සූදුරු

ප්‍රතිශක්තිය වර්ධනය කිරීමේ ගුණය අඩංගු සූදුරු, ආහාර දිරවීම පහසු කරවන්නටත් ආහාර රුචිය වඩවන්නටත් සමර්ථ වෙනවා. ශරීර ඌෂ්ණත්වය, යටි පතුල් දැවිල්ල, ශරීරයේ බිබිළි සහ කැසීම් යනාදී තත්ත්වයන් පාලනය කරන අතර ගර්භාෂය, ආමාශය සහ පෙනහළු ආශ්‍රිත රෝග පාලනය කරවන්නටත් සූදුරු වලට හැකියාව ඇති බව සඳහන් වෙනවා.

කොත්තමල්ලි

සිරුරේ ඇති තුන් දොස් (වාතය, පිත, සෙම) සමනය කරවීමට හැකියාව ඇති කුළුබඩුවක් විදියට හඳුන්වන කොත්තමල්ලි පානයක් ලෙස සකසා බීමෙන් සිරුර සිසිල් වන බව ඔබ අත්දැකීමෙන් ම දන්නවා ඇති. පිපාසය දුරු කරවන, ආහාර දිරවීමේ ක්‍රියාවලිය පහසු කරවන කොත්තමල්ලි වලින් මූත්‍ර පිටවීමේ ක්‍රියාවලියත් විධිමත් වන බව ආයුර්වේදයේ සඳහන් වෙනවා.

කහ

ප්‍රබල විෂබීජ නාශකයක් ලෙස හැඳින්විය හැකි කහ කියලා කියන්නේ සිසිල් ගුණය සහ වේදනා නාශක ගුණය අඩංගු ඖෂධයකි. තුවාල, කුෂ්ඨ, ලප කැළැල් ආදිය දුරු කිරීමටත්, රූපලාවණ්‍යයේදීත් බහුලව භාවිතා කෙරෙන කහ ඇදුම, ඉසරදය, කැස්ස යනාදී රෝග තත්ත්වයන් වලදීත් ඔසුවක් වශයෙන් ක්‍රියා කරනවා.

උළුහාල්

Protein, vitamin B12, vitamin C සහ potassium බහුල උළුහාල් මඳක් තිත්ත රසයකින් යුතු වුවත් මනා සුවඳකින් යුතු කුළුබඩු වර්ගයක් විදියට හඳුන්වන්න පුළුවන්. සිරුරේ ඇති අනවශ්‍ය මේදය, තරබාරු බව, දියවැඩියාව සහ cholesterol පාලනය කිරීමටත් සමත්කම් දක්වන උළුහාල් වෑංජන වලට එකතු කරනවාට අමතරව තම්බා පානයක් විදියට ලබාගන්නටත් හැකියාව තියෙනවා.

ගම්මිරිස්

පිළිකා නාශකයක්, bacteria නාශකයක් සහ ආහාර ජීර්ණය පහසු කරවන්නක් විදියට හඳුන්වන ගම්මිරිස් සෙම්ප්‍රතිශ්‍යාව, සෙම් රෝග සහ කැස්ස සුවකිරීම සඳහා ඖෂධයක් විදියටත් භාවිතා කරනවා. සිරුරේ අනවශ්‍ය බර පාලනය කර, සම පැහැපත් කරවන්නටත්, මානසික පීඩනය දුරු කරන්නටත් ‍සමත්කම් දක්වන කුළුබඩු වර්ගයකි. 

කුරුඳු

රුධිරයේ අඩංගු cholesterol වල ඇති හිතකර cholesterol (HDL) මට්ටම වැඩි කිරීමට හැකියාව ඇති අගනා කුළුබඩු වර්ගයකි. දියවැඩියාව පාලනයට සහ insulin ක්‍රියාකාරීත්වය වර්ධනය කිරීමටත් සමත්කම්  දැක්වුවත් දිනකට 2g කට වඩා ආහාරයට ගැනීම අහිතකර ප්‍රතිඵල ගෙන දෙන්නට හේතු විය හැකි බවත් අපි සිහිපත් කරනවා.

අබ

carbohydrate, protein, sodium, potassium, සීනි, සහ මේදය අඩංගු කුළුබඩු වර්ගයකි. රූපලාවණ්‍ය කටයුතුවලදීත්, සිරුරේ බර පලනය කිරීම සඳහාත් යොදාගත හැකි බව කියැවේ. වාතය, සෙම සමනය කරවන, ආහාර රුචිය වඩවන නමුත්, පමණ ඉක්මවා ආහාරයට ගැනීමත් එතරම් සුදුසු වන්නෙ නැහැ.

කරදමුංගු

ආහාර රුචිය වඩවන සුවඳැති කුළුබඩු වර්ගයකි. සෙම් රෝගවලට සහ මූත්‍රාබාධ වලට සහනය සලසයි.

සාදික්කා

මුවේ දුගඳ නසන අතර මුඛ රෝග, උදරාබාධ, සමේ රෝග සහ පණු රෝගවලට සහනය සලසයි.

ඉඟුරුපියළි

මුඛ දුර්ගන්ධය, විදුරුමස් සහ දත් ආශ්‍රිත රෝග සඳහා ඔසුවක් විදියට භාවිත කෙරෙනු ලබන ඉඟුරු පියලි වලට අතීසාරය සහ සෙම් රෝග සමනය කිරීමටත් හැකියාව ඇති බව සඳහන් වෙනවා.

සියඹලා

සිරුරේ තුන් දොස් සමනයට යොදා ගනියි. ආහාර රුචිය වඩවන අතර මළ බද්ධයට සහනය සලසයි.

කරපිංචා

රුධිරයේ විෂ නසන ඔසුවකි. හිසකෙස් ආශ්‍රිත ගැටළුවලට සහනය ලබාදෙන අතර අජීර්ණය, පණු රෝග, සමේ රෝග, මළ බද්ධය සහ cholesterol පාලනයට කදිම විසඳුමකි. 

කරාබු නැටි

බඩ පුරවා දැමීම, අජීර්ණය, ආහාර අරුචිය, දත් කැක්කුම සහ පණු රෝගවලට සහනය සලසන ඔසුවකි. අක්මාවේ සහ හදවතේ ක්‍රියාකාරීත්වය හොඳින් සිදු කිරීමට සහය වෙන බව සඳහන් වන අතර මව් කිරි වැඩවීමටත් උපකාරී වේ.

සුදුලූනු

උදරාබාධ, ස්නායු දුර්වලතා, සන්ධි ආශ්‍රිත රෝග සහ සිරුරේ වේදනා සමනයට භාවිතා වන අතර තරුණ බව රැකදෙන්නට සහ දීර්ඝායුෂ වැඩි කරවන්නට සමත් ඔසුවකි. බුද්ධිය වඩවයි. පිළිකා නාශකයක් වශයෙන් ද සලකනු ලබයි.

රතුලූනු

රුධිරයේ විෂ නැසීමට, ධාතු වර්ධනයට සහ වේදනාව සමනයට යොදා ගනු ලබයි. පණු රෝග, අර්ශස්, මුත්‍රා රෝග, ආහාර අරුචිය සහ සෙම් රෝග සඳහාත් ප්‍රතිකාරයක් ලෙස සළකනු ලබයි.

ගොරකා

උදරාබාධ සහ අජීර්ණය සමනය ක‍රන අතර රුධිරයේ විෂ නසනු ලබයි. Cholesterol, හදවත් රෝග සහ සිරුරේ බර පාලනයටත් , ආහාර කල්තබා ගන්නටත් යොදාගත හැකි ඔසුවකි.

මිරිස්

විෂබීජ නැසීමට, සෙම් සහ වාත රෝග පාලනයට, හදවතේ නිරෝගි බවට සහය වේ. ආහාර රුචිය වඩවයි.

දෙහි ආහාර රුචිය වඩවයි. විෂබීජ විනාශ කිරීමේ හැකියාව ඇත. හදවත් රෝග පාලනය කරන අතර රුධිරය සහ මූත්‍රා පිරිසිදු කිරීමේ හැකියාවට සමර්ථ ඔසුවකි.

The post කුළුබඩු සහ ස්වභාවික රසකාරක ගැන මේ දේවල් දන්නවා ද? appeared first on Lady.lk | Lady | Women | Lifestyle | Health | Beauty.

හොඳට හොයලා බලලා ගන්න

පොඩ්ඩාගේ protein අවශ්‍යතාවය සම්පූර්ණ කරන නිසාම ඔබ හැකි සෑමවිටම chicken ආහාර වේලට එකතු කරගන්නවා ඇති කියලා අපි හිතනවා. හැබැයි chicken මිලට ගන්නකොට ඔබ මිලට ගන්නා නිෂ්පාදනය කොයි තරම් සෞඛ්‍යාරක්ෂිතද කියලා හොඳට හොයලා බලලා ගන්න අමතක කරන්න එපා. විශේෂයෙන්ම පොඩි දරුවොන්ට දෙන කෑම බීම ගැන වඩ වඩාත් සැළකිලිමත් විය යුතු මේ වගේ කාලයක, ඔබ කුකුළු මස් මිලට ගන්නවා නම්, antibiotics, hormones, preservatives හෝ artificial additives එක් නොකළ නිෂ්පාදන ම මිලට ගන්න යොමුවෙන්න කියලා අපි මුලින්ම සිහිපත් කරනවා.

Neutritions

Raw Chicken breast 100g හි අඩංගු පෝෂක කොටස් තමයි පහතින් දැක්වෙන්නේ.

Calories                    114

Total Fat                    2.81g

Saturated                  0.55g

Polyunsaturated        0.4g

Monounsaturated       0.68g

Cholesterol                 68mg

Total Carbohydrate    0g

Dietary Fiber              0g

Sugars                        0g

Protein                        21.41g

Vitamins and Minerals

A             10µg                    C         0mg

B-6           0.79mg               B-12    0.2µg

D             0µg                     E          0.38mg

Calcium  5µg                      Iron 0.36mg

Magnesium 26.5mg           Zinc 0.66mg

Potassium 333mg              Sodium 109 mg

Muscle growth

ඉහත සටහනට අනුව නොපිසින ලද chicken breast ග්‍රෑම් 100ක protein සහ Amino acid බහුලව පවතිනවා. ඉතින් නිරන්තරයෙන් ම Protein බහුල ආහාර කෑම වේලට එකතු කරගැනීම පොඩ්ඩාගේ muscles වර්ධනය වීමට, අස්ථි ශක්තිමත් වීමට සහ උස යෑමට වගේම සිරුර ශක්තිමත් කරවන්නටත් උපකාරී වෙනවා. ඒ වගේම, ශාකමය ආහාර මඟින් ලැබෙන protein වලට වඩා සත්ත්වමය ආහාර ලබාගැනීමෙන් සිරුරට ලැබෙන protein ප්‍රමාණය වැඩි බවත් අමතක කරන්න එපා. chicken වල වෙනත් මස්වල තරමටම fat අඩංගු නොවීම නිසා නිරෝගී බරක් පවත්වාගෙන යාමට උපකාරී වීමත් මෙහි ඇති වාසිදායක ලක්ෂණයක් විදියට පෙන්වන්න පුළුවන්කම තියෙනවා.

Enhances the circulatory system

යකඩ අඩංගු ආහාර වැඩි වැඩියෙන් ලබා ගැනීමෙන් සිරුරේ hemoglobin මට්ටම වැඩි කරගැනීමට අවස්ථාව උදා වෙනවා. ඉතින් යකඩ අඩංගු ආහාරයක් වන Chicken කෑමට එකතු කරගැනීමෙන් පොඩ්ඩගේ සිරුරේ රතු රුධිරානු නිපදවීම හොඳින් සිදුවෙන අතර මෙය දරුවාගේ බුද්ධි වර්ධනයට හිතකර අයුරින් බලපානවා. ඒ වගේම කුකුළු මස්වල අඩංගු potassium මඟින් සිරුරේ ඇති රුධිර නාල නිරෝගීව තබා ගැනීමත් සිදුවෙනවා.

Boosts immunity

ප්‍රතිශක්තිකරණ ගැන වැඩි වැඩියෙන් කතා බහ කෙරෙන මේ දිනවල, වසංගත සහ ලෙඩ රෝගවලින් වැළකී නිරෝගීව සිටීමට නම් පොඩ්ඩාගේ ප්‍රතිශක්තිකරණ පද්ධතිය හොඳින් ශක්තිමත්ව තිබිය යුතු වෙනවා. Chicken වල අඩංගු zinc සහ magnesium වැනි ක්ෂුද්‍ර පෝෂක කොටස් විසින් ප්‍රතිශක්තිකරණ වර්ධනය කිරීමේ කාර්‍යය මැනවින් ඉටු කරන්නට සමත් වෙනවා. අසනීප වුණු පොඩ්ඩොන්ට chicken soup එකක් එහෙම දුන්නම සිරුරට සහනයක් ලැබෙන්නෙත් මේ හේතුව නිසාමයි.

Brain development

දරුවාගේ බුද්ධි වර්ධනය සඳහා බලපාන සාධක කිහිපයක් ම අතරින් ආහාරපාන වලට ලැබෙන්නේ ඉහළම ස්ථානයක්. Chicken වල බහුලව පවතින විටමින් B12 සහ choline විසින් පොඩ්ඩාගේ බුද්ධි වර්ධනය සහ ස්නායු පද්ධතියේ මනා ක්‍රියාකාරීත්වය සඳහාත්  විශාල මෙහෙයක් සිදු කරනවා.

Relieves stress

Tryptophan සහ vitamin B5 කියලා හඳුන්වන පෝෂක කොටස් ලබා ගැනීමෙන් පුද්ගලයෙක් තුළ පවතින කලබලකාරීත්වය අඩු කරවලා යම් සන්සුන් බවක් ගෙන දෙන බව පැවසෙනවා. පොඩ්ඩා ටිකක් කලබලකාරී වෙලා වගේ පෙනෙන දවසක ඒ ගතිය දුරු කරවන්න වගේම පොඩ්ඩගේ බණ්ඩිය හොඳින් පිරෙන්නත් එක්ක එයා කැමති විදියකට chicken ටිකක් හදලා දීලා බලන්න කියලා අපි යෝජනා කරනවා. මොකද chicken වලත් මේ කියන පෝෂක කොටස් අඩංගුවෙලා තියෙන නිසා.

Developing eyesight

Chicken වල අඩංගුවෙලා තියෙන vitamin A වලින් පොඩ්ඩාගේ ඇස් පෙනීම දියුණු වෙනවා වගේම, ප්‍රතිශක්තියත් වර්ධනය වෙනවා. ඉතින් මේ වගේ සිරුරට හිතකර කෑම බීම හරහා පෝෂණ අවශ්‍යතාවය සපුරාගන්න උත්සහ කරනවා නම් පොඩ්ඩට අමතර විටමින් වර්ග ලබාදෙන්න අවශ්‍ය වෙන්නෙත් නැතිවෙයි.

Promotes heart health

අධික තෙල් සහිත මස් වර්ග නිතර ආහාරයට ගැනීම මඟින්, cholesterol වැඩිවෙන්නත්, හදවත් රෝග හටගන්නත් ඉඩ තියෙනවා. හැබැයි විටමින් B6 අඩංගු chicken ආහාරයට ගැනීමෙන් එවැනි අහිතකර ප්‍රතිඵල ඇතිවීමට ඇති අවස්ථාව ඉතාමත් අවමයි කියලා කියන්න පුළුවන්. ඒ වගේම රතු මස් වර්ගවලට වල chicken වල saturated fat අවම වීමත්, omega -3 fatty acids අඩංගු වීමත් අමතර වාසියක් විදියට පෙන්වන්න පුළුවන්.

The post පොඩ්ඩා රස කරමින් කන chicken වල පෝෂණය ගැන හොයලා බලමුද. appeared first on Lady.lk | Lady | Women | Lifestyle | Health | Beauty.

නිල් කටරොළු 

ආහාරයට පමණක් නොව ඖෂධ හා රූපලාවන්‍ය නිෂ්පාදනයටත් භාවිතා කරන ඔසු පැළෑටියකි. පත්‍ර කලවම් පලා මැල්ලුමටත්, කැඳ සෑදීමටත් යොදා ගන්නා ගන්නා අතර මල් තම්බා පානයක් වශයෙන් සකසා ගැනීමේ හැකියාව තියෙනවා. නිල් කටරොළු ශාකය ආහාරයට එක්කර ගැනීමෙන් දියවැඩියාව, හදවත් රෝග,2 මානසික පීඩනය සහ ශරීරයේ බර පාලනය වන බවත්, නිය, සම සහ කෙස් කලඹේ නිරෝගී බවට හේතු වන බවත් කියැවෙනවා. 

සුදු හඳුන් 

රූපලාවන්‍ය කටයුතුවලට පාවිච්චි කරන සුදු හඳුන් ආහාරයට ගැනීමටත් හැකි බව ඔබ සමහරවිට නොදැන ඉන්නට ඇති. ළපටි දළු සම්බෝලයක් වශයෙනුත්, තරමක් මේරූ කොළ, කැඳ සහ මැල්ලුම් වශයෙනුත් ආහාරයට එක් කරගැනීමට හැකි අතර නිරෝගි සමක් ලබා දීම, ආහාර ජීර්ණය පහසු කරවීම, ශරීරය සිසිල් කිරීමට වැනි ප්‍රයෝජන ගණනාවක් එමඟින් ලබාගන්නට හැකි වෙනවා.  

පොල්පලා 

කලවම් පලා මැල්ලුම් හෝ කැඳ සෑදීමේදි භාවිතා කරන්න පුළුවන් ඔසු වර්ගයක් වන පොල්පලා, සියලුම මූත්‍රා රෝගවලට කදිම පිළියමක් විදියට හඳුන්වනවා. ඊට අමතරව තම්බා ඔසු පානයක් වශයෙන් ලබා ගැනීමටත් හැකියාව තියෙනවා.

ඇඹරැල්ලා දළු 

එළවලුවක් සහ පළතුරක් වශයෙන් ගෙඩි ආහාරයට එක් කරගන්නා නමුත් ඇඹරැල්ලා දළු එතරම් ප්‍රචලිත ආහාරයක් නම් නෙවෙයි. සාමාන්‍ය පලා කොළ සම්බෝලයක් ආකාරයටම සකස් කරගැනීමේ හැකියාව ඇති ඇඹරැල්ලා දළු පිළිකා, හෘද රෝග, වකුගඩු රෝග, අජීර්ණ සහ අර්ශස් සහ ශරීරයේ බර පාලනයට සහය වෙනවා. 

පැණි තෝර 

පැණිතෝර ශාකයේ කොළ සහ මල් මැල්ලුම් සඳහා යොදා ගන්නවා. අධිරුධිර පීඩනය සහ දියවැඩියාව පාලනය කරවන මේ ඔසුව ශරීරයේ හිමොග්ලොබීන් ඌණතාවයට පිළියමක් ද වන බව කියැවෙනවා. රුධිරය පිරිසිදු කර සම පැහැපත් කරවන පැණි තෝර ශාකය මළබද්ධය සහ මානසික පීඩනය අවම කරවන ඔසුවක් විදියටත් පාවිච්චි කරනවා. හැබැයි ගැබිණි සහ කිරිදෙන මව්වරුන්ගේ ආහාරයට එකතු කිරීම නම් එතරම් යහපත් නොවන බවත් අපි මතක් කරනවා.

ලුණුවිල  

බැමිතිරිය යන නමිනුත් හඳුන්වන ලුණුවිල පැළෑටිය, කොළ සම්බෝලයක් හෝ මැල්ලුමක් වශයෙන් ආහාරයට එක්කර ගැනීමේ හැකියාව තියෙනවා. ශරීරයේ ලේ වැඩීමට, ප්‍රතිශක්තිය වර්ධනයට, විශේෂයෙන්ම  මතක ශක්තිය වැඩීමට හා බුද්ධි වර්ධනයට හේතු වන පලා වර්ගයක් වන ලුණුවිල පැළෑටිය මඳ තිත්ත රසයකින් යුතු පලා වර්ගයක් වනවා. හැබැයි, කොළ සම්බෝලයට යහමින් දෙහි ඇඹුල් එක්කර ගැනීමෙන් මේ තිත්ත රසය මඟහරවා ගන්න පුළුවන්කම තියෙනවා.

හීන් බෝවිටියා 

අලංකාර පුෂ්පයක් සහිත හීන් බෝවිටියා ශාකයේ පත්‍ර, කැඳ සහ කොළ සම්බෝල වශයෙන් සකසා ආහාරයට එක් කරගැනීමේ හැකියාව තියෙනවා. සෙංගමාලය සහ කොලොස්ට්‍රෝල් පාලනය කරවන ඔසු වර්ගයකි. හීන් බෝවිටියා පත්‍ර පමණක් යොදා සකස් කරගන්නවාට වඩා, වෙනත් කොළ වර්ග සමඟ මිශ්‍ර කර කැඳ සහ සම්බෝල පිළියෙල කරගැනීම වඩාත් සුදුසු වෙනවා.

නීරමුල්ලිය  

ඉකිරිය යන නාමයෙන්ද හැඳින්වෙන නීරමුල්ලිය, ජලාශ්‍රිතව පැළවෙන පැළෑටියකි. නිතර ආහාරයට එක් කර ගැනීමට නුසුදුසු වුවත් මූත්‍රා රෝගවලට, ලිංගික බෙලහීනතාවයට, දියවැඩියාවට, අධික රුධිර පීඩනයට සහ ප්‍රදාහ තත්ත්වයන්ටද ඉතා ගුණ දෙන ප්‍රතිකාරයක් වශයෙන් සැළකෙනවා. ළපටි නීරමුල්ලිය දළුවලට යහමින් දෙහි ඇඹුල් එක් කර සම්බෝලයක් ලෙස සහ කැඳ වශයෙන් පිළියෙල කරගැනීමේ හැකියාවද තියෙනවා.

කරපිංචා 

සාමාන්‍යෙන් කරපිංචා භාවිතා කරන්නේ ව්‍යංජන රස ගන්වන්න වුණත් ව්‍යංජනයේ ඇති කරපිංචා කොළය කෑමට ගන්න නම් අපි පෙළඹෙන්නේ නෑ. මේ නිසා සතියකට වතාවක්වත් කරපිංචා දළු සම්බෝලයක්, ලුණු මිරිසක් එහෙමත් නැත්තන් කැඳ විදියට හෝ ආහාරයට ගැනීමෙන් බොහෝ සෞඛ්‍යමය වාසි ඔබට අත් වෙනවා. යකඩ සහ විටමින් (A, C) අඩංගු කරපිංචා, කොලොස්ට්‍රෝල්, හෘද රෝග, අජීර්ණ තත්ත්ව, දියවැඩියාව, පිළිකා පාලනය කරන සහ තරුණ බව රැකදෙන ඖෂධයක් වශයෙන් සැළකෙනවා.

The post ආහාරයට එකතු කරගන්න පුළුවන් ගුණදායක පලා කොළ වර්ග. appeared first on Lady.lk | Lady | Women | Lifestyle | Health | Beauty.

Vegetable soup with noodles

සෞඛ්‍යට හිතකර, පහසු රෑ කෑමක් කීවම බොහෝ දෙනෙක්ට එක සැරේටම මතක් වෙන්නේ soup එකක් තමයි. Soup වර්ග ගොඩක් තිබ්බත් මේ කියන්නේ එළවලු විතරක් එකතු කරලා හදන soup එකක් ගැනයි. ප්‍රමාණයක් රසය සහ අවශ්‍යතාවය අනුව වෙනස් කරගන්න පුළුවන්.

අවශ්‍ය ද්‍රව්‍ය:- සුදු ළූණු, ඉඟුරු paste  ස්වල්පයක්, සෝදාගත් පරිප්පු ස්වල්පයක්, නූඩ්ල්ස් ස්වල්පයක්, ලුණු, ගම්මිරිස් කුඩු, රතු ළූණු, දෙහි යුෂ, කරපිංචා, කැරට්/ ගෝවා/ බෝංචි/ ලීක්ස් වගේ කැමති එළවලු වර්ග.

සාදාගන්නා ආකාරය:- මුලින්ම ප‍රිප්පු ටික, කරපිංචා, ඉඟුරු, සුදු ළූණු සහ රතු ළූනු තැම්බෙන්නට තියන්න. පරිප්පු ටික තැම්බීගෙන එනකොට එයට පොඩියට කැපූ එළවළු එකතු කරන්න. අවසානයට ලුණු ගම්මිරිස් එකතු කරලා ලිපෙන් බාගන්න. මේ මිශ්‍රනයෙන් කරපිංචා ඉවත් කර නිවෙන්නට ඉඩ හරින්න. ඒ අතරතුරේ නූඩ්ල්ස් ටික තම්බා වතුර බේරෙන්නට තියන්න. නිවාගත් සුප් මිශ්‍රනය cream එකක් වෙනතුරු blend කරගෙන අවසානයට නූඩ්ල්ස් සහ දෙහි යුෂ එකතු කරගන්න.

පෝශ්‍යදායි සලාදයක්

ආහාර පාලනය කරන කෙනෙක්ට රෑ කෑමට ගන්න පුළුවන් විදියේ සලාදයක් තමයි මේ. බොහොම රසවත් සලාදයක් නිසා පොඩි බබාලා වුණත් මේකට අකමැති වෙන්නේ නැතිවෙයි. ප්‍රමාණය තමන්ගේ කැමැත්ත අනුව වෙනස් කරගන්න පුළුවන්.

අවශ්‍ය ද්‍රව්‍ය:- ගෝවා, කැරට්, පිපිපිඤ්ඤා, අමු මිරිස්, බී ළූණු, mayonnaise sauce, තැම්බූ  බිත්තර 1, කටු රහිත chicken කැබැල්ලක්, ලුණු, ගම්මිරිස්, තක්කාලි.

සදාගන්නා ආකාරය :- ලුණු සහ ගම්මිරිස් ස්වල්පයක් එකතු කර chicken කැබැල්ල තම්බාගන්න. ඒ අතරේ ගෝවා, කැරට්, අමු මිරිස් සහ ලොකු ළූණු ඉතා සිහින්ව කපාගන්න. තම්බාගෙන සිහින්ව ඉරාගත් මස්, සිහින්ව ලියාගත් එළවලු, mayonnaise සහ ගම්මිරිස් හොඳින් මිශ්‍ර කරගන්න. කෑමට ගන්නා වෙලාවට ලුණු, තැම්බූ බිත්තරය, කැබලි කපාගත් තක්කාලි සහ පිපිඤ්ඤා එකතු කරගන්න.

Oats කොත්තු

ඕට්ස් කන්නේ උදේට කියලාවත්, කොත්තු හදන්නේ පාන්පිටි රොටීවලින් කියලවත් නීතියක් නෑනේ නේද? ඒ හන්දා අපි හදමු oats වලින් පෝෂ්‍යදායි කොත්තුවක්.

අවශ්‍ය ද්‍රව්‍ය:- rolled oats කෝප්පයක්, කටු රහිත chicken කැබැල්ලක්, බිත්තර 1, ඉඟුරු, සුදු ළූණු, ළූනු, රම්පේ, කරපිංචා, එළවලු වර්ග කිහිපයක්, ලුණු සහ ගම්මිරිස් කුඩු, තක්කාලි ගෙඩියක්.

සදාගන්නා ආකාරය:- සාමාන්‍යෙන් ඔබ මිරිසට මස් පිසගන්නා ආකාරයට, හොඳි සහිතව කුකුළු මස් පිසගන්න. ඒ අතරේ Oats ටික බෙරි නොවෙන ආකාරයට ස්ටීම් කරගන්න. ඉඟුරු, සුදුළූණු, රම්පේ, කරපිංචා, ළූණු, තක්කලි සහ එළවලු ටික තෙල් ටිකකින් තෙම්පරාදු කරගන්න. එයට බිත්තරය සහ අවසානයට chicken කැබලි එක් කරන්න. මේ තෙම්පරාදුවට ස්ටීම් කරගත් oats, මස් හොඳි සහ රස අනුව ලුණු ගම්මිරිස් එකතු කරගන්න.

Egg pastry

කොච්චර කෑවත් එපා වෙන්නේ නැති කෑමක්නේ pastry කියන්නේ. Pastry sheets ගෙදර හදාගන්න අමාරුයි වගේ නම් මිලට ගන්න තියෙනවා. වෙනදාට නානාප්‍රකාර දේ දාලා හදන pastry එකක් ලේසි ක්‍රමේකට හදාගෙන රෑ කෑමට එකතු කරගන්නේ කොහොමද කියලා බලමු.

අවශ්‍ය ද්‍රව්‍ය:- pastry sheets, බිත්තර, mozzarella චීස්, ලුණු, ගම්මිරිස් කුඩු.

සදාගන්නා ආකාරය:-  පැකට්ටුවේ සඳහන් කර ඇති ආකාරයට තුනී කරගත් pastry sheet එක රවුම් හැඩයට කපාගන්න. Butter තැවරූ හෝ තෙල් කඩදාසියක් අතුරාගත් ට්‍රේ එකක යම් පරතරයක් ඇතිව මේ රවුම් කිහිපය තියාගන්න. Pastry sheet රවුම වටේට අඟල් භාගයක පමණ ඉඩක් තියාගෙන මැදින් නැවත රවුමක් සටහන් කරගන්න. වෙන් නොවෙන විදියට ප්‍රවේසමෙන් mark කරගත් මැද රවුමේ තැනින් තැන ගෑරප්පුවකින් ළාවට සිදුරු කරගන්න. ඉන් පසු 200°ට preheat කරගත් අවන් එකක විනාඩි 7-8ක් පමණ කාලයක් bake කරගන්න. (වටේ ඉතුරු කරගත් කොටස උඩට එසවෙනකන්). ඉවතට ගත් pastry රවුම් මැදට mozzarella cheese දමා ඊට උඩින් ප්‍රවේශමෙන් බිත්තරයක් කඩා දමන්න. ඊට උඩින් ලුණු ගම්මිරිස් ඉස නැවත විනාඩි 10-12ක් bake කරගන්න.

Tomato and Carrot rice

ඉක්මනින් පිසගෙන, curry එකක් නැතුව වුණත් කන්න පුළුවන් බතක් තමයි tomato and carrot rice කියලා කියන්නේ. රෑට බත් නොකාම බැරිනම්, හැබැයි ගොඩක් දේවල් උයන්නත් අමාරුයි නම් මේ rice එක හොඳම විසඳුමක් වෙන්න ඉඩ තියෙනවා.

අවශ්‍ය ද්‍රව්‍ය:- බෙරි නොවෙන්න උයාගත් බත් කෝප්පයක්, සාමාන්‍ය ප්‍රමාණයේ තක්කාලි ගෙඩියක්, ළූණු ගෙඩියක්, සුදු ළූනු බික් 1, අබ, ඉඟුරු ස්වල්පයක්, බිත්තර 1, පොතු හැරගත් රටකජු හෝ කජු ටිකක්, කැරට් අලයක්, තුනපහ ස්වල්පයක්, කහ කුඩු ස්වල්පයක්, කුඩා කුරුඳු පොත්තක්, ලුණු, කැමති වර්ගයකින් තෙල් හෝ බටර්.

සදාගන්නා ආකාරය:- තෙල් රත්කර අබ ඇට ටිකක් දමා පිපිරෙන්නට ඉඩ හරින්න. ළූණු, සුදු ළූණු, රම්පේ, කරපිංචා, ඉඟුරු, කුරුඳු පොත්ත, කහ කුඩු ස්වල්පයක්, තුනපහ කුඩු ස්වල්පයක් තෙම්පරාදු කරගන්න. මෙයට කුඩා කැබලි කපාගත් තක්කාලි සහ grate කරගත් කැරට් එකතු කර විනාඩි 5ක් තෙම්පරාදු කර අවසානයට බිත්තරය එක් කර විනාඩියක් පමණ කාලයක් පිසගන්න. අවසානයට රස අනුව ලුණුත්, පිසගත් බත් සහ රටකජු ටිකත් එක් කරගන්න.

The post රසවත් ගුණවත් රාත්‍රී ආහාර වේල් 4ක් appeared first on Lady.lk | Lady | Women | Lifestyle | Health | Beauty.

Oats omelette 

බඩත් හොඳට ම පුරවන හැබැයි කැලරි ප්‍රමාණයෙන් අඩු කෑමක් තමයි ඕට්ස් කියන්නේ. ඕට්ස් කන්න පුලුවන් පළතුරු එක්ක විතරක් නෙවෙයි. මෙන්න මේ විදියට Oats වලින් සැරට රසට omelette හදන්නත් පුළුවන්.

අවශ්‍ය ද්‍රව්‍ය- Steel cut / Rolled කියන වර්ග දෙකෙන් ඕනෑම වර්ගයක ඕට්ස් මේස හැඳි 4ක්, උණු වතුර, බිත්තර 2, ලුණු, සිහින්ව ලියාගත් පොඩි ප්‍රමාණයේ බී ළූණු ගෙඩි 1, සිහින්ව ලියාගත් අමු මිරිස් කරල් 2, ගම්මිරිස් ස්වල්පයක්, කෑලි මිරිස් ස්වල්පයක්

සදාගන්නා ආකාරය- Oats ටික උතුරන වතුරට දාලා විනාඩි 5ක් පොඟවගෙන හොඳින් වතුර ඉවත් කරගන්න. බිත්තර දෙක සහ අනෙකුත් සියලුම ද්‍රව්‍ය මිශ්‍ර කර හොඳින් ගසාගන්න. එයට ඕට්ස් එකතුකරලා සාමාන්‍ය omelette එකක් හදාගන්න විදියටම පිසගන්න. කැමති නම් විතරක් තක්කාලි සහ චීස් එකතු කරගෙන රසය වැඩි කරගන්න පුලුවන්.

දිය බත්

Gastritis වලට හොඳම බෙහෙතක් තමයි දියබත් කියන්නේ. ඒ වගේම Vitamin B සහ C ඇතුළු ශරීරයට අවශ්‍ය පෝෂක කොටස් අඩංගු දියබත් හදාගන්න එක එතරම් අමාරු දෙයකුත් නෙවෙයි.

අවශ්‍ය ද්‍රව්‍ය:- රාත්‍රියේ පිසගෙන ඉතිරි වූ බත්, දෙහි ඇඹුල්, ලුණු, රතු ළූණු, තක්කාලි, උම්බලකඩ, උකු පොල් කිරි, අමු මිරිස් 

සදාගන්නා ආකාරය:- රාත්‍රියට පිසගත් බත් එම භාජනයේම ඉතිරි කර වතුර එකතු කරන්න. ඒ බත්වලට ඉඳුල් මුසු වෙලා හෝ බත අතින් අල්ලලා තියෙන්න බෑ. එහෙම වුණොත් බත් නරක් වෙන්න ඉඩ තියෙනවා. බත්වලට වතුර උරාගෙන වතුර ටික හිඳිලා තියෙන විදිය උදේට දකින්න ලැබේවි. මේ බත්වලට උකු පොල් කිරි, සිහින්ව කපාගත් අමු මිරිස්, ගම්මිරිස් ස්වල්පයක්, ලුණු, දෙහි යුෂ, කැපු තක්කාලි, සිහින්ව ලියාගත් උම්බලකඩ සහ සිහින්ව ලියාගත් රතු ළූනු එක් කර ආහාරයට ගන්න පුළුවන්.

තෙම්පරාදු කරගත් කඩල

පොලුයි ලුණු මිරිසුයි එක්ක කඩල කාලා ඇතිවෙලා වගේ ද? කඩල ටික මේ විදියට තෙම්පරාදු කරගත්තොත් නම් ගෙදර හැමෝම බොහොම කැමැත්තෙන් රස බලන්න ඉඩ තියෙනවා.

අවශ්‍ය ද්‍රව්‍ය- තම්බාගත් කඩල, සිහින්ව ලියාගත් බී ලූණු, කැබලි කපාගත් පොල්, සිහින්ව ලියාගත් කැරට්/ බෝංචි/ ගෝවා/ ලීක්ස් හෝ ළූණු කොළ, කෑලි මිරිස්, කපාගත් අමු මිරිස්, කරපිංචා, ලුණු, අබ සහ පොල්තෙල්

සදාගන්නා ආකාරය:- තෙල් රත්කර අබ එකතු කර පිපිරෙන්නට තියා පොල්, බී ලූණු සහ කරපිංචා එක් කරන්න. එයට එළවලු, අමු මිරිස් සහ කෑලි මිරිස් එකතු කර මඳ වෙලාවක් පිසගන්න. ‍අවසානයට කඩල සහ රස අනුව ලුණු එකතු කරගන්න.

Fruit smoothie

අතිරේක ආහාර වේලක් හෝ අතුරුපසක් විදියට අපි කෑමට ගන්න පළතුරු උදෑසන ආහාරයටත් කදිමයි. නිතරම Salad හදලා කන්නේ නැතුව smoothie එකක් විදියටත් හදලා රස බලන්න කියලා අපි යෝජනා කරනවා. මේ fruit smoothie එක තමන්ට කැමති වර්ගවල පළතුරු එකතු කරලා හදාගන්න පුලුවන්.

අවශ්‍ය ද්‍රව්‍ය:- පැපොල් කැබැල්ලක්, අඹ කැබැල්ලක්, කෙසෙල් ගෙඩියක්, දෙහි යුෂ ස්වල්පයක්, vanilla බිඳුවක්, අයිස් කැට, fresh milk/ තැඹිලි වතුර/ වතුර වර්ගවලින් එකක්. 

සදාගන්නා ආකාරය:- සියලුම ද්‍රව්‍ය blender එකේ දාලා මිශ්‍ර කරගන්න විතරයි තියෙන්නේ. අවශ්‍ය නම් විතරක් ලුණු සහ සීනි ස්වල්පයක් එකතු කරගන්න පුළුවන්.

පෝෂණ රොටී

හැමදාම කන රොටිය මේ විදියට වෙනස් කරලා පෝශ්‍යදායි විදියට හදාගත්තොත් උදේ කෑම වේලක් විදියට වුණත් අරගන්න පුළුවන්කම තියෙනවා.

අවශ්‍ය ද්‍රව්‍ය:- කුරක්කන් පිටි සහ පාන් පිටි සමාන ප්‍රමාණවලින්, ගාගත් පොල්, grate කරගත් කැරට්, කපාගත් ගොටුකොළ, ඉතා කුඩාවට කපාගත් කරපිංචා ස්වල්පයක්, කපාගත් රතු ළූණු, කුඩාවට කපාගත් අමු මිරිස්, ලුණු, බිත්තර 1ක්.

සදාගන්නා ආකාරය:- පිටි දෙවර්ගය අඩුවෙනුත් පොල් සහ කැරට් වැඩි වශයෙනුත් එකතු කරලා හදාගන්නවා නම් මේ රොටිය වඩා රසවත් වෙනවා. සියලුම ද්‍රව්‍ය මිශ්‍ර කරලා අවශ්‍ය නම් විතරක් වතුර ස්වල්පයක් එකතු කරලා අනාගෙන සාමාන්‍ය විදියටම රොටිය හදාගන්න. බටර් හෝ ලුනු මිරිස් එක්ක කෑමට ගන්න පුළුවන්.

The post උදෑසන ආහාරට රසවත් ගුණවත් ආහාර වර්ග 5ක් appeared first on Lady.lk | Lady | Women | Lifestyle | Health | Beauty.

හාල්මැස්සො බැදුමට තක්කාලි

කඩවලින් ලැබෙන හාල්මැස්සො බැදුම ගැන පොඩ්ඩක් මතක් කළොත් සිහිපත් වේවි, දැවිල්ල වැඩි, අමු මිරිස් යොදාපු, ළූනු සහ තක්කාලි යොදාපු රස බැදුමක්. මේ බැදුම රසම රස බැදුමක් බව මතක තිබුන නිසා ආයෙත් හදන්න හෝ ආයෙත් කන්න යන්න එපා. අපි එහෙම එපා කියන්නෙ ඇයි කියල දැන් කියන්නම්. මේ හේතුව ඔයාට දිගු කාලීනව බලපාන හේතුවක්. ඒ තමයි මේ සංයෝගය නිසා ඔයාගෙ මුත්‍රාශයේ ගල් ඇති වෙන්නට ඉඩ තිබීම. මුත්‍රාශයේ ගල් ඇති වීම ගැන ලොකු අදහසක් නැත්තං, එයින් පීඩා විඳින කෙනෙකුගෙන් අහන්න. එය දරන්නට අමාරු අපහසුවක්.

මඤ්ඤොක්කා පෙති එක්ක ඉඟුරු තේ

ලංකාවෙ ප්‍රසිද්ධම අහිතකර ෆුඩ් කම්බිනේෂන් එක තමයි මේ. ඕනම වැඩිහිටියෙක් පොඩි දරුවෙකුට එපා කියන දෙයක්. මේවා ආහාරයෙන් සමහරු මැරුණා කියලා පවා අපිට කුඩා කාලයෙදි අහන්න ලැබුණු ප්‍රවෘත්ති ඔයාගෙත් මතකයේ ඇති. මේ කියන්නෙ ඉඟුරු එක්ක මඤ්ඤොක්කාවල බහුල එන්සයිමයක් ප්‍රතික්‍රියා කිරීමෙන් ඇති වෙන තත්ත්වයක් ගැන. ඉතිං මඤ්ඤොක්කා පෙති එක්ක ඉඟුරු තේ විතරක් නෙමෙයි, තැම්බූ මඤ්ඤොක්කා එක්ක ඌරුමස්, උයාගත් මඤ්ඤොක්කා එක්ක කුකුළු මස් වුණත් මේ ඉඟුරු යෙදවූ ආහාර කම්බිනේෂන් එකක් නිසා සිරුරට අහිතකර වෙන්නට පුළුවන්.

වතුරයි කෑමයි

කෑම කන ගමං වතුර ගොඩක් බොන්න එපා. කාලා ඉවර වෙලත් වතුර ගොඩක් බොන්න එපා කියලයි අපිට වැඩිහිටියො කිවුවෙ. ඒ ඇයි කියල අපි ප්‍රශ්න අහන්න ගියේ නැතුවට ඒ ඇයි කියල කියන්නයි දැන් හදන්නෙ. වතුර නිසා අපේ උදරයේ ඇති බොහෝ ඇසිඩ් වර්ග දියවී යනවා. ඒ නිසා කන ගමන් හෝ කෑ විගස වතුර ගොඩක් පානය කිරීම ආහාර දිරවීමේ ක්‍රියාවලියට බාධාවක්. මේ බාධාව නිසා ආහාර නොදිරවා ඔබ මහත් වීමට වගේම, කුස තුළ නොයෙක් අපහසුතා හට ගැනීමටත් පුළුවන්. 

කිරියි කෙසෙලුයි

මේක නං සමහරු අපි එක්ක තරහ වෙන්නත් හේතුවක් වේවි. නමුත් අපි මේ ඇත්ත කියන්නෙ ඔයාගෙම හොඳට. වැඩ කරලා මහන්සි වෙලාවට කවුද ආසා නැත්තෙ රසම රස කූල්ම කූල් බනානා මිල්ක්ෂේක් එකක්. මතක් වෙද්දිත් රස දැණුනා නේද? හැබැයි ප්‍රශ්නයක් තියෙනවා. මේ ආහාර දෙකම අධික ප්‍රෝටීන් පිරි නිසා ඔයාගෙ ආහාර දිරවීමේ ක්‍රියාවලිය තරමක් අසීරු කරවනවා. ඒ කරලත් බනානා මිල්ක්ෂේක් බොන්න ආසයි නම් සාදික්කා ස්වල්පයක් හෝ කරදමුංගු ස්වල්පයක් එකතු කරගන්න එක ඇඟට ගුණ වේවි.

මස් එක්ක අල

බීෆ් බර්ගර් එකක් එක්ක ෆ්‍රෙන්ච් ෆ්‍රයිස් ලැබෙනවා. හැම ගෙදරකම වගේම කඩේකමත් දවසේ ආහාර වේලට අනිවාර්යයෙන් චිකන් සහ අල දකින්න ලැබෙනවාමයි. ඉතිං අපි ඇයි මස් එක්ක අල කන්න එපා කියන්නෙ? මේ දෙක දිරවන්න අවශ්‍ය වෙන්නෙ දෙවිදියක සාන්ද්‍රණ. ඉතිං ඔයාගේ ආහාරය දිරවාගන්න සිරුරට අපහසුයි. ඒ වෙනුවෙන් විශාල කාලයක් සහ ශක්තියක් සිරුරට වැය වෙනවා. ඉතිං මේ වැඩේම තවත් දකින්න ලැබෙන ආහාරයක් තමයි විදෙස් රටවල අතිශය ප්‍රසිද්ධ බේකන් සහ බිත්තර කියන සංයෝගයත්. ඒ හේතුවත් මේකමයි.

පිපිඥ්ඤා සලාදෙට තක්කාලි

සාමාන්‍යයෙන් ගෙදර හදන පිපිඤ්ඤා සලාදෙට එකතු වෙන අනුපාන අතරේ ළූනු, අමු මිරිස්, තක්කාලි, උම්බලකඩ වගේ දේවල් තියෙනවා. මේ ජාති දෙක ජීර්ණය වෙන්නට ගත වෙන අස්වාභාවික කාල අන්තර දෙක එක්ක බලද්දි මේ වැඩේ නිසා ඔයාගේ ජීර්ණ ක්‍රියාවලියම අතරමං වෙන සිදුවීමක් වෙන්නට පුළුවන්. ඉතිං මේ දෙකත් එකට නොකා හිටියොත් හොඳයි.

හොඳම නැද්ද?

අපි මේ සඳහන් කරපු සමහර දේවල් ඔයාලා නිතර ආහාරයට ගන්නා දේවල් වෙන්න ඇති. ඒ නිසාම මේක බොරුවක් කියලා ඔයාලට හිතේවි. නමුත් අපි මේ කියන්නෙ පූර්ණ ආහාර විෂවීමක් ගැන නෙමෙයි. සිරුර අභ්‍යන්තරයේ සිදු වන දේවල් ඔබට දැනෙන්නේ වෙනස් විදිවලට. ඒ නිසාම අපි මේ කියන ආහාර අරගෙන ඔබට අත්දකින්නට ලැබුණු අපහසුතා ඔබට සාමාන්‍ය​ දේවල් විය හැකියි. හිසරදයක්, වැසිකිලි යෑමේ අපහසුවක්, ආහාර අජීර්ණයක්, බඩ දැවිල්ලක්, උගුර දැවිල්ලක්, වැනි තත්ත්ව විදියටත් මේ කියන අපහසුතා ඇති වෙන්නට පුළුවන්.

The post මේ දේවල් එකට කන එක බඩට තරමක් අහිතකර වේවි appeared first on Lady.lk | Lady | Women | Lifestyle | Health | Beauty.

The post ඉස්සෝ බැඳුමට මුරංගා කොළ දැමීමේ වාසි appeared first on Lady.lk | Lady | Women | Lifestyle | Health | Beauty.

යෝගට්

අතීතයේ සිටම සම පැහැපත් කරගැනීමේ ක්‍රම වේදයන් අතරට යෝගට් ඇතුළත්ය. පුරාණ ඊජිප්තුවේ ක්ලියෝපැට්‍රා පවා ඇගේ සම පැහැපත් කරගැනීම වෙනුවෙන් දිනපතා කිරි ස්නානය කළ බවට තොරතුරු ඇත. සුන්දර සමක් සඳහා සිදු කෙරෙන සත්කාර අතර අද වන විටත් ප්‍රමුඛස්ථානයක් ගන්නා කිරි නිෂ්පාදයක් වන යෝගට්වල ඔබේ සමෙහි පෝෂණයට අත්‍යවශ්‍ය පෝෂ්‍ය පදාර්ථ හතරක් ඇතුළත් වේ.

සින්ක්

යෝගට් ග්‍රෑම් 100ක සින්ක් මිලිග්‍රෑම් 1 ඇතුළත් වන අතරම එමගින් සමෙහි තෙල් ගතිය නියාමනය කරමින් සමට සිසිලසක් ගෙන දේ.

ලැක්ටික් අම්ලය

මෙය යෝගට්වල ප්‍රධාන සංඝටකයක් වන අතරම එමගින් සම ආරක්‍ෂා කරයි. සම රැලිවැටීම පාලනය කරයි.

කැල්සියම්

මෙහි ඇති ප්‍රතිඔක්සිකාරක ගුණය නිසා සැමවිටම සමට නැවුම් පෙනුමක් එක්කරයි. සමෙහි වියලි බව නැති කරයි.

විටමින් බී

විටමින් බී2, බී12, බී5 යන විටමින් බී ප්‍රභේද කිහිපයක්ම යෝගට්වල අඩංගු වේ. මෙම ප්‍රභේද මගින් සම මත තෙතමනය රැකදෙමින් දිලිසෙන සමක් ඔබට ලබා දේ. එසේම සමෙහි සෛල ආරක්‍ෂා කරයි. සෛල වර්ධනයට මෙන්ම ප්‍රතිජනනය කිරීම සඳහා ද විටමින් බී දායක වේ. බී5 මගින් සිදු කෙරෙන විශේෂ කාර්යයක් වන්නේ සෛල තුළ සෞඛ්‍ය සම්පන්න මේද නිෂ්පාදනයට ක්‍රියා කිරීමයි.

මී පැණි

සුන්දර සමකට ඇලුම් කළ අතීතයේ ලලනාවන් පවා භාවිත කරන ලද මී පැණි ද පෝෂක කොටස් රැසකින් යුක්තය. මී පැණිවල ආහාරමය වටිනාකම පිළිබඳ සොයා බැලුවහොත් ස්වභාවික සීනි (ග්ලූකෝස්) 80% ක්ද ජලය 18%ක්ද ඛනිජ ලවණ සහ ප්‍රෝටීන් 2%ක්ද අන්තර්ගත වේ. එසේම මී පැණි විටමින් වර්ගවලින් ද ඛනිජ වර්ග වලින් ද පෝෂිතය.

මෙසේ පෝෂක කොටස් රැසකින් පරිපූර්ණ මී පැණි සම මත ඉතා හොඳ පවිත්‍රකාරකයක් ලෙස ක්‍රියා කරයි. එසේම සම මත වූ ලප කැළැල් ඉවත් කර සම පෝෂණය කරමින් දිදුළන පැහැපත් සමක් ලබා දෙයි. යෝගට් සහ මී පැණි ඔබේ සමට ඉතා උසස් සුසංයෝගයක් වනු නිසැකය. දිදුලන සුන්දර සමක් උදෙසා පෝෂක කොටස් රැසකින් යුතු මෙවැනි ස්වභාවික දේ සමගින් සිරුරට හිතකර රූපලාවන්‍ය ක්‍රම අනුගමනය කිරීමට උනන්දුවන්න.

The post ආහාරයට වගේම හැඩ වෙන්නත් යෝගට් භාවිතා කරමු appeared first on Lady.lk | Lady | Women | Lifestyle | Health | Beauty.

සූදුරු හිතකර මේද අම්ල වලින් ද යකඩ මැග්නීසියම් පොටෑසියම් තඹ වැනි ඛනිජ ලවණ වලින්ද විටමින්-A, විටමින්-B3, විටමින්-C වැනි විටමින් වලින්ද පොහොසත් වන අතර ශරීරයට වැඩිපුර හිතකර නොවන සෝඩියම් සහ සංතෘප්ත මේද අම්ල එහි අඩංගු වන්නේ ඉතා සුළු ප්‍රමාණ වලිනි.

එම නිසා සුදුරු දිනපතා ආහාරයට එක්කර ගැනීමෙන් ඔබට සෞඛ්‍ය ප්‍රතිලාභ රාශියක් අත්විඳීමට හැකිවේ.

ඒවා පහත පරිදි දක්වන්න පුළුලුවන්

1. සූදුරු වල් අති සුවිශේෂී රසය හා සුවඳ හේතු කොටගෙන ආහාර ජීරණයට උදවුවන ඛේට ග්‍රන්ථි හා ආමාශයික ශ්‍රාවයන් උත්තේජනය වීම සිදුවේ. එම්ගින් අපේ ආහාර ජීරණය පහසු කරයි.
2. සූදුරු වල් අති සුවිශේෂී සංඝටක හේතුවෙන් සූදුරු සුවිශේෂී ප්‍රතිඔක්ෂිකාරක ගුණයන් පෙන්නුම් කරයි. අප සාමාන්‍යයෙන් භාවිතා කරන කුළුබඩු හතෙන් (කොත්තමල්ලි සූදුරු, එනසාල්, සුදු ලුණු, කුරුදු පොතු ඇතුළුව) ගෙන කරන ලද පර්යේෂණයකින් හෙළිවී ඇත්තේ ඒ අතරින් සූදුරු ඉහළම ප්‍රතිඔක්සිකාරක ක්‍රියාකාරීත්වයක් පෙන්නුම් කරන බවයි. එය විටමින්-C යනුවෙන් හඳුන්වන ඇස්කෝබික් අම්ලයටද වඩා ඉහළ බව වාර්තා වේ. එමගින් අකලට වයසට යාමද පිළිකා ද තෙල් තැන්පත්වී ධමනි සිහින් වීම සහ ස්නායු විකෘතිතා වැනි රෝගාබාධ ද වැළැක්වීමට උපකාරී වේ.
3. එමෙන්ම රුධිරයේ කොලෙස්ට්‍රෝල් සහ අනෙකුත් ලිපිඩ අඩු කිරීමේ ගුණයක්ද සූදුරු වල පවතී. එය රුධිරයේ කොලෙස්ට්‍රෝල් සංයුතියේ හැම සංඝටකයක්ම වැඩි දියුණු කරයි. (HDL කොලෙස්ටර්රෝල්, LDL කොලෙස්ට්‍රෝල් , Total කොලෙස්ටරෝල්, ට්‍රයිග්ලිසරයිඩ්)
4. සූදුරු මගින් රුධිර පීඩනය අඩුකරන බවට පර්යේෂණවලින් සොයාගෙන ඇත.
5. සූදුරු වල ඇති ප්‍රතිඔක්සිකාරක ගුණය ද රුධිරයේ ලිපිඩ සංයුතිය වැඩි දියුණු කිරීම මගින් ද පට්ටිකා එකතුව වීම වැලැක්වීම මගින් ද ධමනි වල තෙල් තැන්පත් වී සිහින් වීම වැලක්වේ. (ඇතරොස්ක්ලේරෝසිස්). එම්ගින් හෘදයාබාධ සහ අංශභාග වැනි රෝග වලට ඇති අවදානම අඩු කරයි.
6. සූදුරු ප්‍රතිකාරය මගින් මහ බඩවැලේ පිළිකා සෑදීමේ අවදානම සැලකියයුතු ලෙස වළක්වන බව සොයාගෙන ඇත. එසේම අධ්‍යයන වලින් හෙලිවී ඇත්තේ ආමාශයේ සහ අක්මා පිළිකා වලින් ද ආරක්ෂා කරන බවයි.
7. එමෙන්ම දියවැඩියා රෝගීන්ගේ ලේවල සීනි තත්වය පාලනය කිරීමට උපකාරී වේ. සූදුරු වල ඇති තන්තු, තඹ, මැංගනීස් වැනි ඛනිජ ලවණද විටමින්-B3, විටමින්-C ද දායක වන බව සොයා ගෙන ඇත.
8. සූදුරු මගින් ආහාර මඟින් බෝවන රෝග කාරක බැක්ටීරියා සහ දිලීර වලට එරෙහිව සැලකිය යුතු ප්‍රතිජීවක සහ ප්‍රතිදිලීර ක්‍රියාකාරීත්වයක් පෙන්වයි.
9. සූදුරු මව් කිරි දෙන මවුවරුන්ගේ මව්කිරි ස්‍රාවය වැඩි කරයි’
10. ස්නායු උත්තේජනය කිරීමට උපකාරී වේ.
11. හොඳ යකඩ ප්‍රභේදයක් වන සූදුරු අපගේ ප්‍රතිශක්තිකරණ පද්ධතිය ශක්තිමත් හා සෞඛ්‍ය සම්පන්නව තබා ගැනීමට උපකාරී වේ.
    

The post සූදුරු වල ගුණ ගැන දන්නවාද? හරියටම දැන ගමු appeared first on Lady.lk | Lady | Women | Lifestyle | Health | Beauty.