන් අන් අයගේ ආත්ම විශ්වාසය බිඳ දැමෙන විදියට ක්‍රියා කරන පුද්ගලයිනුත් අයිති වෙන්නේ toxic පුද්ගලයින් කියන කාණ්ඩයට. ඔවුන් තවත් කෙනෙක්ට පැසසුවත් යාන්තමින් හරි negative feeling එකක් එන විදියට තමයි ඒ දේ කරන්නේ. ඔබ ගැන, ඔබ තුළ තියෙන යහපත් හැඟීම බිඳ දමා ඔබව සුළු පුද්ගලයෙක් බව ඒත්තු ගැන්වීම ඔවුන්ගේ ප්‍රධානම අරමුණ වන නිසා හැකිතාක් එවැනි අයගෙන් ඈත්ව සිටීම ඔබට සහනයක් වනවා නොඅනුමානයි.

අපහාසාත්මක විහිළු

මේ කතා කරන්නේ සාමාන්‍ය විහිළු තහළු ගැන නම් නෙවෙයි. අන් අයට අපහාස කිරීමේ අරමුණින් ම යම් අයෙක් දිගින් දිගටම යම් විහිළුවක් කරනවා නම් ඒ පුද්ගලයා තවදුරටත් ඇසුරු කිරීම සඳහා සුදුසු අයෙක් වන්නේ නැහැ. ඔබ ඉදිරියේ පමණක් හෝ පිරිසක් මධ්‍යයේ ඔබගේ අතිශය පෞද්ගලික කරුණු, ඔබට අතිශය සංවේදි කරුණු, එහෙමත් නැත්තම් ඔබට කිසිසේත්ම විහිළුවක් නොවන කරුණු ගැන කතා කිරීමට හෝ ඒ සම්බන්ධ විහිළු තහළු කිරීමට පෙළඹනවා නම් එවැනි අයගෙන් හැකි තාක් ඈත්ව සිටීම ඉතාමත් සුදුසු වෙනවා.

මේ දේවලුත් අමතක කරන්න එපා

වෙන කෙනෙක් අමාරුවේ වැටෙන විදියේ බොරු කියලා ඒවා හෙළිවුණාම අනවශ්‍ය කලබල කරමින් අනුකම්පාව සොයන ආකාරයේ පුද්ගලයින්, ඔබේ සැබෑ හැඟීම් නොසලකා හරින සහ ඒවා ගැන සෝපාහාසාත්මක අදහස් පළකරන්නන්, තමන්ගේ වැරදි පිළිනොගෙන ඒවාගේ වගකීම වෙනත් අයට භාරදෙන මිනිසුන්, ඔබට නිසි ගෞරවයක් ලබානොදෙන ආකාරයේ පුද්ගලයින් සහ තමන්ගේ වැරැද්ද ඔබට භාර දී ගැලවිජ්ජාව වෙනුවෙන් බොරුවට සමාව ඉල්ලන පුද්ගලයින් අයිති වෙන්නෙත් ඇසුරට අහිතකර විසකුරු පුද්ගලයින් විදියටයි.

The post ඔබ අවට ඉන්න toxic පුද්ගලයින් හඳුනාගන්නේ මෙහෙමයි appeared first on Lady.lk | Lady | Women | Lifestyle | Health | Beauty.